Fálase

O conselleiro de Sanidade cesa o xerente do Sergas, José Flores, para nomealo xerente da área sanitaria de Pontevedra - O Salnés. Julio García Comesaña -na imaxe, comunicando a decisión xunto a Flores e o seu antecesor-, afirma que Flores "desempeñou un papel fundamental na xestión da pandemia da covid-19 e no funcionamento do Servizo Galego de Saúde como hospital único durante esta crise". O Consello da Xunta aproba o seu cesamento este xoves e o nomeamento como sucesora de Estrella López-Pardo, ata agora directora xeral de Planificación e Reforma Sanitaria.

• BNG e PSdeG advirten de que o "cambio de caras" na xerencia do Sergas non solucionará o "colapso" sanitario

O fume do incendio de Verín, moi próximo ás casas e no que xa arderon arredor de 260 hectáreas, obriga a cortar a estrada N-525. A actualización de Medio Rural da última hora desta tarde indica que o lume "iniciouse en máis dunha decena de focos diferentes, polo que todo apunta á súa intencionalidade”. Na imaxe, bombeiros da Brif de Laza, en Verín. [Imaxe: © Brif Laza]

• AMPLIAMOS 👉 O lume volve poñer casas en risco nun incendio con dez focos ás portas de Verín
• Os grandes incendios "incontrolables" asentan en Galicia tras anos de avisos polo influxo do cambio climático

Un incendio en Verín que segundo a Xunta comezou en tres focos pon en risco vivendas dos arredores da vila. A primeira hora da tarde deste mércores a Xunta informa doutros tres incendios aínda non extinguidos, en Maceda (150 hectáreas), Arbo (400 hectáreas) e Ponteareas (20 hectáreas). [Imaxe: @BrifLaza].

• A Xunta sinala como intencionados varios incendios de cuxa existencia non informara

O Parlamento aproba, co voto a favor do PP e en contra de BNG e PSdeG, o teito de gasto da Xunta para 2023. Será de 12.599 millóns de euros, un 8,2% máis, pero a oposición critica que a suba sexa inferior á inflación.

• A recadación coa que Feijóo acusou a Sánchez de "forrarse" implica un 24% máis de fondos para a Xunta en 2023

A visita a Taiwan de Nancy Pelosi, presidenta da Cámara de Representantes dos EUA, dispara a tensión coa China. Neste artigo de Xulio Ríos no Observatorio da Política Chinesa analízase a situación previa e as posibles repercusións. Ata o momento, o Goberno chinés xa anunciou manobras militares na zona e advertiu aos EUA de non profundar nun camiño "perigoso". Na imaxe -compartida nas súas redes sociais-, Pelosi durante a viaxe.

O Ministerio de Transportes levanta a peaxe na AP-9 e na AP-53 aos transportes especiais que non poden empregar os desvíos en Pedrafita tras a caída do viaduto da A-6 e deben dar un rodeo por Ourense. O ministerio detalla que a medida estará vixente para vehículos de máis de 26 metros de lonxitude e tres de ancho que non poden pasar polo centro de Pedrafita mentres non se remata unha obra alternativa prevista para o outono.

• HEMEROTECA | O ministerio reduce de 10 a 4 quilómetros o desvío da A-6 en Pedrafita e propón a A-8 ou a A-52 para os transportes especiais
• 🔊PODCAST | Fálase - O viaduto

A portavoz nacional do BNG, Ana Pontón, asistirá este 7 de agosto á toma de posesión de Gustavo Petro como presidente de Colombia e de Francia Márquez como vicepresidenta do que será o primeiro goberno de esquerda na historia do país. Xunto coa responsable da área internacional do Bloque e futura eurodeputada, Ana Miranda, Pontón reunirase en Colombia con "diferentes entidades e organizacións políticas" e antes visitará Chile, "en plena onda de cambio tras a chegada á presidencia de Gabriel Boric".  A intención da viaxe, sinala o BNG, é "ampliar e reforzar as súas relacións internacionais baixo unha perspectiva de colaboración e solidariedade entre os pobos, de progreso, igualdade, liberdade e avance dos dereitos das maiorías sociais". Na imaxe, Pontón nunha rolda de prensa recente.

• HEMEROTECA | "A vitoria de Petro é o triunfo dos indíxenas, os afro e os campesiños, é o triunfo da periferia en Colombia"
• HEMEROTECA | A esquerda de Boric gobernará Chile tras vencer ao aspirante da extrema dereita co 55% dos votos

O Goberno de España concede 3,6 millóns de euros á Confraría da Coruña para compensar a dragaxe da ría do Burgo. A confraría deberá repartir as axudas entre mariscadoras e mariscadores afectados pola paralización temporal da actividade desde o pasado 11 de febreiro e mentres duren os traballos. [Imaxe: CC BY-SA Xunta]

• HEMEROTECA (2016) | O Goberno central volve adiar o dragado da ría do Burgo tras anuncialo en campaña

PARO REXISTRADO | As inscricións nas oficinas de emprego descenderon en -1.082 en Galicia durante o mes de xullo (-0,77%, fronte á suba do +0,11% a nivel estatal) e quedan en 139.850, isto é, un 7,95% menos que no mesmo mes de 2021, mentres que o descenso estatal interanual é do -15,59. No mesmo mes, a afiliación media á Seguridade Social aumentou en 9.670 persoas ata chegar ás 1,06 millóns, un avance do 0,92% mensual (a media estatal cae un -0,04%) e 21.921 máis que hai un ano (+2,12% e na media estatal, +3,82%). 

• AMPLIAMOS 👉 O mercado laboral galego frea en xullo pero aínda medra e a contratación indefinida bate outro récord
• EPA | Galicia bate marcas en contratación indefinida e redución da temporalidade mentres aumenta o peso do sector servizos

Leiro (Ourense) foi o concello coa temperatura máis alta de Galicia este luns ao acadar os 42,7º. A provincia de Ourense concentra as temperaturas máximas neste inicio de agosto, pois en Arnoia chegaron aos 42,3º, en Castrelo de Miño aos 41,1º e en Vilamartín de Valdeorras e na cidade de Ourense os termómetros marcaron ata 40,6º. 

A situación de risco importante polas altas temperaturas mantense este martes a partir das 15.00 horas coa alerta laranxa na zona do Miño de Pontevedra e Ourense, así como na comarca de Valdeorras. Meteogalicia tamén mantén a alerta amarela no interior das provincias da Coruña e Pontevedra, no sur e na montaña de Lugo e Ourense. A partir do mércores haberá unha baixada das temperaturas con treboadas no interior do país.