Fálase

Vigo dá o primeiro paso para obter a declaración como 'zona tensionada' do mercado da vivenda. O pleno municipal aproba unha moción do BNG que inclúe medidas para frear o aumento dos prezos dos alugueiros e limitar a proliferación dos pisos turísticos, así como solicitudes desde o Concello de Vigo para que tanto a Xunta como o Goberno de España "despreguen alternativas" nesta materia. O Estado presentou en febreiro un índice de prezos a aplicar nas declaradas como 'zonas tensionadas'. Porén, a dirección central do PP, liderada por Feijóo, xa advertiu de que "as comunidades autónomas do PP non aplicarán o índice de prezos de alugueiros".

• Fronte da Xunta coas inmobiliarias contra os concellos que buscan limitar os alugueiros ao abeiro da lei estatal
• A dirección central do PP sentencia que a Xunta non aplique os límites ao alugueiro que piden A Coruña e Santiago

O Consello de Seguridade da ONU aproba esixir "un alto o fogo inmediato" de Israel en Gaza cadrando co Ramadán, así como a "liberación inmediata e incondicional de todos os reféns" de Hamás. "Esta resolución debe ser aplicada" e non facelo sería "imperdoable", considera o secretario xeral da organización, António Guterres. [Imaxe: UN Photo]

• HEMEROTECA | Israel acusa o secretario xeral da ONU de ser "un perigo para a paz mundial" por pedir un alto o fogo
• HEMEROTECA | Hamás ou o búmerang da historia: como Israel contribuíu á súa fundación
• HEMEROTECA | "De Gaza non se pode escapar, está pechada a cal e canto por Israel"

Activada para este martes a alerta de nivel laranxa no mar por vento intenso e ondas entre cinco e sete metros de altura. A Axencia estatal de meteoroloxía (Aemet) informa de que o fenómeno meteorolóxico adverso estará activo a partir das 14h do martes 26 na costa da Coruña e Pontevedra, e está previsto que se estenda a todo o litoral galego a partir da madrugada [na imaxe]. Haberá vento do noroeste forza 7 e ocasionalmente forza 8 e mar combinada do noroeste.

A Audiencia Nacional revoga a súa orde de bloquear cautelarmente Telegram. O xuíz Santiago Pedraz dita agora unha providencia pedindo á Policía un informe sobre as consecuencias que tería a medida no conxunto de persoas usuarias do servizo de mensaxería.

• 📲Canle de Praza.gal en Telegram

A calidade do aire en Lugo cualifícase como "moi mala" nas últimas horas debido á concentración de partículas contaminantes. A medición de MeteoGalicia [na imaxe] na estación industrial localizada na área rural de Vilar, no concello de Lugo, ao sur da empresa Tableros Hispanos, S.L.U, propietario da mesma, achega cifras de contaminación elevadas pola intrusión de masas de aire africano. As recomendacións neste nivel de contaminación indican que se trata de condicións de "emerxencia para a saúde pública" e que "a poboación enteira pode verse seriamente afectada". Ademais, sinálase que é recomendable evitar toda actividade física no exterior mentres se manteñan os elevados niveis de contaminación.

A Audiencia Nacional ordena a suspensión cautelar do Telegram. O xuíz Santiago Pedraz emitiu unha orde contra a aplicación de mensaxería instantánea a partir dunha denuncia relacionada cos dereitos de autor presentada polas empresas Mediaset, Atresmedia e Movistar Plus. Está previsto que Telegram deixe de funcionar ao longo deste sábado. [Foto de Rubaitul Azad en Unsplash]

Máis de 140 vítimas nun tiroteo nunha sala de concertos próxima a Moscova nun atentado reivindicado polo Estado Islámico. Varios individuos armados accederon este vernes ao Crocus City Hall [na imaxe ©Google], un local de concertos anexo a un centro comercial na cidade de Krasnogorsk, disparando a todos os presentes. Rusia investígao como terrorismo e anuncia que xa está a realizar detencións. 

María Pan, nova alcaldesa de Cambre en substitución de Óscar García Patiño, que dimitiu do cargo alegando o "bloqueo" da institución por decisións da secretaría e da intervención municipais. A nova rexedora, primeira muller que exerce a alcaldía neste municipio, tivo os votos a prol do seu partido, Unión por Cambre. O PP local votou pola súa voceira, Diana Piñeiro, mentres que PSdeG, BNG e Alternativa dos Veciños se abstiveron. [Imaxe: Concello de Cambre]

• OPINIÓN | Cambre, concello fallido? Por Carlos Amoedo 

Besteiro presenta un milleiro de avais á súa candidatura para liderar o PSdeG e este sábado será proclamado secretario xeral electo. O deputado lucense, único candidato ao proceso no que as normas requiren entre 600 e mil avais, recibirá a proclamación cando transcorran as 24 horas regulamentarias para a presentación de posibles recursos. A renovación da dirección do partido culminará coa elección da nova Executiva Nacional no Congreso que o partido celebrará o 27 de abril. Na imaxe, Besteiro diríxese a entregar os avais na sede nacional do PSdeG, este venres. [CC BY-NC-SA PSdeG]

• HEMEROTECA | O PSdeG acelera os cambios: primarias o 7 de abril e o 27, congreso para renovar a dirección
• HEMEROTECA | O PSdeG aspira con Besteiro á ollada a medio prazo que logrou o BNG con Pontón

O xefe territorial da Consellería de Educación en Pontevedra compara o Goberno de España co "réxime nazi" durante unha charla para estudantes en Soutomaior. César Pérez Ares participaba no encontro en calidade de ex-deputado do PP xunto a Manuel Lourenzo, ex-deputado do BNG e alcalde da vila, e mais con Leticia Gallego, que foi deputada do PSdeG. A socialista recriminou a Pérez Ares a súa "lamentable intervención", na que ven un "desprezo polas máis elementais regras da democracia". Cóntao Pontevedra Viva. Na imaxe, de arquivo, o ex-deputado popular, nunha xuntanza na delegación da Xunta en Pontevedra.

• HEMEROTECA | A Xunta potencia a visibilidade política dos xefes territoriais tras presentalos como postos técnicos