Fálase

A Real Academia Galega dedicará o Día das Letras Galegas no ano 2021 a Xela Arias. A RAG destaca á poeta sarriá como "unha voz singular da xeración que anovou nos anos 80 a poesía galega en temas, estilo e forma", subliñando ademais "o seu labor pioneiro na tradución ao galego de clásicos universais e como editora". Xela Arias convértese na quinta muller homenaxeada no Día das Letras Galegas nos 58 anos desta celebración, despois de Rosalía de Castro (1963), Francisca Herrera Garrido (1987), María Mariño (2007) e María Victoria Moreno (2018).

• AMPLIAMOS 👉 Xela Arias protagonizará o Día das Letras Galegas no ano 2021

A Xunta limita a seis comunidades autónomas a obriga de rexistro de viaxeiros que cheguen a Galicia como medida de control do coronavirus. A modificación será publicada este mesmo martes nun DOG extraordinario e pasa a atinxir a Castilla-La Mancha, Balears, Catalunya, Comunitat Valenciana, Extremadura e Madrid. No eido internacional, Portugal segue sendo un dos Estados con obriga de rexistro. Na imaxe, un control de desprazamentos na contorna da Ponte dos Santos, en Ribadeo, nunha imaxe de arquivo.

• A Xunta permite traspasar os peches pola COVID do 23 ao 25 para encontros familiares do Nadal, pero pide non facelo

O Consello de Ministros aproba a suspensión dos desafiuzamentos e dos cortes de subministros de luz, auga e gas para persoas consideradas consumidoras vulnerables (beneficiarias do bono social e demais supostos legais) ata a fin do vixente estado de alarma polo coronavirus, que se prolonga ata o 9 de maio. Na imaxe, a sesión do Consello deste martes, á que non acudiu Pedro Sánchez por mor da corentena que debe seguir tras o seu contacto co presidente de Francia, Emmanuel Macron, que deu positivo por COVID-19. (Foto: José María Cuadrado / Goberno de España)

• Os desafiuzamentos multiplican por 15 as demandas por ocupación ilegal en Galicia no que vai de 2020

O Parlamento aproba dúas leis tras un ano sen ningunha nova  e despois de pechar a anterior lexislatura sendo a que menos leis novas rexistrou da historia da autonomía. As normas aprobadas son as de Ordenación do Territorio e a de Pesca Continental, ambas procedentes da lexislatura pasada.

• Feijóo presume de "ritmo lexislativo sen precedentes" tras o segundo período máis longo sen leis da historia da autonomía

A Audiencia Nacional investiga a venda das plantas de Alcoa na Coruña e Avilés, admitindo unha querela que acusa a compañía de poñer a empresa en mans de sociedades pantalla para evitar salvar os postos de traballo. En xullo do ano 2019 Alcoa traspasou as factorías ao fondo suizo Parter Capital, un acordo que en principio permitía a continuidade da actividade e dos empregos durante un mínimo de dous anos. Porén, en abril deste ano Parter revendeu as plantas ao Grupo Riesgo e ningún dos dous compradores realizou os investimentos previstos no plan estratéxico do acordo de venda.

• AMPLIAMOS 👉  A Audiencia Nacional investiga se a venda de Alcoa na Coruña implicou entregar a planta a empresas pantalla para destruír empregos

A Audiencia Nacional absolve os doce membros de Causa Galiza e Ceivar  que foran acusados de enaltecemento do terrorismo. Segundo a sentenza, que vén de publicarse, quedan tamén sen efecto todas as medidas cautelares impostas contra ambas organizacións. 

• AMPLIAMOS 👉 A Audiencia Nacional absolve as 12 integrantes de Causa Galiza e Ceivar e di que o independentismo merece "protección constitucional"

O 'Gordo' da Lotaría de Nadal cae no 72.897. Este número foi vendido no Grove, en Vigo e no Porriño. Nesta ligazón pódense consultar todos os números do sorteo. Na imaxe, da retransmisión de TVE, un intre do sorteo.

Sanidade confirma que se poderá entrar e saír de concellos con peches perimetrais para encontros familiares polo Nadal dende as 00:00 do día 23 de decembro e ata as 23:00 do día de Nadal, 25 de decembro. O día 28 decidirá se as normas son as mesmas para Noitevella e Aninovo. Máis información sobre as mudanzas no plan de Nadal que está a expoñer o Sergas, esta mañá en Praza.gal.

• AMPLIAMOS 👉 A Xunta permite traspasar os peches pola COVID do 23 ao 25 para encontros familiares do Nadal, pero pide non facelo

Hoxe celébrase o tradicional sorteo da Lotaría do Nadal. Nesta ligazón pódense comprobar os números premiados a medida que vaian sendo extraídos 

Rianxo pasa ao nivel máximo de restricións, que se suavizan en Muxía, Meis, Ribadumia, Cerdedo-Cotobade, Pontecaldelas e Vilaboa (pasan ao nivel básico e eliminan as limitacións de mobilidade), Moaña (pasa ao nivel medio) e Vilalba, Tui e Ponteareas (pasan ao nivel alto). A incidencia da Covid-19 en Rianxo estaba a medrar nos últimos días e xa chegaba aos 300 casos por cada 100.000 habitantes. A Xunta adoptou estas decisións despois da reunión do comité clínico, que non realizou cambios na situación das sete cidades. Este martes o Goberno galego anunciará as medidas do Plan de Nadal.

• Podes consultar aquí o nivel de restricións existente en cada concello e as medidas asociadas a el