O PP di que Feijóo está disposto a concorrer a unha investidura malia non ter apoios para lograla e esgrime que Sánchez ten menos "a día de hoxe". Tras unha reunión do comité de dirección do partido a súa secretaria xeral, Concepción Cuca Gamarra, acusa o PSOE de non "recoñecer" que "perdeu" as eleccións e esgrime que "os únicos países nos que non se recoñece a quen gaña son aqueles nos que as eleccións non son transparentes", di afondando no cuestionamento do sistema parlamentario que vén reiterando Feijóo. [Imaxe: © PP]
Fálase
O bloque conservador do Constitucional aproveita as vacacións para frear un recurso de Carles Puigdemont contra a orde de detención ditada polo Supremo contra el por desobediencia e malversación. A decisión da Sala de Vacacións do tribunal de garantías é adoptada por dous votos contra un e chega en plenas negociacións para a investidura tras as eleccións xerais, na que os votos de JxCat, o partido do ex-presidente catalán, son determinantes.
A galega Marta Lois será a voceira de Sumar no Congreso, segundo adiantan varios medios. A deputada pola Coruña da formación que lidera Yolanda Díaz, e ex-voceira de Compostela Aberta en Santiago, liderará a formación na Cámara Alta.
O DOG publica a lei que regula o Panteón de Galegas e Galegos Ilustres como "símbolo da identidade de Galicia". A norma entra en vigor este mércores tras un acordo unánime de todo o Parlamento e co apoio de múltiples institucións.
O ministerio renovará o asfalto da moi deteriorada N-540 Lugo-Ourense cun investimento de 12,5 millóns de euros. As protestas polo mal estado da estrada sucédense desde hai anos.
Meteogalicia activa avisos amarelos e laranxas por altas temperaturas na maior parte de Galicia para este martes, 8 de agosto, cando "as máximas estarán entre os 34 e os 40 graos", advirte. Emerxencias pon o foco especialmente nunha vintena de concellos ourensáns, aos que xa sitúa en alerta laranxa para a xornada do martes por este mesmo motivo. [Mapas: Meteogalicia]
Vox ofrece os seus votos a Feijóo se concorre á investidura e o líder do PP apláudeo como un "avance no ámbito do constitucionalismo". O ex-presidente, de vacacións en Galicia, acudiu xunto a Rueda á Festa do Albariño de Cambados e láiase de que o PSOE non o "felicitase por gañar as eleccións" xerais do pasado 23X. [Imaxe: CC BY-SA David Cabezón / Xunta]
- CRÓNICA POLÍTICA | Good Bye, Xunta
Nas fins de semana de agosto, Praza non se actualiza por descanso do persoal. Pero deixamos moito para ler e o luns xa estamos de volta.
O Celta decide "extinguir unilateralmente" o contrato de Santi Mina dúas semanas despois de que se ratificase a súa condena por abuso sexual. Mina fora apartado do equipo hai un ano tras ser condenado pola Audiencia de Almería, pero reincorporárase aos adestramentos do Celta pouco antes de que o pasado 19 de xullo o Tribunal Superior de Xustiza de Andalucía ratificase a condena a condena a catro anos de cadea e rebaixase a indemnización á vítima por danos morais de 50.000 a 25.000 euros. O futbolista aínda pode recorrer ante o Tribunal Supremo. [Imaxe: RC Celta]
O sestercio da caetra xa está no Museo Provincial de Lugo. Trátase dunha moeda "case única da que só se coñecen tres exemplares no mundo", destaca a área de Cultura da Deputación lucense. O outro exemplar cuxa localización se coñece foi achado en 2005 durante unha escavación na antiga Bracara Augusta exposto actualmente está actualmente no Museo de Arqueoloxía de Braga. O terceiro está en paradoiro descoñecido. Esta peza incorpórase á colección numismática do Museo de Lugo "como parte dun lote de sete moedas, que inclúe dúas moedas suevas e catro visigodas", explica Iria Castro, responsable de Cultura da Deputación -na imaxe-.