Fálase

O Tribunal Superior de Xustiza de Madrid tomba as medidas de confinamento perimetral pola COVID-19 nesa comunidade autónoma no primeiro día das restricións idénticas en Ourense e Barbadás, adoptadas pola Xunta e que terán que ser ratificadas ou denegadas polo Tribunal Superior galego. O pasado xullo, os xulgados competentes nese momento deron o seu visto e prace aos confinamentos perimetrais na Mariña. O tribunal madrileño sostén que non é posible aplicalas apelando a unha Orde Ministerial, como sucede no caso da Comunidad de Madrid.

Hoxe comeza o confinamento perimetral de Ourense e Barbadás polo coronavirus e tamén as novas restricións en máis concellos da provincia ourensá. O DOG publicou a pasada noite a concreción das medidas

O Goberno de España presenta o seu plan para canalizar os fondos europeos de reconstrución que procurarán paliar os efectos da COVID-19. Segundo Pedro Sánchez, a intención do Executivo de PSOE e Unidas Podemos é concentrar a metade (72.000 millóns) no vindeiro trienio e asegura que aspira á creación de 800.000 postos de traballo. (Foto: Borja Puig de la Bellacasa / Goberno de España)

• HEMEROTECA | Histórico acordo na UE con 750.000 millóns para paliar a crise do coronavirus

A Xunta confina Ourense e Barbadás. Os habitantes destes municipios "non poderán desprazarse fóra deles agás por motivos laborais, educativos ou sanitarios". Ademais, prohíbense as xuntanzas de persoas non convivintes nos concellos de Barbadás, Verín e O Barco de Valdeorras, e na comarca do Carballiño, ademais de manter a mesma restrición na capital, onde xa estaban en vigor dende o pasado venres. Os casos de coronavirus nesta área sanitaria teñen unha incidencia que duplica a media galega. Ampliamos a información neste espazo

A patronal galega celebrará eleccións o vindeiro 24 de novembro logo de máis de dous anos sen elixir presidente. Así o asegura nun comunicado logo da decisión das reunións dos seus órganos directivos celebradas de xeito telemático. 

'O que arde', de Oliver Laxe, preseleccionada para competir polos Oscar de Hollywood. A Academia de las Artes y las Ciencias Cinematográficas de España inclúea na súa preselección xunto a 'El hoyo' e 'La trinchera infinita'. A decisión definitiva coñecerase o 3 de novembro.

• 'O que arde' convértese no filme en galego máis visto en salas, superando a 'Sempre Xonxa'

A Audiencia Nacional condena a 8 anos de prisión ao ex-presidente de Pescanova, Manuel Fernández de Sousa, por manipular as contas da empresa. A condena inclúe delitos de falsidade, estafa, falseamento de contas e alzamento de bens. Vén de confirmalo o Tribunal Superior de Xustiza de Galicia. Ampliamos a información neste espazo

O equipo do Instituto de Investigación Sanitaria Galicia Sur que probou con éxito o tratamento con litio para casos graves da COVID-19 lanza unha campaña de micromecenado para financiar as súas pescudas. O traballo encabezado polo neurocientífico Carlos Spuch precisa de 100.000 euros. 

• HEMEROTECA | Investigadores de Vigo proban con éxito o litio para tratar a Covid-19 en casos graves: "Diminúe a inflamación e potencia o sistema inmune"

O día 12 de outubro, ás 8 da mañá, coñeceremos os resultados da enquisa sobre a monarquía impulsada por 16 medios de comunicación, entre eles Praza.gal.

O persoal de Alcoa inicia a folga indefinida desde a mañá deste domingo e impide a saída de aluminio do complexo da Mariña tras a ruptura das negociacións para a venda da fábrica e a falta de acordo polo ERE que pretende a multinacional.