Fálase

O PP Europeo forza o adiamento da votación das seis vicepresidencias da Comisión Europea e os populares españois atribúense o freo no marco da súa ofensiva contra Teresa Ribera, aspirante á carteira de Transición Limpa, Xusta e Competitiva, un dos postos de maior peso do colexio de comisarios que volverá encabezar Ursula Von der Leyen. A actual vicepresidenta e ministra para a Transición Ecolóxica do Goberno de España si se somete á audiencia de confirmación ante o Parlamento Europeo este martes, segundo o previsto, pero as conclusións e votación atrasaranse, previsiblemente ata a semana vindeira. Na imaxe, un intre das sesións de confirmación na sede do Parlamento Europeo en Bruxelas. [CC BY Parlamento Europeo]

• HEMEROTECA | As tres grandes familias políticas da UE acordan o reparto de altos cargos sen os ultras
• HEMEROTECA | Un Europarlamento con maioría da dereita e mais a extrema dereita no que a esquerda aguanta

Praceiros e membros da corporación municipal de Santiago gardan un minuto de silencio como mostra de pesar pola morte violenta do comerciante Antonio Costa a pasada madrugada mentres a Policía xa detivo tres persoas ligadas co presunto homicidio. Sobre a causa pesa o segredo de sumario.  A alcaldesa compostelá, Goretti Sanmartín, transmitiu "o cariño e apoio á familia" e agarda "que se esclarezan os feitos canto antes". [Imaxe: © Concello de Santiago]

Colectivos feministas convocan mobilizacións en repulsa polo asasinato de Estela Blach en Baiona para este mércores, día 13. Relación de concentracións e manifestacións elaborada pola Marcha Mundial das Mulleres.

• Investigan como posible caso de violencia de xénero a morte dunha muller en Baiona
• HEMEROTECA | O Ministerio de Igualdade admite problemas de coordinación tras os últimos seis crimes machistas
• HEMEROTECA | Un 25N contra a 'espiral de violencia' que leva a un récord de denuncias e de chamadas ao 016 en Galicia
• HEMEROTECA | "A orde de afastamento sen pulseira non vale": a vida das 151 mulleres no seguimento por violencia machista en Galicia

Matan o propietario dun posto da Praza de Abastos de Santiago. A Policía Nacional ten aberta unha investigación sobre as circunstancias do crime, no que a vítima é o responsable do negocio cárnico Chelo Muñico, segundo informa a Radio Galega. Inicialmente transcendera que a morte se producira por arma de fogo, se ben posteriormente este extremo foi desmentido oficialmente, mentres cobra forza a hipótese da agresión cun obxecto contundente, informa El Correo Gallego. Ao lugar dos feitos desprazouse a alcaldesa da cidade, Goretti Sanmartín. [Imaxe: © Concello de Santiago]

María Salvado López, figura clave na renovación pedagóxica galega desde finais dos anos sesenta, morreu este luns en Compostela. Nacida en Budiño (O Pino) en 1950, con apenas 18 anos comezou a exercer como mestra no Freixo, no Concello de Outes, e sempre mantivo un fondo compromiso social e pedagóxico, cunha aposta pola autonomía do alumnado como fonte de coñecemento e o compromiso coas persoas menos favorecidas. Formou parte da primeira promoción de licenciados da Facultade de Pedagoxía, etapa na que entrou en contacto con Herminio Barreiro. Participou na creación da Unión de Traballadores do Ensino Galego (UTEG), e foi unhas das fundadoras do Partido Obreiro Galego (POG) en 1977, militando posteriormente en Esquerda Galega. En 1983 foi unha das promotoras de Nova Escola Galega. En 2015 participou no nacemento de Chan da Pólvora, libraría e editorial de poesía.

O Ministerio de Igualdade ratifica que o asasinato de Estela Blach en Baiona foi un caso de violencia machista. A vítima, de 36 anos, estaba incluída no sistema VioGen e sobre a súa ex-parella, ao que a Garda Civil segue buscando, rexía unha orde de afastamento.

• Investigan como posible caso de violencia de xénero a morte dunha muller en Baiona
• HEMEROTECA | O Ministerio de Igualdade admite problemas de coordinación tras os últimos seis crimes machistas
• HEMEROTECA | Un 25N contra a 'espiral de violencia' que leva a un récord de denuncias e de chamadas ao 016 en Galicia
• HEMEROTECA | "A orde de afastamento sen pulseira non vale": a vida das 151 mulleres no seguimento por violencia machista en Galicia

Silencio e dor en Baiona en recordo a Estela Blach. A veciñanza do concello de Baiona rendeu este domingo unha homenaxe á muller achada morta o pasado venres, presuntamente vítima de violencia machista. A concentración tivo lugar na Praza do Concello, que decretou tres días de loito oficial por Estela Blach, mentres continúa a busca da súa ex-parella. 

[Foto: ValmiñorTV)

• Investigan como posible caso de violencia de xénero a morte dunha muller en Baiona

València bótase á rúa para exixir a dimisión de Carlos Mazón. Ducias de miles de valencianos, 130.000 segundo a Delegación do Goberno, ateigaron este sábado a Praza do Concello para exixir responsabilidades pola traxedia da riada do 29 de outubro. Persoas de toda a provincia chegaron á capital e reclamaron a dimisión do presidente da Generalitat ao berro de “Mazón asasino” ou “Mazón a prisión”.

[Foto: @JuventudXClima]

• Quen é máis responsable na xestión dunha crise como a de València e cales son os tres niveis de emerxencia

O BNG de Vigo reclama a remunicipalización do bus urbano para “mellorar o servizo”. A fronte nacionalista pide que non se desaproveite a “grande oportunidade” que para Vigo supón a fin da concesión de Vitrasa en xuño do vindeiro ano. Neste sentido aposta pola remunicipalización do transporte urbano, como primeiro paso para acometer unha mellora substancial do servizo.  O Bloque reitera o seu “total e rotundo apoio” ao persoal de Vitrasa, que este venres se volveu mobilizar ante a falta de avances na negociación do novo convenio colectivo.

• HEMEROTECA | Cronoloxía do conflito de Vitrasa: dous anos de protestas no transporte urbano de Vigo
• A encrucillada de Vitrasa: entre a empatía e o fastío tras 100 días de folga no bus urbano de Vigo
• O persoal de Vitrasa decide acabar coa folga, mais seguirá, como mínimo, ata o luns

O concelleiro popular Michinel dimite en Ourense farto de “soliloquios” e “ falacias”. O concelleiro do Partido Popular en Ourense  Miguel Ángel Michinel Álvarez anunciou este venres a súa dimisión despois de que o seu partido facilitase oito modificacións orzamentarias ao rexedor, Gonzalo Pérez Jácome, de Demoracia Ourensana.  Michinel asegura sentirse frustado ante o “ implacable escrutinio público” e lamenta os “interminables soliloquios, pleno tras pleno, completamente baleiros de contido, cando non repletos de falacias”, que causan “rubor e estupefacción” a un tempo.

•  CRÓNICA | O xuízo ao senador Baltar e o lonxe que queda Ourense