Rueda elixe a Manuel Pérez, ex-alcalde de Vigo e histórico apoio de Cuiña fronte a Feijóo na sucesión de Fraga, como novo presidente do Consello Económico e Social. Pérez, de 73 anos e moi implicado no apoio a Marta Fernández-Tapias como candidata popular en Vigo, sucederá a Agustín Hernández.
España, Portugal e Marrocos acollerán a celebración do Mundial de fútbol en 2030. A Coruña e Vigo aspiran a ser sede dos partidos que se xogarán na Península. Os partidos inaugurais do evento organizado pola FIFA serán no Uruguai, a Arxentina e Paraguai. [Imaxe ©FIFA]
O Tribunal Superior de Xustiza de Galicia presenta unha nova identidade corporativa que parte da balanza –o símbolo máis recoñecible da Xustiza– e da bandeira de Galicia. O deseñador Carlos el Rojo obtivo un imagotipo que pretende "transmitir a imaxe dunha institución seria e de confianza, á vez que moderna, aberta e que evoluciona coa sociedade", segundo detalla o propio TSXG.
O Ministerio de Transportes defende que Renfe oferta en Galicia un 11% máis de prazas á semana que antes da pandemia, 169.000 fronte a 153.000, o que non está a impedir o colapso nalgúns traxectos, especialmente no Eixo Atántico. O secretario de Estado, David Lucas, reuniuse coa conselleira de Infraestruturas, Ethel Vázquez, e confirmou que Talgo non comezará a entregar ata decembro os trens Avril que facilitarán as conexións de alta velocidade entre Galicia e a Meseta.
O BOE publica a autorización ambiental do enlace entre a Terceira Rolda da Coruña e a AP-9, un treito de autovía de 2 quilómetros que implicará a expropiación de catro vivendas e outras dúas edificacións.
José Ramón Gómez Besteiro será un dos representantes do PSOE na comisión negociadora para conformar un goberno progresista en España. Na primeira reunión entre Pedro Sánchez e Yolanda Díaz (Sumar), ambos emprazáronse a pechar en outubro o pacto para ese executivo.
O Concello da Coruña solicita á Xunta que declare a cidade como zona de mercado residencial tensionado ante unha oferta de vivenda "que non responde ás necesidades reais da poboación". O prezo medio dos alugueiros na Coruña é o máis alto das sete cidades galegas.
A Xunta baixará do 8% ao 3% o imposto de transmisión de vehículos de segunda man, que se eliminará para os vehículos eléctricos e híbridos enchufables. Así o anunciou o presidente da Xunta, Alfonso Rueda, durante unha visita a un concesionario de coches en Nigrán.
Alfonso Rueda acode este xoves ao programa Land Rober da TVG dentro da súa longa campaña para darse a coñecer á cidadanía galega. Feijóo foi ao mesmo programa en 2016 catro días despois de obter a súa terceira maioría absoluta nas eleccións galegas de setembro daquel ano, mentres que Rueda faino ao tempo que vén de lanzar a precampaña dos próximos comicios cunha xira para "manter un contacto máis directo cos galegos e as galegas".
O Concello de Oleiros é condenado a retirar e absterse de repetir campañas como a que simulou un atropelo á conselleira de Infraestruturas para reclamar máis seguridade viaria. Un xulgado da Coruña di que están prohibidas as campañas que "manifestamente menoscaben, obstaculicen ou perturben as políticas públicas ou calquera actuación lexitimamente realizada por outro poder público no exercicio das súas competencias", e asegura que "o ánimo dos carteis non pode ser outro que menoscabar e ridiculizar o exercicio das competencias propias en materia de estradas da Xunta de Galicia".
