Luis Menor, do PP, novo presidente da Deputación de Ourense. Foi o candidato que obtivo maioría simple en virtude do pacto con Democracia Ourensana, que implicou que o partido de Jácome se votase a si mesmo. Ante a ausencia de maioría absoluta, Menor é elixido como substituto de José Manuel Baltar, que non optou á reelección.
23X | Feijóo afirma agora que se Pedro Sánchez logra maioría para volver gobernar aínda que o PP sexa primeira forza suporá "perturbar a democracia". O candidato do PP asegurouno nun mitin en Zaragoza no que volveu alimentar as teorías da fraude no voto por correo. O líder popular xa cuestionara en numerosas ocasións o sistema parlamentario vixente durante os seus anos como presidente da Xunta. A lexislación vixente implica que logra a investidura na presidencia do Goberno de España quen logre maioría absoluta do Congreso en primeira votación ou máis votos a prol ca en contra na segunda. [Imaxe: © PP]
O Festival de Ortigueira pecha este domingo a súa edición 2023 con Os Carecos, Xabier Díaz&Adufeiras de Salitre e Covagueira. Polo evento, que na última semana reuniu 200 artistas de 45 formacións distintas, pasaron máis de 100.000 persoas
Morre aos 87 anos en Pontevedra José Luis Torrado O Bruxo, masaxista, preparador físico e curandeiro que traballou como recuperador deportivo da selección española de atletismo en cinco xogos olímpicos entre 1968 e 1996. Traballou tamén coa selección española de baloncesto, con clubs coma o OAR Ferrol, o Teucro de Pontevedra e o Breogán de Lugo e atletas como Iván Raña. Foi tamén masaxista do ex-presidente da Xunta, Manuel Fraga. Adianta a información Pontevedra Viva.
A Fundación Globo de San Roque comunica que este ano non se lanzará o globo de Betanzos, considerado o globo de papel máis grande do mundo. A entidade comunica que os traballos de elaboración do aeróstato comezaron con atraso e non chegarán a tempo para o lanzamento. O globo adoita lanzarse na noite do 16 de agosto, nas festas de San Roque, unha tradición introducida a comezos do século XIX e que se consolidou a partir de 1875.
O mesmo mozo que atacou a Rajoy en 2015 agride un xornalista de La Voz de Galicia cunha arma branca na delegación do xornal en Pontevedra. O traballador está a ser tratado das feridas de o agresor Foi detido e trasladado a unidade de psiquiatría do Sergas na cidade.
O Corno, primeira longametraxe en galego que aspirará á Cuncha de Ouro no Festival de Donostia. O filme de Jaione Camborda, protagonizado por Janet Novás -na imaxe- e ambientado na Illa de Arousa en 1971, conta a historia dunha muller que asiste en partos e que "tras un horrible suceso, se ve obrigada a fuxir pola ruta do contrabando cara a Portugal". [Imaxe: © Esnatu Zinema]
O PP accede ao goberno da Comunitat Valenciana da man de Vox tras dúas lexislaturas consecutivas da esquerda. Feijóo sinala a investidura do seu candidato, Carlos Mazón, da man da extrema dereita como garantía de "moderación". Este venres, a candidata do PP en Extremadura, María Guardiola, tamén logrará o goberno grazas á extrema dereita. Na imaxe, as Corts Valencianes, agora presididas por Vox polo devandito pacto bipartito. Máis información, en infoLibre
Juan Pardo, Luz Casal e Carlos Núñez, Medallas de Galicia 2023. O Consello da Xunta vén de aprobar a concesión do galardón, que volverá entregarse na véspera do Día Nacional de Galicia, o vindeiro día 24. [Imaxes: © CRTVG e CC BY-SA Xunta]
23X | A CRTVG confirma que os participantes no seu único debate electoral polas xerais serán Miguel Tellado (PP), José Miñones (PSdeG), Néstor Rego (BNG) e Marta Lois (Sumar). Emítese mañá, venres, ás 10 da mañá na TVG, na Radio Galega e no sitio web da corporación e será redifundido pola G2 ás 22:45 h. O moderador será Luis Ojea. Na imaxe, debate electoral na CRTVG polas eleccións xerais de 2019.
