Fálase

Galicia ofrécese para acoller a persoas refuxiadas de Ucraína. A Xunta trasladará ao Ministerio de Inclusión, Seguridade Social e Migraciones que ten dispoñibles recursos e instalacións para dar amparo a refuxiados ucraínos, faráo nunha reunión para coordinar a resposta do conxunto do Estado diante da fuxida de milleiros de persoas por mor da guerra iniciada por Putin. Como en anteriores ocasións, a chegada de refuxiados a Galicia dependerá do acordado polo Goberno de España. [Na imaxe, o director xeral de Inclusión Social, Arturo Parrado, nunha reunión coas entidades que forman parte do Programa de protección internacional CC-BY-SA Xunta]

• REPORTAXE | O periplo dun menor migrante: "Gustaríame quedar en Marrocos se as cousas fosen como en Galicia, non me tería matado para vir"

Alejandro Valverde faise co maillot amarelo da Volta a Galicia O Gran Camiño. Despois de ser o primeiro en cruzar a meta na etapa raíña da competición, o ciclista logrou superar ao canadense Michael Woods tamén na contrarreloxo de Sarria. O moañés Delio Fernandez foi o mellor dos galegos na clasificación final, rematando no posto 16, mentres que o ourensán Carlos Canal gañou o premio á combatividade. [Na imaxe, o podio da final © Luis Gomez / Sprint Cycling / O Gran Camiño]

O presidente ucraíno, Volodimir Zelenski, confirma que haberá unha xuntanza entre as delegacións negociadoras de Rusia e Ucraína na fronteira desta última con Bielorrusia, na beira do río Prípiat. No cuarto día desde que comezou a invasión rusa de Ucraína, Zelenski tamén solicitou amparo ao Tribunal Internacional de Xustiza das Nacións Unidas co obxectivo de acadar o cese da acción militar ordenada por Vladimir Putin. [Na imaxe, Volodimir Zelenski © president.gov.ua]

• A UE inclúe o financiamento de armas na resposta á invasión rusa de Ucraína e Putin exhibe a alerta nuclear
• "O mundo cambiou hoxe. Putin forzou un cambio na arquitectura de seguridade de Europa"

Feijóo afirma que "se necesita reflexión e moito sentido común, moita proporcionalidade nas decisións" e non confirma a súa candidatura para o congreso extraordinario do PP. O presidente da Xunta lembrou este domingo que ata o martes non comeza o período para presentar candidaturas e manifestou o seu desexo de que deste proceso "saia un partido reforzado". [Feijóo e Casado nunha imaxe de arquivo en Oleiros © PP]

• A aposta de Feijóo pola imaxe do PP fronte á loita contra a corrupción impúlsao cara á presidencia do partido
• Casado deixará paso a Feijóo tras un mes de transición

Alejandro Valverde gaña a terceira tirada da Volta a Galicia, considerada a etapa raíña, que percorreu as montañas de Ourense entre o Miño e o Sil. Na liña de meta de Luíntra entrou en segundo lugar o canadense Michael Woods, que foi o vencedor do venres e vai líder na clasificación xeral. O veterano ciclista Miguel Induráin recibiu os corredores na meta. A etapa final do domingo en Sarria será decisiva.  [Fotografía de Luis Gomez / Sprint Cycling / O Gran Camiño]

A portavoz nacional do BNG, Ana Pontón, manterá este martes unha reunión institucional co lehendakari Iñigo Urkullu na sede do Goberno vasco en Vitoria. A formación nacionalista traslada que o encontro versará sobre o concerto económico de Euskadi en medio do debate aberto sobre o financiamento autonómico, o papel das forzas nacionalistas no contexto do Estado e o papel da Administración pública para impulsar a ciencia e o coñecemento. Na mesma visita, Pontón reunirase coa dirección do organismo para o desenvolvemento da investigación científica en Euskadi, o Ikerbasque.

O Consello da Cultura Galega entrega as Medallas de Honra da institución ao poeta e director do Instituto Cervantes, Luis García Montero, e á profesora da Universitat de Barcelona Helena González Fernández polo seu "labor a prol do diálogo entre a cultura galega e outras culturas irmás, fraternalmente, por enriba de muros e valados que non están nos nosos corazóns". 

No acto participan o presidente do Parlamento, Miguel Ángel Santalices; o secretario xeral de Política Lingüística, Valentín García; e o presidente da Real Academia Galega, Víctor Freixanes, entre outros. [Fotografía © Xoán Crespo/Xunta]

Michael Woods gaña a segunda tirada da Volta a Galicia, con final no Alto do Ézaro. O canadiano do equipo Israel superou a Alejandro Valverde por 16 segundos e sitúase como o novo líder da proba. O moañés Delio Fernández, sétimo na etapa, é o mellor galego na xeral. Este sábado correrase a terceira tirada, entre Maceda e Luíntra, considerada a etapa raíña da Volta.

O TSXG autoriza prorrogar ata marzo a esixencia do certificado COVID-19 en hospitais e residencias. O Tribunal Superior destaca que o virus “continúa tendo unha elevada circulación” e explica que a medida ten como obxectivo protexer a persoas especialmente vulnerables. As persoas que queiran acceder a un centro hospitalario ou residencial poden presentar un certificado de vacinación, de proba diagnóstica negativa ou de ter pasado a enfermidade; os hospitais ofrecen a posibilidade de someterse voluntariamente a unha proba diagnóstica.

• O Sergas flexibiliza as limitacións para acompañar pacientes coa COVID tras reiteradas protestas das familias

Polònia, o programa de sátira política de TV3, incorpora o personaxe de Feijóo, que comeza propoñendo o seu primeiro gag: “Casado está na ducha, como en Psicose, Ayuso quéreo apuñalar, aparezo eu como salvador e pégolle tres puñaladas”