Fálase

Concerto solidario AMAL X GAZA para apoiar a Axencia das Nacións Unidas para os Refuxiados de Palestina en Oriente Próximo (UNRWA). Será o xoves 17 de outubro, ás 20.30h, na Sala Capitol de Santiago, no marco da programación da XXII Semana de Cinema Euroárabe Amal. Contará coas actuacións das Tanxugueiras, Boyanka Kostova, García MC e Ataque Escampe. A poeta Lúa Mosquetera será a encargada de abrir o acto e o cómico Pablo Meixe actuará como mestre de cerimonias. 

A venda de entradas xa está activa no sitio web da Sala Capitol, na tenda A Reixa de Compostela e no despacho de billetes da Capitol o propio día 17 a partir das 19.30h.

A Executiva Nacional do BNG "non avala" a moción de censura asinada en Muxía pola edil do Bloque xunto ao PP e Independentes por Muxía contra o actual alcalde do PSdeG e inicia un expediente contra a concelleira. Ao tempo, o Bloque "critica e rexeita a actitude do actual rexedor, despótica e pouco democrática, contribuíndo a xerar un clima de crispación do que é o único responsable e que en nada beneficia a boa gobernanza do concello" e lamenta que a dirección do PSdeG non "adopte ningunha medida" fronte a esas "actitudes de desprezo coas forzas da oposición".

Moción de censura en Muxía: PP (3 edís) Independentes por Muxía (2) e BNG (1) únense para remudar o alcalde Iago Toba (PSdeG, 5 edís) polo concelleiro Javier Sar, de IxM. No escrito no que a formulan, as tres formacións atribúen a decisión a unha "situación de desgoberno" tras 16 meses de mandato "nos que o actual alcalde se negou a dialogar" e que, din, derivou en "ausencia de orzamentos" ou sucesivos "ataques persoais e menosprezos". A moción de censura no concello muxián votarase o 7 de outubro. [Imaxe: Que Pasa Na Costa]

Feijóo atribúe a Pedro Sánchez un "acoso brutal contra o dereito á información e á liberdade de expresión". Nunha entrevista na Radio Galega, o ex-presidente e actual líder do PP acusa o Goberno de España de "censura, control e persecución de xornalistas, medios de comunicación e de xuíces". "Nunca ocorreu en España semellante disparate", agrega sobre as medidas anunciadas por Sánchez na materia, consistentes en boa medida en aplicar o Regulamento Europeo sobre a Liberdade dos Medios de Comunicación, cuxos aspectos centrais son de obrigado cumprimento en toda a UE a partir do vindeiro verán. A plataforma Defende a Galega sinala que Feijóo fale "tan tranquilo" de "defender o dereito á información nos medios públicos galegos". "Precisamente el!", ironizan.

• A nova lei galega de medios públicos xa figura entre os riscos para a liberdade de prensa en Europa
• HEMEROTECA | Día da Liberdade de Prensa en Galicia: das eternas materias pendentes á lei europea que vén

O Breogán gaña a Copa Galicia de baloncesto ao derrotar na final ao Basquet Coruña por 96-81. Nun partido igualado ata o derradeiro cuarto, os lucenses foron superiores e obteñen por 15ª vez o trofeo. A vindeira fin de semana comeza a Liga Endesa para os dous representantes galegos [Imaxe: Carlos Castro / CB Breogán]

Ás 14:44 horas deste domingo comeza o outono, que chegará ata o vindeiro 21 de decembro. Neste momento, o equinoccio, o día e a noite teñen aproximadamente a mesma duración. Este luns, por exemplo, o día terá unha duración de 12 horas e 8 minutos en Galicia. Imaxe: diegoperez74 (CC BY-NC-ND)

Nais e pais do CEIP Virxe da Luz de Portomarín, alumnado do centro e veciñanza da localidade concentráronse diante do albergue de peregrinos da Xunta de Galicia cortando o acceso ao mesmo durante preto dunha hora para protestar contra o "recorte de profesorado" levado a cabo no colexio. Denuncian que a pesar de ter un incremento de matrícula, a Consellería "vén de quitarlle un profesor ao centro" ao non cubrir a vacante da especialista de inglés; agrupándose o alumnado de Primaria de tres cursos: 1º, 2º e 3ª nunha clase; e 4º, 5º e 6º noutra. “Mirar polo Camiño si, pero tamén polos veciños” foi o berro máis escoitado

A Xunta anuncia que a normativa para que o Concello de Santiago teña a "habilitación legal" necesaria para aplicar unha taxa turística estará lista "a partir do 1 de xaneiro". Este marco regulatorio, que permitirá aos concellos a xestión deste tributo, terá que ser aprobado antes polo Parlamento. "O Goberno autonómico non se opón á implantación da taxa na cidade de Santiago sempre e cando resolva os problemas que o Concello asegura ter por mor da actividade turística", dixo o director de Turismo de Galicia, Xosé Merelles, nunha reunión coa alcaldesa de Santiago, Goretti Sanmartín, e a concelleira de Turismo, Míriam Louzao [na imaxe, CC-BY-SA Xunta]. 

• HEMEROTECA | A Xunta ábrese á implantación dunha taxa turística en Santiago que o PP sempre rexeitara
• HEMEROTECA | O goberno de Santiago frea as tendas de recordos para dar aire ao comercio tradicional
• HEMEROTECA | O Grove únese ao debate sobre a aplicación dunha taxa turística, que reclama para soster a prestación de servizos públicos

MeteoGalicia advirte de que a calidade do aire en Vigo é 'mala' ou 'moi mala' como consecuencia do fume que chega dos incendios que dende hai días se están a producir en Portugal. A estación de Coia rexistra niveis moi elevados de partículas PM25 e tamén as estacións de Lope de Vega e Balaídos rexistran valores elevados de partículas contaminantes, informa Europa Press. Os niveis mesmo poderían incrementarse pola tarde por mor da chegada de masas de aire procedentes de África. Nestes lugares recoméndase -especialmente ás poboacións de risco- evitar a realización de actividades no exterior.

• Un cento de incendios desbordan Portugal e provocan o caos no centro e norte do país

O Tribunal de Xustiza da Unión Europea (TXUE) non seguirá o trámite "acelerado" para abordar a cuestión sobre os eólicos que lle formulou o Tribunal Superior de Xustiza de Galicia, pero si lle dará "prioridade" pola "natureaza do asunto". O alto tribunal galego solicitou o TXUE que determine se a Xunta debeu poñer a disposición do público interesado (non só dos promotores) os informes sectoriais sobre parques eólicos para que puidese, no seu caso, formular alegacións e participar no proceso de toma de decisión sobre as autorizacións dos proxectos antes de que fosen aprobados. O auto do TXUE resolve que, "tendo en conta o asunto e a importancia das cuestións que expón", lle dará "prioridade sobre os demais". [Na imaxe, parques eólicos en montes galegos CC-BY-SA Praza Pública]

• O TSXG suspendeu xa 59 parques eólicos en 71 concellos e a Xunta critica a súa "determinación"
• HEMEROTECA | Tampouco ao sur da serra do Faro caben máis eólicos: a Xunta admite que tamén esta zona "xa ten superada a capacidade de carga"
• HEMEROTECA | "Non é moi equitativo culparnos": a defensa do TSXG ante a acusación de demorar eólicos que levan unha década en tramitación