David Lombao

No marco do seu primeiro encontro tras as primarias, Formoso considerou "correcto" que Caballero continúe como voceiro parlamentario do PSdeG ata o Congreso Nacional que o partido celebra en decembro, onde o novo secretario xeral configurará o seu equipo

Os incrementos de casos novos rexistrados nos últimos días concéntranse en focos locais e os concellos con dez ou máis casos novos nos últimos 7 días son apenas media ducia mentres as persoas ingresadas con test positivo da COVID seguen roldando a trintena. O peso da incidencia acumulada segue sendo cada vez máis relativo ao estar vacinado practicamente o 85% da poboación

O PP accedeu a que o Parlamento, como propuña o BNG, homenaxee as vítimas da ditadura en xeral e a Bóveda en particular, pero rexeita institucionalizar o Día da Galiza Mártir malia ser unha data que xa conmemoran algunhas institucións gobernadas polos populares

A tese política que o Bloque abordará na súa asemblea nacional sinala que, tras "moitos anos de oposición" coa "imprescindíbel denuncia e a resistencia ás agresións que sofre Galiza" como "eixo central", o "novo escenario" como "alternativa ao goberno do PP" demanda "respostas novas". En clave organizativa, os textos  incorporan un protocolo para abordar posibles casos de violencias machistas no seo da formación e mais a supresión do artigo que fixaba un límite de "tres mandatos consecutivos na mesma función" tanto orgánica como institucional

O banqueiro hispano-venezolano desembarcou en Galicia a través do Banesco; primeiro coa compra do Etcheverría e despois ao gañar a poxa por Novagalicia Banco, entidade resultante do rescate público de Novacaixagalicia. Os beneficios e expansión de Abanca cadran no tempo coas protestas pola redución de servizos da entidade nalgúns lugares e tamén co incremento da influencia de Escotet na economía e na actividade sociopolítica e empresarial de Galicia

Malia á celebración de múltiples actos masivos e ao levantamento de limitacións, só cinco concellos rexistraron dez ou máis casos novos da COVID nos últimos sete días. Tras lixeiros ascensos, a incidencia a 14 días rolda os 19 casos novos por cada cen mil habitantes e as persoas ingresadas con test positivo da COVID roldan a trintena

Os 1,56 millóns de turismos que estaban inscritos en Galicia en 2019 eran un 40% máis que vinte anos antes, pero tamén un 7% máis que no anterior máximo, antes da crise financeira internacional de 2008. Os concellos con máis vehículos por habitante concéntranse sobre todo no interior e neles conflúen outras variables como o avellentamento da poboación ou a maior dificultade para o acceso ao transporte público

A portavoz nacional do Bloque sinala que a súa "reflexión" respondeu a que cómpre "fuxir dos camiños trillados, aínda que sexa a opción máis cómoda" para chegar a 2024 en condicións de "conseguir a presidencia da Xunta"

Só cinco concellos galegos rexistraron 10 ou máis casos da COVID en sete días; nas últimas dúas semanas foron apenas nove. Malia o levantamento do groso das restricións, as taxas de incidencia acumulada a 7 e 14 días seguen sendo as máis baixas e estables dende que hai datos comparables alén de alteracións puntuais e as persoas hospitalizadas con test positivo do virus roldan a vintena

Impulsado polas medidas ligadas ao Xacobeo e á pandemia, o orzamento de Turismo sobe un 10% en 2022 fronte ao 5% que ascenderá Cultura, consolidando a primacía das partidas da área turística sobre as da cultural. Boa parte do incremento do orzamento turístico son fondos para o Xacobeo, a promoción turística a través dos concellos e achegas a empresas do sector dentro do "plan de choque" pola COVID

O estudo divulgado pola propia rede social admite que, na maioría dos Estados analizados, as mensaxes de opcións políticas de dereita son máis "amplificadas". Cando a páxina de inicio de Twitter está rexida polo algoritmo, os tweets do PP son amosados "a unha audiencia tres veces maior que a que acadan nas liñas de tempo cronolóxicas"

A maioría das conmemoracións polo 40º aniversario do Estatuto e das primeiras eleccións consisten en sinxelos actos institucionais con xuristas ou algúns cargos da época, a maioría en horario de mañá, entre semana e en recintos pechados ao público xeral. Está a haber escasísimo oco para analizar os conflitos políticos e sociais da época e aínda menos para popularizar a conmemoración entre a sociedade