O pleno da Deputación de Pontevedra aprobará este venres a restitución definitiva dos cadros (un díptico Mater Dolorosa e Ecce Homo) espoliados polos nazis en Polonia e que se atopan no Museo de Pontevedra. O proceso, iniciado no momento en que se tivo coñecemento da orixe dos cadros, demorouse máis do previsto ante a reclamación da obra non só por parte do Goberno polaco senón tamén pola familia que se considera propietaria lexítima.
A Coruña será a sede da cimeira hispano-alemá na que se reunirán Pedro Sánchez e o chanceler Olaf Scholz os vindeiros 5 e 6 de outubro. Así o confirmou o delegado do Goberno de España en Galicia, José Miñones, quen asegura que o Executivo leva "meses traballando no evento e ratificou a súa celebración" xunto na recente xuntanza de ambos mandatarios en Alemaña (na imaxe). En 2014 Galicia xa acollera outra cimeira hispano-alemá, daquela en Santiago e con Rajoy e Merkel como presidente e chanceler. [Foto: © Pool Moncloa/Borja Puig de la Bellacasa]
O Parlamento retira os separadores entre escanos instalados durante a pandemia para tentar minimizar o risco de contaxio da COVID no hemiciclo. Faino, explican dende o lexislativo, pola "mellora da situación epidemiolóxica". [Imaxe: © Parlamento de Galicia]
A Xustiza cita a Santi Mina para decidir se ingresa en prisión por aumentar o risco de fuga tras fichar por un equipo de Arabia Saudita.
O PSdeG confirma que Xosé Sánchez Bugallo volverá ser candidato á alcaldía de Santiago en 2023. O secretario xeral do partido, Valentín González Formoso, ratifica que o actual rexedor compostelán recuncará como cartel electoral e augura que "pasará á historia coma o mellor alcalde desta cidade". Bugallo, que xa gobernara a capital galega entre 1998 e 2011, volveu á alcaldía compostelá tras as eleccións do pasado 2019. [Imaxe: CC BY-NC-SA PSdeG]
Ana Miranda (BNG) volve ser eurodeputada. Recolleu este luns a acta que a acredita como membro do Parlamento Europeo en substitución de Pernando Barrena (EH-Bildu), en cumprimento do pacto da coalición Agora Repúblicas, coa que o Bloque concorreu ás eleccións de 2019. Miranda e a portavoz nacional do BNG, Ana Pontón, presentan este martes en Bruxelas as prioridades da formación soberanista na Eurocámara. Na imaxe, Ana Miranda no seu escano no Parlamento Europeo en Estrasburgo, durante a anterior etapa como deputada.
Elizabeth Liz Truss será a nova primeira ministra do Reino Unido tras vencer a Rishi Sunak na votación definitiva polo liderado do Partido Conservador para substituír a Boris Johnson co 57% dos votos (81.326 fronte a 60.399, informa a BBC). Truss exerceu ata agora como ministra de Exteriores e de Igualdade e é considerada unha admiradora do labor político de Margaret Thatcher [Imaxe: © Goberno do Reino Unido]
María Alonso Seisdedos gaña o Premio Plácido Castro de Tradución. A obra premiada na vixésima edición do certame foi a súa tradución do catalán da obra Canto jo i la muntanya balla/Canto eu e a montaña baila, de Irene Solá. En 2014 María Alonso Seisdedos obtivo o Premio Nacional á mellor tradución e tamén o Premio Xela Arias.
O electorado chileno rexeita cun 62% dos votos a proposta de nova Constitución, que estaba chamada a substituír a da ditadura de Pinochet. O presidente do país, Gabriel Boric, anuncia a súa intención de dar "continuidade ao proceso constituínte", agora cunha maior participación dos partidos e do Congreso.
O Barbeira Season Fest de Baiona cancela a xornada deste domingo pola previsión de fortes refachos de vento e ante a "ameaza da posible entrada do a Galicia do furacán Danielle".
