A Xunta e o Ministerio de Agricultura acordan levantar a prohibición de plantar pataca en nove concellos que estaban afectados pola couza: Ares, Mugardos, Cabanas, Fene, Ferrol, A Capela, As Pontes, Ourol e Abadín. O Goberno galego anunciou en decembro que ía realizar a petición, despois de dous anos sen detectarse neste lugares a presenza do insecto. 25 concellos están aínda afectados pola praga.
O Supremo rexeita dar permiso a Junqueras para que tome posesión como eurodeputado. A Sala do Penal mantén na cadea o líder de ERC malia que o Parlamento Europeo o recoñece como un dos seus membros tras o fallo do Tribunal da UE que estableceu que era inmune desde a proclamación dos resultados das eleccións europeas. Ao tempo, a Sala do Contencioso do mesmo Supremo rexeitou suspender cautelarmente a decisión da Xunta Electoral Central de non darlle a credencial de eurodeputado.
O Supremo mantén a decisión da Xunta Electoral Central de inhabilitar a Junqueras e non recoñecelo como eurodeputado. O alto tribunal rexeita por unanimidade a suspensión do acordo da XEC solicitada polo líder de ERC. O Parlamento Europeo, non obstante, si o recoñeceu como un dos seus membros.
Moncloa ratifica que a galega Yolanda Díaz será ministra de Traballo e certifica o resto de departamentos que encabezará Unidas Podemos, segundo puido confirmar Praza.gal. Consulta aquí toda a información
USC, Xunta, Concello de Santiago, Ateneo e o Consello da Cultura Galega preparan unha ampla programación de actividades co gallo do bicentenario do nacemento de Concepción Arenal, que se celebrará o vindeiro 31 de xaneiro. Unha exposición, un congreso, concertos e publicacións homenaxearán a xornalista, nacida en Ferrol e que está soterrada en Vigo. "As persoas incómodas, como Concepción Arenal, acaban sendo notas ao pé nos libros de Historia, máis se son mulleres", destacaba Encarna Otero nesta entrevista
PSOE e Unidas Podemos asinan un protocolo de funcionamento interno do Goberno de coalición, que inclúe dúas comisións para solventar "as discrepancias que poidan xurdir". Podes consultar o documento íntegro nesta ligazón.
A Audiencia confirma a inhabilitación do alcalde de Cerceda durante oito anos por prevaricar, tras rexeitar o recurso de apelación interposto polo rexedor e o arquitecto técnico municipal, que foron condenados por iniciar unha obra antes de adxudicala.
Máis do 75% do persoal de Extel secunda a folga contra os "despedimentos por enfermar". O sector do telemárketing sofre xa en Galicia os despidos por baixa médica que avalou o Constitucional. A empresa con sede na Coruña foi das máis afectadas e foi baleirada por outra folga hai un mes. Foto: CIG.
Pedro Sánchez promete o cargo de presidente do Goberno central ante o rei e sobre a Constitución, pero sen crucifixo nin Biblia, elementos que en Galicia foron aparecendo e desaparecendo nos últimos anos en diversas tomas de posesión.
O Tribunal Superior declara improcedente o despido dunha dirixente de UXT no ERE que “liquidou rivais internos”. O TSXG xa ratificara que a regulación de emprego vulnerara os dereitos fundamentais da presidenta da Asociación Galega de Mariscadores (Agamar), dependente de UXT, e agora condena ao sindicato a indemnizala por despido improcedente. A causa xudicial orixinal desvelara tamén pagos en B e contratos temporais durante unha década.
