Fálase

12X | A Xunta Electoral de Galicia resolve que "non lle corresponde pronunciarse sobre a suspensión das eleccións na Mariña Lucense" por mor do brote do coronavirus. "Mentres as actividades administrativas, económicas e sociais se desenvolvan con normalidade (...) non entende afectadas as condicións do proceso electoral, a salvo do que poida acordarse, se é o caso, polas autoridades sanitarias", indica en resposta a unha consulta formulada por Marea Galeguista. Consulta a resolución íntegra nesta ligazón e amplía información neste espazo.

A Audiencia Nacional aproba a extradición a México de Emilio Lozoya, o ex-director de Pemex que apadriñou os acordos da petroleira coa Xunta. Lozoya, acusado de diversos delitos vinculados á corrupción, foi detido en Andalucía o pasado febreiro e a pasada semana accedeu a ser entregado ás autoridades do seu país tras un pacto coa Fiscalía mexicana para colaborar nas pescudas. Entre os asuntos polos que é investigado figura a compra do estaleiro vigués Barreras.

• A entrega a México do ex-xefe de Pemex irrompe na campaña galega e toda a esquerda pide explicacións a Feijóo

O Goberno de Asturias pide ás áreas sanitarias lindeiras con Galicia "extremar a vixilancia" a causa do brote de coronavirus da Mariña para "frear unha posible transmisión comunitaria" por mor da "mobilidade coa zona confinada" de diversos concellos asturianos. A pasada semana un dos casos da Mariña, o dunha muller de Asturias que reside e traballa nun municipio mariñao, foi detectado polo servizo sanitario asturiano. Na imaxe, do Goberno de Asturias, o presidente do Principado, Adrián Barbón, co seu conselleiro de Saúde.

12X | Gonzalo Caballero anuncia a suspensión dos mitins de campaña do PSdeG en toda a provincia de Lugo polo brote de coronavirus na Mariña. O partido si continuará con "paseos e comparecencias" previos ao 12X. Na comarca mariñá xa suspenderon todos os actos electorais os propios socialistas, o BNG e Galicia en Común, mentres o PP sinala que indicou aos seus candidatos que extremen as medidas de hixiene para evitar contaxios.

Sanidade pecha os accesos á Mariña para evitar a expansión do brote de coronavirus, que xa afecta a máis de 100 persoas. A medida entrará en vigor na medianoite deste domingo e aplicarase, cando menos, durante cinco días. Ademais, a capacidade de comercios e outros espazos volverá ser limitada

Núñez Feijóo afirmou este sábado que "apoiaría" unha "intervención temporal" de Alcoa mentres non se peche unha tarifa enerxética que faga viable a factoría. Con todo, o presidente da Xunta volveu afirmar que solución é competencia do Goberno central: "este non é un problema industrial, este é un problema enerxético”

A Generalitat de Catalunya ordena o confinamento de 210.000 persoas na comarca do Segrià, da que Lleida é capital. Na zona rexistráronse varios brotes nos últimos días e detectáronse 351 diagnósticos de coronavirus na última semana, con 23 ingresos hospitalarios.

Investigal publica un novo vídeo, no que reivindica "por que debemos apostar pola investigación" e demanda máis investimento en I+D+i en Galicia. 

• O persoal investigador pon deberes aos partidos e sinala a falta de políticas de I+D+i na última década

O Goberno central avanza a estratexia xurídica para recuperar o Pazo de Meirás ante o xuízo que comeza o vindeiro luns na Coruña. O avogado do Estado en Galicia, Javier Suárez, aclara que buscará demostrar que a compra do inmoble por Franco foi "simulada e fraudulenta" e que conta cun "documento clave que demostra que falseou o título co que inscribiu as Torres ao seu nome". 

12X | Gonzalo Caballero (PSdeG), Ana Pontón (BNG) e Antón Gómez-Reino (Galicia en Común) volven compartir debate este venres. Ao encontro, organizado pola Cadena SER, non acudirá Feijóo, senón que o PP estará representado polo seu voceiro parlamentario, Pedro Puy. O líder dos populares tamén fora substituído por Puy hai catro anos no debate organizado por este mesmo medio de comunicación.