As tres enquisas publicadas esta mañá por El País, La Vanguardia e El Español prevén unha forte suba do PP, un pequeno crecemento do PSOE, o mantemento de Unidas Podemos e VOX, con leves baixadas, e un gran descenso de Ciudadanos, de novo nun escenario sen maiorías claras.
Compromiso por Galicia celebrou o seu III Congreso, que definiu a formación como "un partido galeguista, progresista e europeísta". CxG, con Juan Carlos Piñeiro Docampo como secretario xeral, proponlles ás "forzas políticas galegas, con centro de decisión en Galicia" a conformación dunha "candidatura unitaria" ás eleccións do 10N. Ademais, anuncia que vai solicitar a súa inclusión no Partido Democrático Europeo.
O BNG proporá no debate de política xeral un “pacto galego pola ciencia e a innovación” co 3% de investimento en I+D+i. A formación celebrou este sábado unhas xornadas parlamentarias sobre "o I+D+i como motor de desenvolvemento". O Bloque propón crear o Instituto de Innovación Galego, semellante ao modelo vasco IKER e blindar por lei non penalizar ás mulleres investigadoras por ser nais. Estas eran algunhas das demandas expresadas polo persoal investigador prexudicado o pasado mes de xullo polos erros da Xunta na xestión dos contratos posdoutorais.
Manifestacións multitudinarias en ducias de cidades de todo o mundo abriron a semana de mobilizacións ante a emerxencia climática, que chegará ata o venres 27. Ese día están convocadas seis manifestacións en Galicia
Burela repetirá finalmente as eleccións locais o vindeiro 17 de outubro na mesa onde foron anuladas , segundo aprobou hoxe o Consello de Ministros. O Tribunal Superior de Xustiza de Galicia (TSXG) aceptara a reclamación da formación Burela Sempre por unha irregularidade nunha das urnas do instituto O Perdouro.
En máis de 30 cidades e vilas galegas están convocadas concentracións feministas esta noite. Esta xornada de #emerxenciafeminista ou #noite violeta lembra que "máis da metade das agresións e violacións ocorren pola noite, de madrugada, cando voltamos para a casa". "Estas rúas, compañeiras, aínda non son nosas", lembra o manifesto
Hoxe comeza en Lugo o Caudal Fest, o derradeiro festival do verán, que trae á cidade a Izal, Marea, Xoel López, Carolina Durante ou Marem Ladson
Os colectivos que organizan as Xornadas sobre Traballo Sexual da Coruña aclaran que o acto que se celebrará este venres ás 13 horas na Facultade de Dereito da UDC non é a clausura das Xornadas, senón un encontro aberto coa comunidade universitaria para expor as conclusións ás que se chegaron nas devanditas xornadas, xa finalizadas, que tiveron lugar no Centro Social A Comuna
O Concello de Pontevedra confirma a baixada do límite de velocidade a 10 quilómetros por hora para todos os vehículos nas rúas con plataforma única, ata agora limitadas a 20 km/h. O goberno local realizou o anuncio no marco da Semana Europea da Mobilidade, na que tamén avanzou a publicación do estudo Primeiro a cidade. A mobilidade en Pontevedra 1999-2019, unha publicación que recompilará o modelo urbano pontevedrés aplicado nas últimas dúas décadas.
System of a Down encabezarán o cartel do Resurrection Fest de 2020, ano no que o festival de Viveiro celebra a súa décimo quinta edición. A organización avanza que o vindeiro luns confirmarán novas bandas.
