Fálase

A segunda votación ratifica de vez que Concha Pombo dirixirá os medios públicos dende xullo só cos votos do PP. O pleno do Parlamento volveu votar este martes o nomeamento da candidata dos populares á dirección xeral da CSAG -antiga CRTVG- e non obtivo a maioría cualificada de 45 votos que precisaba, polo "non" de BNG e PSdeG. Grazas á disposición introducida polo PP na nova lei, no seguinte pleno -previsiblemente, o 8 de xullo- será dabondo coa elección por maioría absoluta.

• Concha Pombo dirixirá os medios públicos dende xullo só cos votos do PP
• A UE obriga a mudar dende agosto leis dos medios públicos como a que vén de impor o PP en Galicia
• A candidata do PP á CRTVG di que con ela os informativos se consolidaron como "referencia" grazas ao rigor
• "A proposta do PP para dirixir a CRTVG é unha mensaxe demoledora, unha broma de mal gusto"

A Xunta destitúe o director do Instituto Galego de Estatística, que encabezou o organismo durante tres décadas. José Antonio Campo Andión dirixiu o IGE durante os gobernos de Fraga, de 1991 a 2005, e volveu facelo dende 2009 -tras a fin do goberno de coalición, durante o que foi asesor do PP- ata agora. A remuda do veterano cargo foi aprobada polo Consello da Xunta este luns, segundo figura no DOG deste martes, pero non foi incluída na referencia pública da reunión, presidida polo conselleiro Diego Calvo, que asina o cesamento. Chega en pleno proceso para trasladar as competencias do IGE dende a Consellería de Facenda á Presidencia da Xunta, cuestionado pola oposición e tamén na contorna da propia oficina estatística do Goberno galego. [Imaxe: CC BY-SA Xunta]

• AMPLIAMOS 👉 O cesamento do histórico director do IGE acelera a súa anexión á Presidencia da Xunta

Renfe anuncia os prezos e condicións dos novos bonos desde o 1 de xullo. Pon fin á gratuidade pero suporán un aforro do 40% respecto ás tarifas anteriores. A tarifa mensual entre A Coruña e Vigo será duns 200 euros e duns 100 se é o 'Bono Joven'. Entre Santiago e A Coruña o importe será de 90 e 45 respectivamente. O 'Bono 10' suporá aínda un maior aforro e será válido durante un ano. Consulta aquí os prezos dalgúns dos traxectos.

O conselleiro Diego Calvo ve "comprensible" que "moitas persoas" poidan "facerse plantexamentos" como a acusación de Aznar a Pedro Sánchez de ter poder para "alterar" os resultados das eleccións xerais, secundada por Feijóo. Preguntado ao respecto tras o Consello da Xunta -que presidiu en ausencia de Rueda, de visita oficial no Porto-, o titular de Presidencia cre que as afirmacións do ex-presidente "mererecían ser estudadas" porque "quedou demostrado polas escoitas" que "parece ser que as eleccións primarias" do PSOE "foron alteradas". En calquera caso, matiza Calvo, non se trata de "que concorde ou non" co dito por Aznar. [Imaxe: CC BY-SA Mónica Arcay Carro]

• HEMEROTECA (XULLO 2023) | Feijóo alimenta as teorías da fraude no voto por correo na fin do prazo para solicitalo
• HEMEROTECA (NOVEMBRO 2019) | Unha década de 'campaña sucia': dos carteis sen siglas contra o bipartito á desmobilización vía Facebook

A Cámara Municipal do Porto entrega a Rueda as chaves da cidade. O presidente da Xunta recolle de mans do alcalde portuense, Rui Moreira, este "recoñecemento colectivo" como "unha honra para todo o pobo galego, que hoxe nos sentimos acollidos nunha cidade á que nos unen tantas cousas" e reivindica a conexión por "tren rápido, moderno e eficiente" a "máis tardar, en 2030". [Imaxe: CC BY-SA David Cabezón / Xunta]

• HEMEROTECA | Rosalía fai 70 anos na Praça da Galiza do Porto
• HEMEROTECA | O que dixo (e o que non) o alcalde do Porto sobre as ligazóns ibéricas e o 'Iberolux'
• 🟪🟧🟦 EN VINTE | O Porto máis recóndito. Do mercado do Bolhao ao estuario do Douro

Feijóo volve alimentar as teorías dunha fraude no voto por correo ao preguntarlle Federico Jiménez Losantos polas declaracións a El Mundo nas que Aznar acusa sen probas a Pedro Sánchez de ter poder para "alterar" o resultado dunhas eleccións xerais. Non é a primeira vez que o ex-presidente e actual líder do PP desliza acusacións deste tipo: xa o fixera na campaña das eleccións xerais de 2023 e, previamente, contra Emilio Pérez Touriño como presidente da Xunta. Na imaxe [© PP], Feijóo e Aznar o pasado abril en València.

• HEMEROTECA (XULLO 2023) | Feijóo alimenta as teorías da fraude no voto por correo na fin do prazo para solicitalo
• HEMEROTECA (NOVEMBRO 2019) | Unha década de 'campaña sucia': dos carteis sen siglas contra o bipartito á desmobilización vía Facebook

Sánchez pacta coa OTAN gastar un 2,1% do PIB en defensa e non o 5%: "Nin máis nin menos". O Goberno de España logra que a OTAN lle dea flexibilidade abonda para non ter que subir o gasto militar á porcentaxe prevista. 

O parlamento iraniano pide o peche do estreito de Ormuz, por onde pasa o 20% do petróleo mundial dende Irán, Kuwait, Arabia Saudita e os Emiratos. A decisión debe ser ratificada polo Consello Supremo de Seguridade Nacional, entre outros órganos. 

Falece unha muller tras ser atropelada por un tren na Coruña. Resultou ferida tras caer ás vías na zona de Casabranca e morreu horas despois no hospital tras ser alcanzada por un tren de viaxeiros con destino a Monforte. 

Os Estados Unidos bombardean Irán. O exército ataca tres instalacións nucleares nas primeiras horas da madrugada, tal e como anunciou o presidente estadounidense, Donald Trump, sobre unha intervención que chega sen a aprobación previa do Congreso nin a aceptación da ONU. Irán advirte de "consecuencias eternas". Foto: © White House