Fálase

A circulación dos trens á altura de Vilarmartín de Valdeorras permanece cortada polo accidente dun tren de mercadorías que levaba material perigoso. Segundo informa Adif a Europa Press, prevé recuperar a circulación no tramo Ponferrada-Monforte de Lemos entre Vilamartín de Valdeorras e A Rúa-Petín na mañá deste venres. Mentres tanto, as viaxes que pasan por este punto realízanse en parte por autobús para salvar o tramo das vías afectado, do que xa foron retirados os vagóns. [Imaxe das vías do tren en Monforte CC-BY-SA Praza Pública]

Unha placa lembra desde este mércores o lugar no que naceu o Celta, na agora biblioteca Juan Compañel, coa fusión hai cen anos do Sporting Club e o Fortuna. Ao malestar de parte da afección polos actos organizados polo centenario engádense agora críticas por diversas incorreccións lingüísticas.

O descarrilamento dun tren de mercadorías perigosas derrama argón líquido á altura de Vilarmartín de Valdeorras e fai que a Xunta active o plan de Protección Civil para este tipo de accidentes. "Os medios e recursos da zona fan fronte á situación, con ferramentas para a contención e control do derrame sen riscos", segundo informa o Goberno galego. Adif traslada que permanece interrompida a circulación de trens no tramo Ponferrada-Monforte de Lemos entre Vilamartín de Valdeorras e A Rúa-Petín. Tanto Protección Civil como os bombeiros e o GES de Valdeorras participan na retirada deste material que se emprega na fabricación de metais. [Na imaxe, trens de mercadorías na estacion de Monforte Dominio Público Google Street View]

A Xunta reforza a vixilancia polo mosquito tigre nos concellos de Vigo, Cangas e Moaña e amplíaa aos de Bueu e Vilaboa. O comité técnico creado tras a confirmación da presenza destes insectos no país decidiu convocar os técnicos dos municipios implicados a unha formación específica na Xefatura Territorial de Sanidade de Pontevedra, na que participarán expertos en sanidade ambiental, epidemioloxía e entomoloxía o vindeiro xoves 31 de agosto. [Imaxe incluída no proxecto 'Mosquito alert' CC-BY J.L. Ordóñez]

• A primeira detección do 'mosquito tigre' en Galicia activa os protocolos de prevención das doenzas que transmite

A investidura de Feijóo, para a que aínda non ten apoios, será os días 26 e 27 de setembro. As datas elixidas pola presidenta do Congreso permiten evitar unha repetición electoral no Nadal no caso de que a investidura de Feijóo fracase e el ou Pedro Sánchez non sexan quen de lograla nos dous meses seguintes. En caso de superarse ese prazo constitucional sen unha investidura, a repetición electoral sería o 14 de xaneiro.

O Celta celebra este mércores o seu centenario, froito da fusión en 1923 do Vigo Sporting e o Fortuna, con dous actos restrinxidos. O club, agora baixo a figura dunha sociedade anónima deportiva controlada polo empresario Carlos Mouriño, lembrará a fusión na biblioteca Juan Compañel, edificio no que se asinou hai cen anos, e na súa nova cidade deportiva en Mos, iniciada de xeito ilegal. O venres o estadio de Balaídos acollerá máis celebracións coincidindo cun partido contra o Real Madrid e o mércores da próxima semana celebrarase un partido de lendas do club. [Imaxe: RC Celta SAD]

As dúas candorcas avistadas este domingo na ría de Arousa, xa identificadas, non foron nunca observadas interaccionando con barcos. A Coordinadora para o Estudo dos Mamíferos Mariños (CEMMA) informa de que o grupo internacional de investigación da candorca atlántica identificou os exemplares como Gael e Prior, de 10 e 6 anos, e non formarían parte das candorcas denominadas como Gladis, as relacionadas con interaccións con embarcacións. [Imaxe: Pablo Covelo/CEMMA]

• HEMEROTECA | As candorcas regresan á costa galega. Que facer ante unha interacción cun veleiro?

Lontreira, o trío galego formado por Rotce, Adri Coyote e Iván Barral, está na lista das 100 cancións favoritas para Eurovisión 2024 da enquisa 'La Elección Interna' do colectivo Eurovisión-Spain, a mesma que situou as Tanxugueiras como favoritas para participar no festival europeo. A banda xa está a preparar un tema "por suposto cantado en galego" para presentarse á preselección do Benidorm Fest. 

• EN VINTE | Lontreira. Vivir entre dous mundos

A Xunta eleva a laranxa a alerta por altas temperaturas para este martes e mércores no val do Miño, onde haberá máximas de ata 40 graos. O nivel amarelo esténdese por gran parte do resto de Galicia.

• HEMEROTECA | A crise climática xa está aquí: 300 días de temperaturas anormalmente altas en 2022
• Unha ducia de lugares nos que pasar unha vaga de calor

Desde este luns e ata o 29 de agosto o servizo ferroviario entre Ourense e Santiago está suspendido e os pasaxeiros serán trasladados en autobús pola activación do sistema de seguridade ERTMS.

• Adif tarda unha década en completar a seguridade na curva de Angrois, na que o accidente xa non se podía repetir
• HEMEROTECA | Por que non é (tan) importante (agora) a ampliación do ERTMS ata a curva de Angrois?