Fálase

O festival O Son do Camiño confirma que se vai adiar a 2022 porque, "malia á evolución favorable" da pandemia, "é imposible desenvolver un evento destas características tal e como viñamos facéndoo ata agora". A organización do festival informa de que as entradas xa mercadas para 2021 serán válidas para 2022, pero tamén será posible o reembolso. Avanza tamén que neste 2021 desenvolverá no mesmo Monte do Gozo "unha nova proposta" acorde "ás actuais circunstancias" co formato de ciclo de concertos e coa denominación O Son do Camiño-Perseidas. A programación "darase a coñecer a semana que vén".

• Mil persoas nas verbenas, ata dez mil en festivais: o plan da Xunta para 'desescalar' na música ao vivo ao aire libre

Goberno central, empresarios e sindicatos alcanzan un preacordo para ampliar os ERTE ata o 30 de setembro. A Seguridade Social propón ampliar as axudas ás empresas pero mantendo o modelo de incentivos que defende o ministro Escrivá. 

O profesor Carlos Callón, presidente de honra d'A Mesa pola Normalización Lingüística, intervén no programa Esta Manhã da portuguesa TVI para explicar as ligazóns lingüísticas galego-portuguesas e aprender aos presentadores do espazo algunhas palabras compartidas (Imaxe: © TVI)

A Xunta amplía o máximo de persoas permitido nas reunións entre non conviventes pola COVID: de 4 a 6 en interiores e de 6 a 10 en exteriores. Feijóo confirma que, polo momento, continuará o veto a estes encontros da 1 ás 6 da mañá. Sinala o presidente da Xunta que tamén serán ampliadas ata o 75% as capacidades permitidas en comercios, actividades culturais e académicas agás nos concellos coas restricións máis elevadas, sempre que se poida manter distancia de seguridade. 

• AMPLIAMOS 👉 Encontros de ata dez non conviventes no exterior na nova fase da 'desescalada' mentres a COVID segue contida en Galicia
• HEMEROTECA | O comité clínico que asesora á Xunta fronte á COVID non levantou acta de ningunha reunión en toda a pandemia

O proxecto da Deputación de Lugo para a "recuperación e posta en valor" dos soutos da Reserva da Biosfera dos Ancares Lucenses e Montes de Cervantes, Navia e Becerreá gaña na fase de voto popular da Copa España Creativa con case 23.000 votos, o 35,6% do total. Esta fase supón o 40% do resultado final do certame e o 60% procederá dun xurado experto, que ditaminará en setembro. Neste vídeo, a exposición do proxecto para a votación e o xurado.

Lobios, A Pobra do Caramiñal e Mos entran no nivel máximo de restricións pola COVID-19 establecidas pola Xunta. Segundo vén de comunicar Sanidade, o comité clínico tamén determinou na súa reunión deste martes o nivel alto de restricións para os municipios de Ribeira, Ordes, Moraña, Ponte Caldelas e Viveiro.

No nivel medio medio estarán os concellos de O Barco de Valdeorras, Moaña, Ponteareas, Cambados, Bueu, Boiro, Rianxo, Cee, Xove, Cervo, Vilalba e Monforte. Mentres que no resto fican vixentes as restricións fixadas no nivel medio baixo, pois a incidencia a sete días permanece estable na maioría de áreas sanitarias. Todas estas medidas entrarán en vigor ás 00.00 horas do vindeiro sábado, 29 de maio.

• MAPA INTERACTIVO | Restricións da Xunta polo coronavirus a partir do 29 de maio

O Tribunal Superior de Xustiza valida a prórroga das restricións da Xunta pola COVID-19 que atinxen a dereitos fundamentais ata o vindeiro 29 de maio. O alto tribunal galego considera, nun auto notificado este martes, que a restrición temporal fai "proporcionadas e necesarias" as medidas de limitación de encontros entre non conviventes entre a 1 e as 6 da madrugada e as limitacións de reunións sociais a 6 non conviventes no exterior e 4, en espazos interiores.

• AMPLIAMOS 👉 O Tribunal Superior avala a prórroga das restricións da Xunta pola COVID que atinxen a dereitos fundamentais
• MAPA INTERACTIVO | Restricións da Xunta polo coronavirus

O Ministerio de Dereitos Sociais acorda coas comunidades autónomas o acollemento de nenas e nenos migrantes procedentes de Ceuta, que no caso de Galicia serán vinte. Na imaxe, a ministra Ione Belarra dando conta do acordo. Belarra destaca a "responsabilidade" amosada polas comunidades autónomas no pacto.

• A Xunta confirma a acollida de vinte menores migrantes mentres Feijóo axita a teoría dun "efecto chamada"

Falece aos 86 anos de idade Adolfo Campos Panadeiros, ex-alcalde de Dozón polo PP. Campos exerceu a alcaldía deste municipio durante 33 anos e abandonou o posto en xuño de 2020 por razóns de saúde. Daquela fora substituído polo tenente de alcalde, o seu fillo Adolfo Campos Vázquez. A Deputación de Pontevedra, a Fegamp e o PP provincial, entre outras entidades, trasladaron as súas condolencias.

Falece Xosé Represas, alcalde de Ponteareas polo BNG ata o pasado abril, cando tivo que abandonar o cargo por razóns de saúde. O falecemento foi confirmado esta mañá pola Deputación de Pontevedra, institución que sinala que Represas foi un "gran servidor público e a súa marcha déixanos un gran baleiro".

• OBITUARIO | Ponteareas di adeus a Xosé Represas, o alcalde que consolidou o cambio político na vila
• HEMEROTECA | Ponteareas: De alcalde franquista á consolidación do BNG en 20 anos