Fálase

O BNG proporá no debate de política xeral un “pacto galego pola ciencia e a innovación” co 3% de investimento en I+D+i. A formación celebrou este sábado unhas xornadas parlamentarias sobre "o I+D+i como motor de desenvolvemento". O Bloque propón crear o Instituto de Innovación Galego, semellante ao modelo vasco IKER e blindar por lei non penalizar ás mulleres investigadoras por ser nais. Estas eran algunhas das demandas expresadas polo persoal investigador prexudicado o pasado mes de xullo polos erros da Xunta na xestión dos contratos posdoutorais.

Manifestacións multitudinarias en ducias de cidades de todo o mundo abriron a semana de mobilizacións ante a emerxencia climática, que chegará ata o venres 27. Ese día están convocadas seis manifestacións en Galicia

Burela repetirá finalmente as eleccións locais o vindeiro 17 de outubro na mesa onde foron anuladas , segundo aprobou hoxe o Consello de Ministros. O Tribunal Superior de Xustiza de Galicia (TSXG) aceptara a reclamación da formación Burela Sempre por unha irregularidade nunha das urnas do instituto O Perdouro.

En máis de 30 cidades e vilas galegas están convocadas concentracións feministas esta noite. Esta xornada de #emerxenciafeminista ou #noite violeta lembra que "máis da metade das agresións e violacións ocorren pola noite, de madrugada, cando voltamos para a casa". "Estas rúas, compañeiras, aínda non son nosas", lembra o manifesto

Hoxe comeza en Lugo o Caudal Fest, o derradeiro festival do verán, que trae á cidade a Izal, Marea, Xoel López, Carolina Durante ou Marem Ladson

Os colectivos que organizan as Xornadas sobre Traballo Sexual da Coruña aclaran que o acto que se celebrará este venres ás 13 horas na Facultade de Dereito da UDC non é a clausura das Xornadas, senón un encontro aberto coa comunidade universitaria para expor as conclusións ás que se chegaron nas devanditas xornadas, xa finalizadas, que tiveron lugar no Centro Social A Comuna

O Concello de Pontevedra confirma a baixada do límite de velocidade a 10 quilómetros por hora para todos os vehículos nas rúas con plataforma única, ata agora limitadas a 20 km/h. O goberno local realizou o anuncio no marco da Semana Europea da Mobilidade, na que tamén avanzou a publicación do estudo Primeiro a cidade. A mobilidade en Pontevedra 1999-2019, unha publicación que recompilará o modelo urbano pontevedrés aplicado nas últimas dúas décadas.

System of a Down encabezarán o cartel do Resurrection Fest de 2020, ano no que o festival de Viveiro celebra a súa décimo quinta edición. A organización avanza que o vindeiro luns confirmarán novas bandas.

O Concello de Santiago ratifica a continuidade da campaña En negro contra as violencias machistas, impulsada polo consistorio da capital galega dende o 2015 e que xa foi secundada por máis dun cento de concellos. "As cousas que están ben feitas van continuar, non hai ningunha intención de que remate", sinala a edil compostelá de Igualdade, a socialista Noa Díaz, a preguntas da prensa sobre unha moción na que Compostela Aberta apostaba por mantela. A edición de 2019 incluirá mudanzas para espallala a novos sectores cidadáns, avanzou. Na imaxe, concentración contra a violencia machista ante o Pazo de Raxoi, este mércores.

A Xunta ultima a convocatoria de oposicións para cubrir 591 postos en dez especialidades, as máis numerosas de asistencia social, educación social e veterinaria. Segundo Función Pública, a previsión é que as primeiras probas se celebren en 2020. Anteriores ofertas de emprego público estiveron afectadas por fortes atrasos e a piques de caducar.