Cultura

A emoción na arquitectura de César Portela salpica recunchos por todo o mundo en grandes proxectos como o Museo do Mar de Vigo ou a premiada estación de autobuses de Córdoba mais tamén, e sobre todo, nos pequenos, nas menos coñecidas pero moi amadas casas unifamiliares que Portela denomina “as miñas casas”. Di César Portela (Pontevedra, 1937) que as obras máis queridas son seguramente ás que lle ofreceron máis problemas e desafíos que tivo que solucionar. Con esa filosofía recoñece que seguramente a rehabilitación do Teatro-Cine Fraga de Vigo será das súas obras preferidas, porque problemas houbo abondo. 

Llerena Perozo Porteiro constrúe na súa segunda novela, Os anos tranquilos (Xerais), a historia de vida de María García, que atravesa o século XX sendo testemuña de grandes fitos históricos que ocorren no mundo, e que aporta a súa ollada crítica sobre todo iso. "Xa conseguimos colocar as mulleres nos libros de texto, as que teñen relevancia para isto, pero a ficción, cando fala de persoas anónimas e humildes, só fala dos homes", conta a autora, que recupera o legado das súas avoas e avós para este libro

O Diario Oficial de Galicia publicou este xoves o inicio dos trámites para declarar o Xogo dos Birlos de Galicia como Ben de Interese Cultural na categoría de patrimonio inmaterial. Destácase que a súa práctica "ten unha clara compoñente identitaria" e configúrase como "unha manifestación inmaterial sobranceira"

Durante varias xeracións mantívose en Arxentina un estereotipo negativo, aplicado aos galegos, que eran vistos como persoas brutas, pouco formadas, sucias, aínda que -iso si- traballadoras e honradas. En Os inmigrantes imaxinados. A identidade Galega na Arxentina (1780-1960), publicado por Galaxia, Xosé Manuel Núñez Seixas explora as orixes e evolución desta imaxe negativa e, ademais, a conformación da identidade da colectividade galega no país.

Unha "paréntese" de escritores e escritores con música; Sumrrá con Niño de Elche, a tradición oral recollida por Dorothé Schubart revisitada ou o décimo aniversario de Chicharrón, protagonistas no novo ciclo da área de Cultura da Deputación coruñesa

O pasado ano publicouse o videoxogo Tintin Reporter: Os Xarutos do Faraón, realizado por Pendulo Studios, que agora conta coa súa versión galega grazas á tradución levada a cabo por Paula Regueiro e Lois Agrelo coa revisión de Ana Doval

Un total de 14 espazos e máis de 25 artistas compartirán o seu traballo e modo de crear do 25 ao 27 de outubro na I Edición de Estudios Abertos Ourense 

O debate sobre as orixes de Cristóbal Colón cobrou máxima actualidade tras a emisión do documental Colón ADN, criticado pola falta de rigor e metodoloxía científica. Unha das teorías que afirma que a familia do navegante era galega, enunciada por Celso García de la Riega en 1898, baséase en documentación medieval que fora acusada de ser falsa. Porén, o traballo da empresa compostelá dehistoria proba a veracidade das escrituras. Isto, iso si, só amosa que había persoas con ese apelido na cidade, sen existir máis que probas circunstanciais da relación de Colón con Galicia.

Chus Pato, Nomes e Voces, Jaione Camborda, a Feira do Queixo de Friol ou o Café Derby 21, entre as persoas e proxectos distinguidos nuns galardóns que homenaxearon o pintor Antón Pulido no seu 80 aniversario

Eduardo Rodríguez Cunha, Tatán, recibe o premio de honra do Festival Internacional de Títeres Galicreques, organizado pola Asociación Cultural Barriga Verde. "Os títeres antigamente eran máis críticos co poder", sinala Tatán, quen considera que agora existe "unha especie de autocensura que provoca que algúns temas parezan intocables"