Falece Xosé Represas, alcalde de Ponteareas polo BNG ata o pasado abril, cando tivo que abandonar o cargo por razóns de saúde. O falecemento foi confirmado esta mañá pola Deputación de Pontevedra, institución que sinala que Represas foi un "gran servidor público e a súa marcha déixanos un gran baleiro".
Falece en México Xerardo Moscoso, cofundador de Voces Ceibes. Economía Digital Galicia vén de informar do seu pasamento.
Diversas entidades concentráronse este sábado ante a torre de Caldaloba, en Cospeito, para pedir a súa recuperación. Malia ser declarada Ben de Interese Cultural (BIC) en 1994, está en risco de derruba.
O Goberno de España outorga a Medalla ao Mérito da Protección Civil ao piloto falecido en Lobios o pasado setembro xunto a un compañeiro portugués mentres traballaban na extinción dun incendio. A familia recibiu a condecoración na base aérea de Matacán, en Salamanca, de onde era Maximiliano Plaza, de 38 anos.
Xa están no Diario Oficial de Galicia os cambios nas restricións da Xunta pola COVID-19 previstos dende as 00:00 deste sábado, 22 de maio. Alén dos cambios de nivel nunha trintena de concellos, o Goberno galego impón máscara no traballo en espazos compartidos e ratifica a ampliación do horario dos bares ata a 1 da madrugada e a prórroga dos límites ás reunións entre non conviventes nos termos que xa estaban vixentes dende a fin do Estado de Alarma.
Amelia Pérez, elixida nova secretaria xeral de CC.OO. en Galicia no congreso do sindicato. É a primeira muller en encabezar esta central sindical na súa historia en Galicia. Pérez é traballadora do sector do comercio e, dende 1999, delegada sindical en Zara en Vigo, onde veu exercendo como secretaria xeral da unión comarcal da central nos últimos oito anos.
Unha escultura de Ramón Conde titulada “Acordo xusto” presidirá a nova Cidade da Xustiza de Vigo no antigo Hospital Xeral. A Xunta pagará 132.000 euros por ela, da que di que “ten algo de visceral e multicultural ao representar co símbolo máis universal do apertón de mans entre dúas partes en conflito, que alcanzan un acordo que satisfai a ambas as partes e que emocionalmente fainos sentir como xusto”. Conde é autor doutras obras na cidade como os ‘redeiros’ que hai en Gran Vía.
A exposición Galicia, de Nós a nós pode verse desde xa no Museo de Pontevedra ata o 11 de xullo tras o seu paso previo por Santiago e Ourense. Recuperamos unha ducia de paradas obrigadas na mostra.
Pere Aragonès, investido como novo presidente da Generalitat de Catalunya cos votos a prol de ERC, Junts e CUP. O último membro de ERC que presidira o Govern catalán fora Josep Tarradellas, como presidente provisional tras a restauración da institución. O Parlamento catalán non investía un presidente de Esquerra dende Lluís Companys (1933).
Xunta e Goberno de España acordan negociar as discrepancias sobre o apartado da Lei de Saúde galega que atinxe a dereitos fundamentais. O artigo cuestionado polo executivo central, que tamén contemplaba a posibilidade dunha vacinación obrigatoria, quedou en suspenso hai dous meses ao recorrelo ante o Tribunal Constitucional. A negociación que agora se abre pretende resolver o conflito sen que interveña o tribunal.
