Fálase de Desconvocado o p...

Ir ao máis recente

martes 19, abril 2022 ás 13:42 Miguel Pardo @depunteirolo
Desconvocado o paro parcial previsto para este mércores na CRTVG para esixir a estabilización do emprego temporal. O comité intercentros toma a decisión para someter a referendo do persoal o último acordo alcanzado coa dirección, que inclúe a convocatoria de 269 prazas, 254 por concurso de méritos e 15 por concurso oposición, ademais do compromiso de "procurar solucións para a continuidade laboral" das persoas que puidesen ser cesadas. De aprobarse a proposta, quedarían tamén desconvocado o paro de media xornada odo 27 de abril e as folgas de xornada completa do 1 e 2 de maio.
- REPORTAXE | O abuso da temporalidade na CRTVG ergue o persoal: cesións ilegais, fraude e 200 sentenzas en contra
martes 19, abril 2022 ás 9:08 David Lombao @davidlombao
Persoal da CRTVG continúa este mércores as mobilizacións para evitar 40 despedimentos e esixir que se consolide o emprego temporal. Se a corporación pública non dá unha "resposta satisfactoria", sinalan, as mobilizacións inclúen paros de media xornada o 20 e 27 de abril e folga de xornada completa o 1 e 2 de maio.
- REPORTAXE | O abuso da temporalidade na CRTVG ergue o persoal: cesións ilegais, fraude e 200 sentenzas en contra
luns 18, abril 2022 ás 17:43 David Lombao @davidlombao
O PP de Galicia celebrará o 21 e 22 de maio en Pontevedra o congreso no que Rueda substituirá a Feijóo como líder do partido. Os eventuais precandidatos alternativos precisarán 90 sinaturas para postulárense. Así o sinalou o secretario xeral saínte, Miguel Tellado, no inicio da Xunta Directiva que oficializou a data. Tellado ratifica que o congreso "carecerá de relatorios políticos", polo que nel non serán debatidos documentos sobre a liña ideolóxica ou organizativa da formación, que si os abordou no congreso ordinario do pasado verán.
luns 18, abril 2022 ás 17:10 Praza Pública @prazapublica

Rosalía inclúe A Coruña na súa xira mundial de presentación do disco Motomami. Concello e Xunta confirman o concerto para o vindeiro 29 de xullo no Coliseum, dentro da programación do Xacobeo. Imaxe remitida polo Concello da Coruña.
luns 18, abril 2022 ás 16:48 David Lombao @davidlombao

Máis de 60 líderes políticos e sociais cataláns e vascos e persoas da súa contorna foron obxectivos de espionaxe a través dos seus teléfonos co software israelí Pegasus, que só poden mercar gobernos, e outros programas semellantes. É o que revela unha investigación publicada por The New Yorker e o grupo de pescuda canadense The Citizen Lab, que divulga nesta ligazón a listaxe de persoas no albo destas operacións.
domingo 17, abril 2022 ás 16:06 David Reinero @DReinero

A Xunta declarou controlado contra as seis da tarde deste domingo un incendio dunhas 180 hectáreas en Palas de Rei que se iniciou a primeira hora da mañá e a primeira hora da tarde considerou estabilizado. Este sábado houbo outro en Ames de arredor de 20 hectáreas. [Imaxe de arquivo dun incendio facilitada por UGT]
sábado 16, abril 2022 ás 10:33 David Reinero @DReinero

A Xunta cifra nunha vintena as persoas adoptadas ou tuteladas que cada ano buscan as súas orixes biolóxicas e elabora un protocolo para guiar o proceso. [Imaxe: Xunta de Galicia]
xoves 14, abril 2022 ás 20:24 Praza Pública @prazapublica

Este Venres Santo, 15 de abril, Praza.gal non se actualiza por descanso do persoal.
Volvemos o sábado! 🙂
xoves 14, abril 2022 ás 15:54 Ana G. Liste @BelaMistura

O Sergas activa a alerta ante posibles casos de hepatite aguda en nenos e nenas. A dirección xeral de Saúde Pública do Ministerio de Sanidade trasladou este mércores a detección de varios casos de hepatite aguda, de orixe desconocido, en rapazada menor de 10 anos. Desde xaneiro identificáronse no Reino Unido 74 casos en persoas de menos de 17 anos, ata o momento seis dos casos tiveron que recibir transplante hepático, sen que ningún deles falecese.
O conselleiro de Sanidade, Julio García Comesaña [na imaxe, nunha visita ao centro de saúde das Pontes CC-BY-SA Sergas], asegurou que "todos os profesionais de atención primaria, urxencias hospitalarias e extra hospitalarias (PAC) e os servizos de pediatría dos hospitais permanecen vixiantes, aínda que en Galicia non se ten detectado ningún caso".
xoves 14, abril 2022 ás 13:30 Ana G. Liste @BelaMistura
Alfonso Rueda agradece os apoios dos 'baróns' provinciais do PPdeG para presidir a Xunta e o partido, pero evita confirmar a súa candidatura ao congreso extraordinario da formación, no que apela a manter a “unidade”, como xa fixo Feijóo esta semana.