Cultura

Fernando Fernández Rego publica Andrés do Barro. A xénese do pop en galego (Galaxia), unha obra na que percorre a carreira musical do cantautor ferrolán que acadou catro números un en todo o Estado cantando en galego, un fito nunca repetido e para o que reclama un maior recoñecemento: "Andrés foi o primeiro que fixo pop en galego e foi o primeiro fenómeno fan da cultura galega e en galego"

Aumenta a poboación lectora, pero diminúen os e as lectoras habituais. Así, a poboación que le todas as semanas descendeu entre o 2022 e o 2025 do 38,2% ao 32,2%; a que leu algún libro no último mes cae do 49,3% ao 43,8%. E o mesmo pasa coa que leu algún libro no trimestre anterior: do 55,5% ao 53,7%

Aspirante desde 1996, hai 30 anos, a reformulación da candidatura pola Xunta co apoio do Estado non logra convencer aos expertos internacionais, cos encoros hidroeléctricos como principal elemento de distorsión

En Couso (Gondomar) organizan esta fin de semana, do venres 12 ao domingo 14, un festival cultural e comunitario, impulsado de maneira autoxestionada e con acceso de balde. Entre os e as artistas confirmadas están Pataghullos, Antimums, High Paw DJ Set, Seitura, The Gotxos Party, Mercedes Peón, Brassica Rapa, Esmorgadas, Bloquinho Aperta, Netta Rufina, Sun Iou, Xente Tóxica ou DJ Rapante. 

A pasada semana Dolores Vilavedra foi elixida nova presidenta do Consello da Cultura Galega en substitución de Rosario Álvarez, que finalizou o seu segundo mandato á fronte da institución. Entre as prioridades, a nova presidenta sitúa o fortalecemento das relacións institucionais dentro e fóra de Galicia, intensificando as que mantén co Etxepare Euskal Institutua e co Institut Ramon Llull. Tamén chama a reforzar o papel asesor do CCG e a fortalecer o Observatorio da Cultura.

Marcos Calveiro é o novo director xeral da Editorial Galaxia. O autor, que dende o ano 2022 era director de edicións e amplía agora as súas responsabilidades, confesa que na actualidade se sente mesmo máis satisfeito co seu labor editorial, que comezou hai catro anos co obxectivo declarado de dar entrada a novas voces.

O conselleiro de Cultura obvia no Parlamento as críticas de todo tipo de institucións polo proceso restrinxido e discrecional para elixir a nova dirección do CGAC e atribúe ao BNG un desexo de querer controlar a cultura galega

O 12 de xullo de 2016, hai case dez anos, falecía en Vigo Agustín Fernández Paz, unha das mortes máis choradas na cultura galega. O Consello da Cultura Galega vén de publicar a entrada dedicada ao mestre e escritor no Álbum de Galicia, un texto de Manuel Bragado e Isabel Soto

Alvarellos presenta El mar tenía un amargo sabor a lágrimas. Memorias (1937-1945), unha versión en castelán dos seus Diarios -a primeira- pero que se amplía cun gran número de valiosos manuscritos achados polo investigador Conrado J. Arranz Mínguez, a cargo da edición da obra.