A Asociación de Actores e Actrices de Galicia (AAAG) cualifica como "insatisfactorio" o Plan de Reactivación do sector cultural presentado pola Xunta hai uns días, e que tamén foi criticado por outros colectivos profesionais. A AAAG advirte da "falta de concreción de prazos e contías, da escasa claridade orzamentaria, a presentación de programas baleiros de contido" ou do "disfrace de convocatorias pendentes e habituais como propostas novas e incentivadoras".
O lehendakari apunta ao 12 ou 19 de xullo como datas máis probables para as eleccións en Euskadi. Así o manifestou na xuntanza cos partidos vascos convocada o pasado 30 de abril e celebrada esta mañá. Feijóo xa evidenciou onte a súa preferencia por volver cadrar con Íñigo Urkullu na chamada ás urnas. Esta tarde desenvólvese o encontro dos partidos galegos convocado pola Presidencia da Xunta. (Imaxe: Goberno Vasco)
O Goberno central retoma a adxudicación do enlace orbital de Santiago que anunciou no primeiro día da campaña das xerais de hai un ano. A nova conexión entre a AP-9, a autovía a Lugo e os polígonos do norte da cidade non se licitou ata xaneiro e agora retómase o proceso de avaliación de ofertas paralizado hai dous meses.
Feijóo esgrime os "expertos que ten" a Xunta na crise do coronavirus fronte a Fernando Simón. Asegura que o persoal que o asesora "non desmerecen outros expertos que aparecen por aí moitas veces nas cámaras para tentar atraer para si as responsabilidades e diminuír as responsabilidades indelegables do Goberno", dixo en referencia ao director de Emerxencias Sanitarias do Ministerio de Sanidade tras ser preguntado polos motivos que levan o Goberno galego a non organizar con asiduidade comparecencias públicas de persoal técnico sobre a covid-19. (Imaxe: Fernando Puig de la Bellacasa / Goberno de España)
Feijóo confirma o seu interese en celebrar as eleccións "canto antes" e sinala o mes de xullo a partir dos informes sanitarios que, di, manexa o Goberno galego e acaba de "remitir aos partidos políticos", cos que se reunirá mañá, segundo anunciou en rolda de prensa. O presidente da Xunta confirma que a nova fase do estado de alarma permite volver convocalas grazas á emenda introducida polo PNV. Ampliamos a información neste espazo.
O xornalista Manuel Rey analiza en GCiencia a controversia xerada na profesión veterinaria polas chanzas do programa de humor da TVG 'Malicia Notiicas' a respecto do traballo destes profesionais na crise do coronavirus: Veterinarios, zoonoses, pandemias e sentido do humor
O Goberno central procura apoios parlamentarios para aprobar unha prórroga dun mes do estado de alarma, ata as datas previstas para o remate do plan de desconfinamento. O PP xa avanzou onte a súa intención de pasar da abstención ao "non" na seguinte votación. (Imaxe: Borja Puig de la Bellacasa / Goberno de España)
O BOE fai oficial este mércores a ampliación ata o 30 de xuño dos ERTE por forza maior. O decreto acordado cos sindicatos UGT e CC.OO. e a patronal CEOE flexibiliza diversas medidas laborais que explicamos aquí.
Suspendida polo coronavirus a rapa das bestas de Sabucedo, que se ía celebrar do 3 ao 6 de xullo. A asociación organizadora prevé "unha consulta entre toda a parroquia" para valorar "a posibilidade de retomar os curros" o 15 e 16 de agosto "se a situación sanitaria o permite". Imaxe: Bruno Pardo / Asociación A Rapa das Bestas de Sabucedo
As persoas que cheguen do estranxeiro deberán gardar 14 días de corentena polo coronavirus. A medida, publicada este martes no BOE, non afecta a traballadores transfronteirizos nin transportistas e as compañías aéreas deberán facilitar a localización do seu pasaxe. Ampliamos a información neste espazo
