O relatorio de vacinas do Consello Interterritorial de Saúde estuda xa a extensión da terceira dose da vacina contra a COVID á poboación maior de 40 anos, adianta a Cadena SER. Actualmente está prescrita para maiores de 60 e o Sergas citou xa nos últimos días a poboación do grupo de 50 a 59 anos para recibila, aínda que aínda sen o visto e prace do organismo interterritorial. [Imaxe: CC BY-SA Xunta]
O Sergas recibe do Ministerio de Sanidade o primeiro lote de vacinas contra a COVID-19 para a infancia de 5 a 11 anos, 60.000 doses que comezarán a ser administradas o vindeiro mércores, día 15. Sanidade especificou que a vacinación comeza polo grupo de 9 a 11 anos. O grupo de menores de 11 anos, ata agora non incluído na vacinación, vén encabezando dende hai semanas a incidencia acumulada [Foto: CC BY-SA Sergas]
Estragan cunha pintada a escultura de Federico García Lorca na Alameda compostelá. O Concello de Santiago emitiu un comunicado de "condena deste acto vandálico" que, di, "non ten cabida nunha cidade como Compostela, caracterizada polo respecto á diversidade e á igualdade". O goberno local detalla que a Policía "está realizando un informe" e este mesmo domingo unha restauradora "tentará limpala". O BNG local, que divulgou a imaxe, tamén condena o acontecido e subliña que Lorca foi "amante de Compostela e da lingua galega, símbolo da cultura en liberdade". Compostela Aberta, pola súa banda, "lamenta e condena" o estrago e lembra que Lorca "foi brutalmente asasinado pola barbarie franquista".
O Papa recibe no Vaticano a Yolanda Díaz, que lle entregou un exemplar de Follas novas, de Rosalía de Castro. A vicepresidenta segunda do Goberno de España e ministra de Traballo sinala que "dialogou" co pontífice "sobre o traballo decente, a crise da COVID-19 e o futuro do planeta". O equipo de Díaz abonda que, entre os asuntos tratados, figuraron as medidas do Executivo español en clave social e de emprego. (Imaxe divulgada polo Ministerio de Traballo).
Berta Dávila gaña o Premio Xerais de Novela e mais o Premio Jules Verne de Literatura Xuvenil coas súas obras Os seres queridos e Un elefante na sala de estar. O XXVI Premio Merlín de Literatura Infantil foi para Ledicia Costas pol'O neno de lume. [Imaxe: © Xerais]
O tribunal de apelacións de Londres ditamina que Julian Assange, fundador de Wikileaks, pode ser extraditado aos EUA. "A vida de Julian está unha vez máis ameazada gravemente e tamén o está o dereito dos xornalistas a publicar material que os gobernos e as corporacións consideran inconvenientes", sinalan dende Wikileaks en declaracións que recolle a BBC. Os seus avogados recorrerán a decisión. [Imaxe: © Wikileaks]
Raúl Santos Ageitos coa novela Cornucopia e María Cureses de la Vega coa novela Ni luz ni llanto son os gañadores da XXXIII edición do Premio Torrente Ballester de narrativa da Deputación da Coruña. Os premios buscan achegar os escritores ao público e esta tarde, ás 19h na sala Juanjo Gallo da sede da Deputación, organizan Un Torrente de Convesas, un encontro aberto co xurado no que participarán a poeta Dores Tembrás e os Premios Nacionais de Narrativa Xesús Fraga e Ignacio Martínez de Pisón, moderados pola xornalista Susana Pedreira.
Tanxugueiras participarán no festival no que será elixida a canción que representará a TVE en Eurovisión 2022 cun tema titulado Terra. A representación da corporación estatal elíxese dende este ano a través do reformulado festival de Benidorm, que se celebra o vindeiro xaneiro.
O testemuño para a BBC dunha enfermeira galega nas Urxencias dun hospital de Londres: "Arredor do 80% das persoas que están en Urxencias coa COVID e necesitan soporte respiratorio non están vacinadas", subliña María Santomil.
VINTE celebra este xoves, 9 de decembro, o seu terceiro aniversario cunha festa na Coruña. Dende as 21h no Café Universal escoitaremos un episodio ao vivo do podcast Café Derby 21, con Lucía Aldao como convidada. Tamén xogaremos ao Vinte Preguntas, o novo xogo interactivo de VINTE, nunha partida dirixida por Carlos Meixide. E despois, música de baile con Dj Prol McCartney.
