Fálase

O Concello de Oleiros é condenado a retirar e absterse de repetir campañas como a que simulou un atropelo á conselleira de Infraestruturas para reclamar máis seguridade viaria. Un xulgado da Coruña di que están prohibidas as campañas que "manifestamente menoscaben, obstaculicen ou perturben as políticas públicas ou calquera actuación lexitimamente realizada por outro poder público no exercicio das súas competencias", e asegura que "o ánimo dos carteis non pode ser outro que menoscabar e ridiculizar o exercicio das competencias propias en materia de estradas da Xunta de Galicia".

A UE desbloquea outros 93.500 millóns para España e acepta que non implante peaxes en autovías a cambio do impulso do transporte público. A revisión do plan de recuperación estatal inclúe tamén unha nova simplificación dos permisos para enerxías renovables.

Dimite a alcaldesa de Vilalba. A socialista Elba Veleiro presentou este luns a súa dimisión e por tanto a renuncia á súa acta ante o pleno da corporación. Puxo fin a 16 anos de actividade política na localidade tras lograr converterse no ano 2019 na primeira alcaldesa muller na democracia en Vilalba. Veleiro explicou que "quería volver á miña profesión especialmente nun momento no que a sanidade necesita máis profesionais” e asegurou que xa tiña cumpridas as responsabilidades que asumira tras conseguir dúas alcaldías progresistas para Vilalba.

HEMEROTECA | ENTREVISTA: Elba Veleiro: “A maioría absoluta do PP en Vilalba nos últimos 40 anos viña enlazada ás mesmas familias que os 40 anos anteriores da ditadura”

A FAO pide en Vigo avances na industria pesqueira cara á sostibilidade. A feria Conxemar comezou hoxe coa demanda da directora da División de Pesca e Acuicultura da FAO (Organización das Nacións Unidades para a Agricultura e a Alimentación), Vera Agostini, para que os axentes do sector transformador de produtos do mar busquen alianzas de cara a “avanzar na sostibilidade, tanto ambiental como social e económica”, a chamada transformación azul do sector.

50 mulleres asasinadas por violencia machista no que vai de ano no Estado español. A Delegación do Goberno contra a violencia de xénero confirma como crime machista o que acabou coa vida dunha muller de 41 anos este xoves na provincia de Toledo. Con este feminicidio, 2023 xa supera o número de mulleres asasinadas polo feito de seren mulleres do ano 2022. A vítima tiña dous fillos menores de idade, o número de menores orfos por violencia de xénero no Estado ascende a 50 só neste ano. [Imaxe de arquivo CC-BY-NC-SA Gz Contrainfo]

• HEMEROTECA | A amplificación do negacionismo engádese ao verán como risco para o aumento da violencia machista 
• HEMEROTECA | Aumentan as denuncias por violencia machista e as peticións de protección das vítimas no comezo de 2023
• HEMEROTECA | A muller asasinada en Oia estaba á espera de xuízo tras denunciar a ex-parella por violencia machista hai dous meses

A bioquímica húngara Katalin Karikó e o inmunólogo estadounidense Drew Weissman gañan o Premio Nobel de Fisioloxía ou Medicina "polos seus descubrimentos sobre modificacións de bases de nucleósidos que permitiron o desenvolvemento de vacinas de ARNm eficaces contra a COVID-19". 

Un peche na Consellería de Política Social reivindica un "convenio digno" nos Servizos de Axuda ao Fogar (SAF). Delegadas da CIG demandan a negociación inmediata dun convenio colectivo e un servizo "integramente público".

• As traballadoras de axuda no fogar pelexan ante Xunta e concellos pola suba salarial do 6,5% que esixe o seu convenio

Centos de persoas marchan en Moaña este domingo en defensa da sanidade pública. Convocadas pola Mesa pola Sanidade Pública de Moaña e a Plataforma SOS Sanidade Pública reclaman a volta do PAC á Casa do Mar. Na manifestación [na imaxe CC-BY-SA Concello de Moaña] participou a portavoz nacional do BNG, Ana Pontón, quen salientou a loita da veciñanza de Moaña durante 59 domingos demandando o reforzo da sanidade pública coa recuperación das urxencias e as ambulancias. 

Trece persoas falecidas en Murcia no incendio dunha discoteca na zona de Atalayas. As autoridades non descartan que o número de mortes aumente mentres continúa o traballo dos bombeiros e as forzas de seguridade. Hai catro feridos e varias persoas desaparecidas. O concello decretou tres días de loito oficial no municipio. [Fotografía: 112 Región de Murcia] 

Entra en funcionamento en Galicia o servizo 028 Arco da Vella, que ofrece información, asesoramento xurídico e atención psicosocial inmediata e especializada fronte as violencias por LGBTIfobia. A partir deste luns a Xunta activa un servizo que funciona no Estado desde o pasado 5 de xullo a través do Ministerio de Igualdade en coordinación coas comunidades autónomas. 

É gratuíto, funciona as 24 horas do día e está dirixido ás vítimas de delitos de odio ou de discriminación por LGBTIfobia, así como para informar e atender calquera necesidade das personas LGBTI, ás súas familias ou achegados. Ademáis de chamar ao 028, pódese contactar no 028-online@igualdad.gob.es e/ou sevizo028arcodavella@xunta.gal.

• HEMEROTECA | Día do Orgullo e de preocupación pola lexitimación dos discursos de odio: "O 23X xogámonos moito" 
• HEMEROTECA | Identidades e disidencias sexuais: radiografía á diversidade en Galicia entre chamadas á formación e á empatía