Fálase

A Xunta recupera a prohibición de reunións de persoas non conviventes de 1 a 6 da madrugada en concellos en nivel máximo ou alto e de 3 a 6, no resto de concellos. Tamén o veto aos encontros de máis de 6 persoas non conviventes en interiores ou 10 ao aire libre, ambas medidas se o TSXG as autoriza. Ademais, impón a obriga de amosar certificado de vacinación ou test negativo da COVID para acceder ao interior da hostalería en concellos en nivel máximo e alto. Toda a información, este mediodía en Praza.gal

• AMPLIAMOS 👉 A Xunta volve limitar encontros de non conviventes e pide test negativo ou vacina na hostalería de concellos con máis restricións
• MAPA INTERACTIVO | Restricións da Xunta pola COVID dende o sábado, 24 de xullo

Pilar Cancela, nova secretaria de Estado de Cooperación Internacional. Cancela, actualmente deputada do PSdeG-PSOE pola Coruña, foi directora xeral de Relacións Laborais da Xunta (2003 e 2005-2009) e tamén secretaria de organización do PSdeG e presidenta da súa xestora. Actualmente, é tamén responsable da área de Migracións da Executiva Federal do PSOE e mais do PSOE Exterior. O Consello de Ministros aprobou este martes o seu nomeamento.

Dios ke te Crew estrean tema e videoclip con Boyanka Kostova: OG’ (Orixinal Galego). O vídeo, estreado en Mondo Sonoro, é un traballo de Xaime Miranda. 

O Consello de Ministros aproba a venda en farmacias sen receita de test de autodiagnóstico para detectar a COVID-19. A portavoz do Goberno de España, Isabel Rodríguez, insistiu en que se a proba dá positivo a persoa debe acudir ao sistema sanitario para comprobar o diagnóstico.

A Audiencia da Coruña decreta que a investigación polo asasinato de Samuel Luiz continúe baixo segredo. O tribunal di que “debería prolongarse, polo menos, ata que se realicen os actos de instrución substanciais”, entre eles as declaracións no xulgado das persoas que presenciaron os feitos.

• HEMEROTECA | A xuíza envía a prisión a tres dos acusados do asasinato de Samuel por risco de fuga e destrución de probas

O Consello de Ministros aproba o inicio da tramitación da Lei de Memoria Democrática. Entre os preceptos da norma, que agora é remitida ao Congreso, figura o impulso ás exhumacións das vítimas da ditadura que continúan en foxas ou a anulación das condenas políticas do franquismo. Tamén institúe o 31 de outubro como Día das Vítimas do franquismo e o 8 de maio, a xornada dedicada á lembranza ás persoas exiliadas. Na imaxe, unha exhumación de restos de asasinados polos golpistas, na Pobra do Brollón en 2016.

• HEMEROTECA | Da anulación do xuízo a Bóveda á reparación do espolio económico franquista: os retos da Lei da Memoria Democrática

A ministra de Industria asegura, tras reunirse co conselleiro delegado de Alcoa nos EUA, Roy Harvey, que a multinacional está disposta a vender a factoría de aluminio da Mariña e a facelo "directamente a terceiros". Reyes Maroto afirma que trasladou a Harvey o pactado coa Xunta e os sindicatos e tamén que o Estado está "disposto a ofrecer as ferramentas de acompañamento públicas" para "verificar que o comprados sexa solvente". "O noso obxectivo -agrega- é que a venda se anuncie, como moi tarde, o 30 de setembro".

• HEMEROTECA | A xustiza deita luz sobre as artimañas de Alcoa para desmantelar as súas factorías en Galicia a prezo de saldo

Pablo Casado "recomenda" que "vaian vivir a Cuba" a "eses da esquerda aos que tanto lles gusta". Afirmouno nunha entrevista coa axencia de Vocento, Colpisa, que este domingo publican varios xornais do grupo ou ligados a el. Casado continúa este domingo en Galicia tras participar, na xornada do sábado, no congreso do PPdeG que reelixiu a Feijóo (na imaxe). [Foto: © PP]

• HEMEROTECA (xuño 2021) | O PP galego súmase á condena do embargo a Cuba e quere que a Xunta así o diga aos Estados Unidos
• HEMEROTECA (2018) | O PP ataca a viaxe de Pedro Sánchez a Cuba tras dúas visitas oficiais de Feijóo á illa
• HEMEROTECA (2013) | A "festa televisada" de Fraga e Fidel Castro

Este sábado foi unha xornada de calor abafante en practicamente toda Galicia agás puntos do norte, especialmente na Mariña. Meteogalicia destaca que a cidade de Ourense ou Remuíño, na Arnoia, superaron os 40 graos. Agrega tamén que dende o domingo, "as máximas irán en progresivo descenso, especialmente significativo no litoral atlántico polas brétemas costeiras".

O PP de Galicia elixe a Feijóo como presidente por quinta vez co 98,3% dos votos emitidos polos compromisarios do congreso que o partido celebra en Santiago. 

• AMPLIAMOS 👉 Feijóo, reelixido no PPdeG co 98% dos votos, di ter "ganas de máis" e de facer presidente a Casado
• CRÓNICA | O PPdeG, do "nacionalismo moderado" no inicio do fraguismo ao mandato no que Feijóo superará ao fundador