Fálase

O BNG de Vigo reclama a remunicipalización do bus urbano para “mellorar o servizo”. A fronte nacionalista pide que non se desaproveite a “grande oportunidade” que para Vigo supón a fin da concesión de Vitrasa en xuño do vindeiro ano. Neste sentido aposta pola remunicipalización do transporte urbano, como primeiro paso para acometer unha mellora substancial do servizo.  O Bloque reitera o seu “total e rotundo apoio” ao persoal de Vitrasa, que este venres se volveu mobilizar ante a falta de avances na negociación do novo convenio colectivo.

• HEMEROTECA | Cronoloxía do conflito de Vitrasa: dous anos de protestas no transporte urbano de Vigo
• A encrucillada de Vitrasa: entre a empatía e o fastío tras 100 días de folga no bus urbano de Vigo
• O persoal de Vitrasa decide acabar coa folga, mais seguirá, como mínimo, ata o luns

O concelleiro popular Michinel dimite en Ourense farto de “soliloquios” e “ falacias”. O concelleiro do Partido Popular en Ourense  Miguel Ángel Michinel Álvarez anunciou este venres a súa dimisión despois de que o seu partido facilitase oito modificacións orzamentarias ao rexedor, Gonzalo Pérez Jácome, de Demoracia Ourensana.  Michinel asegura sentirse frustado ante o “ implacable escrutinio público” e lamenta os “interminables soliloquios, pleno tras pleno, completamente baleiros de contido, cando non repletos de falacias”, que causan “rubor e estupefacción” a un tempo.

•  CRÓNICA | O xuízo ao senador Baltar e o lonxe que queda Ourense

O PP impón o seu plan de traballo na comisión de investigación sobre os contratos de emerxencia da Xunta na pandemia e o sobrecusto do hospital de Vigo aberta a instancias do BNG e evita que teña que comparecer Alberto Núñez Feijóo. Na imaxe, o derradeiro Consello da Xunta presidido por Feijóo antes da súa dimisión [CC BY-SA Xunta]

• AMPLIAMOS | Nin Feijóo nin a parella de Ayuso, pero si Illa e o bipartito: os 39 nomes impostos polo PP na investigación dos contratos da Xunta

Un xulgado de Madrid dá a razón ao Estado fronte os Franco e di que os bens do Pazo de Meirás son públicos. Segundo avanza elDiario.es, a sentenza desbota a pretensión da familia do ditador de quedar cos obxectos do interior do pazo logo de que tamén o edificio fose declarado público. Aquí pódese consultar o inventario de bens.

• HEMEROTECA (21/9/2022) | O Estado demanda os Franco para reclamar máis de 500 bens do Pazo de Meirás

O conselleiro de Cultura e Lingua reúnese co arcebispo de Santiago, Francisco Prieto, na serie de encontros do Goberno galego para un novo pacto pola lingua. O arcebispo, que vén amosándose defensor dunha maior normalización do galego na Igrexa, reuniuse xa hai dous días con Queremos Galego.

• ENTREVISTA (20/6/2024) | Francisco Prieto, arcebispo: "Temos que evitar a diglosia de falar galego no atrio e despois pasar ao espazo sacro e convertelo en castelán"
• BNG e PSdeG piden cambios normativos en favor do galego ante unha Xunta que se dá 15 meses para un pacto pola lingua

O alcalde de Vigo convoca tres concertos-manifestación para defender infraestruturas pendentes na cidade. O martes 26 de novembro reclamará a conexión de alta velocidade con Ourense por Cerdedo, o mércores 11 de decembro a saída sur cara a Portugal e o 3 de xaneiro a autovía en túnel Vigo-O Porriño.

• Portugal prioriza o AVE Vigo-Porto e España sitúao dous anos despois do Madrid-Lisboa

Nove bandas galegas únense á iniciativa de concertos solidarios Som València de captación de fondos para poboación afectada polas riadas. Bala, Boyanka Kostova, Grande Amore, mariagrep, Mondra, Ortiga, Sabela, The Rapants e Triángulo de Amor Bizarro actuarán o vindeiro martes 12 ás 19h na coruñesa sala Inn Club. As entradas están xa á venda e o seu importe íntegro destinarase á Fundación Horta Sud, que acumula "máis e 50 anos de actividade dedicada a promover a asociación entre persoas e fortalecer o tecido cultural e social dos municipios afectados". A iniciativa Som València nace do sector musical que se concreta en concertos por todo o Estado, cunha ducia deles xa confirmados.

• Bombeiros, submarinistas e persoal de emerxencias no continxente galego de axuda a València
• As riadas máis mortais de Europa neste século superan xa as 200 vítimas en València

O PSdeG confirma a Queremos Galego que tamén secundará a mobilización "por un cambio de rumbo" na política lingüística, o vindeiro día 17. Nunha xuntanza coa plataforma, José Ramón Gómez Besteiro subliña que "urxe articular medidas ben planificadas e ben dotadas economicamente para reverter a perda do uso do idioma propio, especialmente entre a mocidade". Queremos Galego está a xuntar apoios para o acto dende diversos eidos, entre os que inclúe os grupos parlamentarios e diversas entidades e institucións.

• Queremos Galego mobilízase ante a "emerxencia lingüística" e censura que a Xunta "bote a culpa á inmigración"

A deputada por Pontevedra Verónica Martínez Barbero, nova portavoz de Sumar no Congreso en substitución de Íñigo Errejón. A decisión foi adoptada por unanimidade do Grupo Parlamentario da coalición "no marco dun proceso que comporta a reestruturación de responsabilidades dentro do mesmo". Barbero foi presidenta do Consello Galego de Relacións Laborais dende 2017 e directora xeral de Traballo ata o pasado ano.

A sétima edición dos Premios Meninas, cos que a Delegación do Goberno en Galicia destaca o compromiso na erradicación da violencia de xénero e a loita pola igualdade, recoñece o maxistrado Fernando Lousada; a maxistrada e activista afgá Rahima Sabiri; a ONG Ecos do Sur da Coruña; a asociación Axel de Lugo, o Centro Alumar de Cáritas Diocesana de Ourense e a editora Teresa Zataraín de Pontevedra. Ademais, os galardóns conceden cinco mencións honoríficas, que destacan por exemplo á asociación Teenses pola igualdade. 

Así mesmo, en colaboración co Colexio Oficial de Xornalistas, recoñécese o papel dos medios na igualdade a través das xornalistas Susana Pedreira e Diana López, impulsoras do proxecto As mulleres que opinan son perigosas.

• ENTREVISTA | Susana Pedreira: "Un xornalismo que só ten a visión dos homes é un xornalismo torto"
• ENTREVISTA | Diana López: "Hai temas que non están no discurso público porque nos afectan máis ás mulleres"