Manuel Rivas, distinguido polo Ministerio de Cultura coa Medalla de Ouro ao Mérito nas Belas Artes, un recoñecemento que neste ano recibirán 33 persoas e entidades, entre elas Karra Elejalde, Rosa Montero, María Jiménez ou Víctor Manuel. Entre os galardoados figura tamén o produtor musical ferrolán Jesús López Jerez, presidente de Universal Music Latin.
Rueda oficializa que a autovía Santiago-A Estrada xa non chegará á Estrada. O presidente presenta os plans do seu goberno para continuar en 2023 a actual AG-59 Santiago-Teo cun primeiro treito de 3,5 quilómetros e, nunha seguinte fase aínda non concretada, cun segundo treito doutros 4 quilómetros, pero renunciando a terceiro e derradeiro de 4,5 quilómetros que chegaría as proximidades da vila da Estrada.
Comadre, elixida palabra do ano 2022 no certame impulsado polo Portal das Palabras da Real Academia Galega e a Fundación Barrié. As outras candidatas eran “autoestima”, “candorca”, “ecocidio”, “inflación” e “resiliencia”. Máis información, hoxe en Praza.gal [Imaxe: © Portal das Palabras]
Feijóo non participou no 35% das votacións en pleno do Senado dende que é membro desta Cámara en representación do Parlamento de Galicia, como informa infoLibre este martes. Neste tempo formulou unicamente media decena de iniciativas -as catro que levaba en novembro e mais unha recente intervención no debate de Orzamentos (na imaxe)-, ningunha delas sobre Galicia. [Imaxe: PP]
A Comisión Europea rexeita detallar ao eurodeputado galego do PP Francisco Millán Mon o equipamento militar enviado por cada estado a Ucraína. O executivo comunitario argumenta “a sensibilidade e o nivel de clasificación da información” e ínstao “a preguntar a cada Estado membro”.
O accidente do autobús caído ao río Lérez en Pedre (Cerdedo-Cotobade) na Noiteboa sáldase con seis vítimas mortais e só dúas persoas sobreviventes, unha delas o condutor. [Imaxe: © Axega]
🎄Este 25 de decembro, Día de Nadal, Praza.gal non se actualiza por descanso do persoal. Deixámosvos aquí moito para ler e o luns estamos de volta. Boas festas!
A Xunta mantén activa a alerta por posibles "desbordamentos puntuais" en sete ríos por mor das fortes chuvias. Trátase do río Mera en Ortigueira, do Rego das Mestas en Valdoviño, o Mandeo en Aranga, o Mendo en Betanzos, o Tambre ao seu paso por Oroso e Val do Dubra -tamén neste caso o Dubra- e o Lérez en Pontevedra. Nesta ligazón pódense atopar as instrucións de seguridade do 112 para o caso de atoparse cun río desbordado. Na imaxe mapa de chuvia acumulada [© Meteogalicia] dende a pasada medianoite e ata as 11 da mañá deste 24 de decembro.
O persoal da CRTVG mobilizado coa plataforma Defende a Galega para esixir o cumprimento íntegro da lei de medios públicos chegou este 23 de decembro ao seu venres negro número 240. "Duascentas corenta semanas denunciando o desmantelamento, a manipulación e o incumprimento da lei de medios", destacan. Na imaxe, participantes nas protestas este venres, na sede central da CRTVG en Santiago.
"Ata logo, vai sobre ruedas": o cameo de Mariano Rajoy no vídeo de Nadal do PP de Galicia. A montaxe, difundida nas contas de Alfonso Rueda e do partido nas redes sociais, xoga en clave de humor coa idea do pouco coñecemento público do actual líder do partido e presidente da Xunta en comparación co seu antecesor e finaliza con Rueda, a secretaria xeral e os responsables provinciais da formación conservadora decorando unha árbore de Nadal con "desexos" recollidos por Galicia.