Fálase

Ana Miranda promove unha denuncia no Parlamento europeo contra os "obscenos plans" de Trump que pasan pola expulsión do pobo palestino de Gaza. A eurodeputada do BNG desenvolveu unha acción na entrada do hemiciclo de Estrasburgo na que participaron eurodeputadas e eurodeputados de tres grupos políticos: Verdes-ALE, The Left e S&D coa mensaxe "Gaza non se vende". Miranda reclama que a Unión Europea "se molle e diga algo", pois ao seu xuízo, "ten que combater esas políticas anexionistas e eses delirios que ten o presidente Trump". 

• REPORTAXE | Cooperación galega en Palestina: dignidade entre cascallos, criminalización e morte
• Israel sela un alto o fogo con Hamás tras desatar un inferno en Oriente Medio con máis de 46.000 vítimas

O único edil do PSdeG en Outes presenta unha moción de censura co PP contra o criterio do seu propio partido. A dirección provincial socialista advirte a José Antonio Caamaño coa expulsión tras aliarse co PP local contra o goberno de Compromiso por Outes e o BNG, do que o concelleiro do PSdeG formou parte ata o pasado día 4, cando decidiu abandonalo alegando a que actuaba como un "barco á deriva". A corporación da vila está formada por 6 edís do PP fronte a 4 de CxO, 2 do BNG e 1 do PSdeG, que formaron un goberno de coalición tras os comicios de 2023.

O pleno do Concello da Coruña rexeita a cuestión de confianza da alcaldesa Inés Rey, vinculada aos orzamentos. PP e BNG votan en contra pero os nacionalistas volven evidenciar que non haberá moción de censura. As contas, aprobadas en solitario polo PSOE,  aprobaranse en abril. 

• Inés Rey someterase a unha moción de confianza para aprobar os orzamentos municipais da Coruña

O TSXG suspende cautelarmente outro proxecto eólico, o de Zamorra en Agolada, polos seus posibles riscos medioambientais, tras unha denuncia de Adega. Hai máis de 60 parques en máis de 70 concellos parados polo Superior galego ante a posibilidade de que o prexuízo ambiental que provoque sexa irreparable. 

• O TSXG suspende cautelarmente outros 3 parques eólicos e xa son 62 os parados en 76 concellos

O Consello de Ministros ratifica este martes a suba do Salario Mínimo Interprofesional ata 1.184 euros mensuais con efectos retroactivos dende o pasado 1 de xaneiro, en liña co pactado polo Ministerio de Traballo cos sindicatos CCOO e UGT fronte ao rexeitamento da patronal CEOE. O incremento do SMI dende a fin do Goberno do PP de Rajoy en 2018 chega así ao 60,9%. De agora en diante, confirma o Ministerio de Facenda, o salario mínimo estará suxeito ao imposto sobre a renda, isto é, quen o perciba terá a obriga de facer a declaración o IRPF, se ben o groso da poboación que cobre o SMI seguirá sen ter que pagar por el.

Rueda amosa a "inquedanza" da Xunta ante o anuncio de Trump de aranceis ao aluminio de "todo o mundo". O presidente salienta a "importancia das exportacións da potente industria do aluminio que existe en Galicia" e espera "que ao final todo isto non sexa o que se aventura".

• HEMEROTECA | Alcoa repite táctica: ameaza de peche e demanda de axuda pública antes das eleccións 
• HEMEROTECA | Alcoa inicia o rearranque da planta na Mariña e preséntase a fondos da UE tras ameazar co peche

"Respaldo todo o que Fraga fixo por Galicia", responde Rueda á pregunta sobre se reivindica a traxectoria "completa" de Manuel Fraga. O presidente foi cuestionado sobre a retirada en Cariño do nome dunha rúa dedicada a Fraga como dirixente da ditadura. Segundo Rueda, que considera "inxusta" a abstención do PP local, Fraga "forma parte da historia de Galicia, cos seus fallos, todas as persoas os teñen, pero a parte positiva é inmensa".

• O Concello de Cariño, gobernado polo PP, retira o nome de Manuel Fraga a unha rúa

Palestra sobre 'Mulleres, violencia e igualdade nas artes' e monólogo de Pamela Palenciano, este venres, en Chantada. Da man da asociación Polamiúda, a recoñecida comunicadora feminista representará o día 14 de febrero ‘No solo duelen los golpes’ para os IES de Chantada e Monforte pola mañá e pola tarde participará nunha palestra aberta ao público ás 20.00 h no Auditorio de Chantada. 

• HEMEROTECA | A asociación Polamiúda de Chantada crea o festival Polas Bravas para gozar da arte "feita por mulleres bravas"
• HEMEROTECA |  Artes feministas Polas Bravas en Chantada

O Ministerio de Traballo e os sindicatos CCOO e UGT asinan o acordo para a suba do SMI ata os 1.184 euros mensuais. O incremento do salario mínimo do 4,4% foi pactado hai dúas semanas na mesa do diálogo social sen a achega da patronal, que se mantivo fóra do pacto. 

Trump anuncia aranceis do 25% ao aluminio de "todo o mundo" en plena incerteza na Mariña polo futuro da factoría de Alcoa e pouco despois de que a compañía estadounidense asinase cos gobernos galego e español un acordo presentado como vía para manter a produción.

• HEMEROTECA | Trump desprega a súa axenda ultra dende o inicio: "Perforar e perforar", leis tránsfobas e blindar as fronteiras
• HEMEROTECA (2024) | Alcoa inicia o rearranque da planta na Mariña e preséntase a fondos da UE tras ameazar co peche