Fálase

Dolores Fernández Galiño, reelixida como Valedora do Pobo cos votos a prol de PP e BNG e a abstención do PSdeG. O Bloque proporá o nome da persoa que exerza como adxunto ou adxunta. Galiño exerce como Valedora do Pobo dende 2019 e a súa reelección foi activada tras manter o PP vacante o cargo durante 16 meses. É a primeira titular do alto comisionado que non dimite en dúas décadas. Na imaxe, a Valedora durante o pleno que esta mañá ratificou a súa reelección [© Parlamento de Galicia]

• HEMEROTECA | O PP quere que siga a actual Valedora do Pobo e ofrece ao BNG propoñer o cargo adxunto
• HEMEROTECA | Vacante o cargo da Valedora, primeira que non dimite en dúas décadas
• HEMEROTECA | Eivas en dependencia, listas de espera e falta de pediatras encabezan o récord de queixas á Valedora
• HEMEROTECA | A Xunta retira á Valedora o control da Lei de Transparencia

Rueda rexeita valorar que o PP tirase en Aragón do influencer ultra Vito Quiles, candidato de Se Acabó la Fiesta, e pide esperar a "cando chegue o momento en Galicia" para coñecer o que fará el para "conectar mellor coas persoas ás que lle pedimos a confianza".

Ana Pontón, ao fío das "candidaturas que se poidan facer no ámbito da esquerda estatal": "Imos seguir concorrendo coas nosas siglas para mellorar a posición de Galiza a través do BNG". Preguntada por eventuais movementos a partir dun acto conxunto de Gabriel Rufián (ERC) e Emilio Delgado (Más Madrid), a portavoz nacional do Bloque afirma que "respecta" os "procesos que teñan outras forzas", pero "o Bloque móvese noutra clave" nun momento político que, coida, evidencia o "necesario que é reforzar o BNG" no Congreso nas próximas eleccións xerais.

Folga de trens en todo o Estado ata o mércores, cando podería coincidir con folga de buses na provincia da Coruña. A folga ferroviaria foi instada polos maquinistas tras os accidentes de Andalucía e Catalunya e sumáronse outros sindicatos. A folga indefinida de buses na provincia da Coruña está suspendida á espera de negociacións, pero se estas non avanzan antes o paro retomaríase este mércores.

• HEMEROTECA | O Semaf convoca folga os días 9, 10 e 11 de febreiro tras a morte doutro maquinista en Barcelona
• HEMEROTECA | Décima xornada de folga nos buses da Coruña á espera de que a mediación a free antes dos paros dos trens

Vitoria esmagadora do socialista António José Seguro na segunda volta das eleccións presidenciais de Portugal fronte ao ultradereitista André Ventura. As sondaxes e o xa avanzado escrutinio sitúan a Seguro por riba do 65% dos votos. Foto: PS

• AMPLIAMOS 👉 O socialista Seguro, novo presidente de Portugal coa ultradereita no 33% dos votos

Ampla maioría absoluta das dereitas en Aragón polo ascenso de Vox. Con case o 80% escrutado o xa gobernante PP mantén a primeira posición pero o empeora os seus resultados ao perder dous escanos, ficando en 26, e algo máis dun punto. Pero a extrema dereita, terceira forza, duplica representación (14) cun medre superior aos seis puntos. O PSOE sobre un forte retroceso ao caer 5 escanos (18) e case 5 puntos, case o mesmo os que ascende a Chunta Aragonesista, que pasa de 3 a 6 representantes.

• AMPLIAMOS 👉 O plan de Feijóo propicia a suba de Vox nunha ampla absoluta das dereitas en Aragón

Derrúbase parte da Muralla de Lugo a causa do temporal. Segundo informa El Progreso, sucedeu arredor das 23.30 horas do sábado e afectou a entre seis e sete metros da cara interna do monumento romano, á altura da rúa do Moucho, entre as portas de Santiago e do Carme. Hai 24 anos que non se produce un derrubamento así na muralla. [📸 Vista da Muralla de Lugo a uns metros de onde sucedeu CC-BY-SA Praza.gal]

• AMPLIAMOS | As fortes choivas derruban unha parte do lenzo interior da Muralla de Lugo 

Vigo recupera a conexión ferroviaria tras tres días cortada. Renfe informa de que os trens de Media Distancia que circulan entre A Coruña, Santiago e Vigo Urzaiz xa circulan con normalidade, así como os trens de Alta Velocidade. Así mesmo, os trens Rexionais entre Vigo-Guixar, Santiago e A Coruña tamén volven funcionar porque Renfe sinala que emplearán a vía de alta velocidade entre Vilagarcía de Arousa e Santiago de Compostela. A compañía estableceu un plan de transporte alternativo para viaxeiros con orixe ou destino Padrón, Pontecesures, Catoira e Osebe. [na imaxe © Adif].

Os Premios Youtubeiras+ xa teñen gañadoras e gañadores para a súa novena edición:

• Premio á Mellor Canle: Rodri Míguez 
• Premio á Creación de Contidos: Konachadas
• Premio ao Mellor Podcast: Fóra de mapa
• Premio á Calidade Lingüística: @patriiotero
• Premio Revelación: O búnker debuxos
• Premio Rede: ChutenMeme
• Premio do Público: ‘Cada historia, unha vida. 25N no CEIP de Tarrío’, de Xurxo Varela 
   

🟪🟧🟦 EN VINTE 🟪🟧🟦 Contas que deberías seguir Series web ilustradas, arquitectura e fútbol feminino, na final dos Premios Revelación de Youtubeiras+

Segue en directo a gala de entrega dos premios Youtubeiras+ dende o Teatro Jofre de Ferrol, a partir das 19 horas. Nesta novena edición houbo un récord de participación e un total de 28 finalistas. Leila Fernández (que forma parte da canle O faiado pódcast) e Carlos Vieito (integrante do proxecto Exército Mekemeke) conducirán o certame. 

• 28 finalistas para a novena edición dos Premios Youtubeiras, con récord de participación