Fálase

A Xunta confirma que o novo protocolo COVID para pubs e discotecas permitirá un 75% de ocupación en interiores e o 100% nas terrazas con horario de peche ás 4 da madrugada se os locais esixen o certificado de vacinación, de test negativo ou de ter a enfermidade superada. Nos locais que non esixan certificado, a ocupación máxima do interior será do 50% e do exterior, ao 75%; no seu caso, o peche será ás 3. Este novo protocolo está pendente de ratificación polo Tribunal Superior. Alén disto, Sanidade confirma que o mapa de niveis de restricións seguirá sen cambios, con todos os concellos en nivel baixo agás Foz e O Barco (medio).

• Setembro remata en Galicia coa COVID en mínimos e a vacinación masiva a piques de rematar

Un novo detido polo asasinato de Samuel Luiz, acontecido o pasado xullo na Coruña. Está previsto que pase a disposición xudicial entre hoxe e mañá, segundo confirman fontes do TSXG. É a sétima detención polo crime, polo que xa se investiga cinco persoas adultas e dúas menores de idade.

• HEMEROTECA | Probas de ADN "implican directamente" os dous principais agresores de Samuel Luiz

A ocupación máxima nos estadios de fútbol profesional (Primeira e Segunda) volve ao 100% e nos pavillóns de baloncesto da ACB elévase ao 80%. Esta decisión do Consello Interterritorial de Saúde atinxe, no caso galego, ao Celta e ao CD Lugo en fútbol e mais ao Obradoiro e ao Breogán, en baloncesto. Permanecerán limitacións como a obriga de portar máscara e a distancia interpersoal de 1,5 metros e a asistencia "preferente" de persoas abonadas a cada club. Na imaxe, partidos do Obradoiro e do Breogán, antes da pandemia.

• DATOS | Setembro remata en Galicia coa COVID en mínimos e a vacinación masiva a piques de rematar

A lava da erupción volcánica da illa de La Palma chega ao océano. A Televisión Canaria segue a informar ao vivo da evolución deste fenómeno natural e do seus efectos na poboación. Na imaxe [© Salvamento Marítimo], a lava caendo por un cantil cara á auga.

O Consello de Ministros aproba o aumento de 15 euros do Salario Mínimo Interprofesional, que queda en 965 euros. Aplicarase xa nas nóminas deste mes de setembro. O Goberno de España di manter o compromiso de que o SMI acade o 60% do salario medio antes da fin da lexislatura.

Os votos do PP frean a comisión de investigación no Parlamento sobre o baleirado dos encoros por parte de Naturgy e Iberdrola. A solicitude formulouna o BNG e tivo tamén os votos a prol do PSdeG. Os populares argumentaron o seu rexeitamento sinalando que esta é unha competencia estatal e a investigación política, de producirse, terían que ser no Congreso.

• A Xunta reduciu este ano un 90% o importe da sanción por baleirar encoros que agora propón para Naturgy e Iberdrola
• Así descendeu en menos de dous meses o nivel de auga nos encoros investigados en Galicia

Toman posesión os sete novos membros do grupo do PP no Parlamento. Substitúen os conselleiros e conselleiras que formalizaron a renuncia ás actas parlamentarias tras determinar Feijóo que só continuarían como deputados os dous vicepresidentes da Xunta, Alfonso Rueda e Francisco Conde. [Foto: © Parlamento]

• Feijóo dá de baixa como deputados do PP a todos os membros do Goberno agás aos vicepresidentes Rueda e Conde

Acordo para a prórroga dos ERTE pola COVID ata o 28 de febreiro. A pasada noite, a patronal CEOE sumouse ao pacto no que xa avanzaran os Ministerio de Traballo e Seguridade Social cos sindicatos CC.OO. e UGT. Na imaxe -de arquivo, previa á pandemia- Yolanda Díaz e José Luis Escrivá con representantes sindicais e empresariais.

Tal día coma hoxe de 1975, o franquismo executaba os seus derradeiros asasinatos, entre eles o do vigués Xosé Humberto Baena. O vindeiro mércores (12h), a súa irmá, Flor Baena, imparte unha conferencia ao respecto na Facultade de Historia da USC, no marco do ciclo Pasados incómodos. 

• HEMEROTECA | "Non queremos que Humberto quede como un asasino. Queremos que quede como o que é: un asasinado"

O PS mantense como forza máis votada nas eleccións municipais portuguesas, pero perde a alcaldía de Lisboa. No Porto, o independente Rui Moreira repite presidencia da Cámara. 

• AMPLIAMOS 👉 As municipais portuguesas deixan alternancia en Lisboa, continuidade no Porto e unha vitoria agre para os socialistas