Fálase

La Vanguardia segue os pasos de The Guardian e tamén deixa de publicar en X. "Esta rede converteuse nunha plataforma na que atopan caixa de resonancia teorías da conspiración e desinformación", así como "ideas que atentan contra os dereitos humanos", que "adquiren viralidade e captan máis tempo dos usuarios para gañar máis cartos das insercións publicitarias", sinala o xornal catalán, que conta con máis dun millón de perfís a seguilo no antigo Twitter. A decisión, agregan, "coincide co anuncio por parte de Donald Trump" de nomear a Elon Musk, propietario de X, para codirixir un departamento orientado a "facer recortes na administración estadounidense".

• REPORTAXE | Marchar ou ficar no que foi Twitter? "X non está libre de ideoloxía, ten unha propiedade e uns intereses"

A AEMET volve informar dunha alerta vermella por fortes choivas no litoral de València, agardan máis de 180 litros por metro cadrado acumulados en 12 horas. O aviso está activo desde este mércores ás 21 horas e ata as doce do mediodía do xoves. Tamén permanece en aviso vermello a zona de Málaga ata as doce da noite deste mércores. 

The Guardian abandona X. O xornal británico axita o debate sobre a continuidade no antigo Twitter anunciando que deixa de compartir as súas publicacións na rede social propiedade de Elon Musk. "É algo que vimos considerando hai tempo" polo "contido que se promove ou atopa na plataforma, incluíndo teorías da conspiración e racismo da extrema dereita", subliñan nun contexto no que "a campaña das eleccións presidenciais estadounidenses", din, serviu para ratificar que "é unha plataforma mediática tóxica" e que o seu propietario utiliza para influír politicamente.

• REPORTAXE | Marchar ou ficar no que foi Twitter? "X non está libre de ideoloxía, ten unha propiedade e uns intereses"

O PP Europeo forza o adiamento da votación das seis vicepresidencias da Comisión Europea e os populares españois atribúense o freo no marco da súa ofensiva contra Teresa Ribera, aspirante á carteira de Transición Limpa, Xusta e Competitiva, un dos postos de maior peso do colexio de comisarios que volverá encabezar Ursula Von der Leyen. A actual vicepresidenta e ministra para a Transición Ecolóxica do Goberno de España si se somete á audiencia de confirmación ante o Parlamento Europeo este martes, segundo o previsto, pero as conclusións e votación atrasaranse, previsiblemente ata a semana vindeira. Na imaxe, un intre das sesións de confirmación na sede do Parlamento Europeo en Bruxelas. [CC BY Parlamento Europeo]

• HEMEROTECA | As tres grandes familias políticas da UE acordan o reparto de altos cargos sen os ultras
• HEMEROTECA | Un Europarlamento con maioría da dereita e mais a extrema dereita no que a esquerda aguanta

Praceiros e membros da corporación municipal de Santiago gardan un minuto de silencio como mostra de pesar pola morte violenta do comerciante Antonio Costa a pasada madrugada mentres a Policía xa detivo tres persoas ligadas co presunto homicidio. Sobre a causa pesa o segredo de sumario.  A alcaldesa compostelá, Goretti Sanmartín, transmitiu "o cariño e apoio á familia" e agarda "que se esclarezan os feitos canto antes". [Imaxe: © Concello de Santiago]

Colectivos feministas convocan mobilizacións en repulsa polo asasinato de Estela Blach en Baiona para este mércores, día 13. Relación de concentracións e manifestacións elaborada pola Marcha Mundial das Mulleres.

• Investigan como posible caso de violencia de xénero a morte dunha muller en Baiona
• HEMEROTECA | O Ministerio de Igualdade admite problemas de coordinación tras os últimos seis crimes machistas
• HEMEROTECA | Un 25N contra a 'espiral de violencia' que leva a un récord de denuncias e de chamadas ao 016 en Galicia
• HEMEROTECA | "A orde de afastamento sen pulseira non vale": a vida das 151 mulleres no seguimento por violencia machista en Galicia

Matan o propietario dun posto da Praza de Abastos de Santiago. A Policía Nacional ten aberta unha investigación sobre as circunstancias do crime, no que a vítima é o responsable do negocio cárnico Chelo Muñico, segundo informa a Radio Galega. Inicialmente transcendera que a morte se producira por arma de fogo, se ben posteriormente este extremo foi desmentido oficialmente, mentres cobra forza a hipótese da agresión cun obxecto contundente, informa El Correo Gallego. Ao lugar dos feitos desprazouse a alcaldesa da cidade, Goretti Sanmartín. [Imaxe: © Concello de Santiago]

María Salvado López, figura clave na renovación pedagóxica galega desde finais dos anos sesenta, morreu este luns en Compostela. Nacida en Budiño (O Pino) en 1950, con apenas 18 anos comezou a exercer como mestra no Freixo, no Concello de Outes, e sempre mantivo un fondo compromiso social e pedagóxico, cunha aposta pola autonomía do alumnado como fonte de coñecemento e o compromiso coas persoas menos favorecidas. Formou parte da primeira promoción de licenciados da Facultade de Pedagoxía, etapa na que entrou en contacto con Herminio Barreiro. Participou na creación da Unión de Traballadores do Ensino Galego (UTEG), e foi unhas das fundadoras do Partido Obreiro Galego (POG) en 1977, militando posteriormente en Esquerda Galega. En 1983 foi unha das promotoras de Nova Escola Galega. En 2015 participou no nacemento de Chan da Pólvora, libraría e editorial de poesía.

O Ministerio de Igualdade ratifica que o asasinato de Estela Blach en Baiona foi un caso de violencia machista. A vítima, de 36 anos, estaba incluída no sistema VioGen e sobre a súa ex-parella, ao que a Garda Civil segue buscando, rexía unha orde de afastamento.

• Investigan como posible caso de violencia de xénero a morte dunha muller en Baiona
• HEMEROTECA | O Ministerio de Igualdade admite problemas de coordinación tras os últimos seis crimes machistas
• HEMEROTECA | Un 25N contra a 'espiral de violencia' que leva a un récord de denuncias e de chamadas ao 016 en Galicia
• HEMEROTECA | "A orde de afastamento sen pulseira non vale": a vida das 151 mulleres no seguimento por violencia machista en Galicia

Silencio e dor en Baiona en recordo a Estela Blach. A veciñanza do concello de Baiona rendeu este domingo unha homenaxe á muller achada morta o pasado venres, presuntamente vítima de violencia machista. A concentración tivo lugar na Praza do Concello, que decretou tres días de loito oficial por Estela Blach, mentres continúa a busca da súa ex-parella. 

[Foto: ValmiñorTV)

• Investigan como posible caso de violencia de xénero a morte dunha muller en Baiona