Fálase

O derradeiro Consello da Xunta presidido por Feijóo aproba o cesamento de Mar Sánchez Sierra como secretaria xeral de Medios para incorporarse ao gabinete do agora líder do PP no partido. Aproba, igualmente, o cesamento da directora xeral do Gabinete da Presidencia, Marta Varela, que pasa a ocupar un posto semellante na dirección estatal do PP. Na imaxe, [CC-BY-SA Xunta], Sánchez Sierra intervén na súa toma de posesión en 2013. Previamente, exercera como directora xeral de Comunicación e anteriormente, outros cargos no equipo de confianza do agora presidente saínte.

• AMPLIAMOS 👉 "Ás veces equivoqueime por non ter información adecuada ou cintura para cambiar de opinión", di Feijóo na súa despedida do Consello da Xunta
• A dimisión de Feijóo deixa a Xunta en funcións: non pode convocar oposicións nin asinar convenios e ten limitado o gasto

Robe, Terbutalina, Morad, Estopa ou Grande Amore, no cartel da nova edición do Caudal Fest de Lugo, que regresa os vindeiros 16 e 17 de setembro no seu formato habitual tras a interrupción da pandemia. O Concello lucense vén de presentar a programación do festival, que se volve celebrar á beira do Miño e no que aínda se agardan novas incorporacións. A venda de entradas comeza o día 11 deste mes de maio.

O TSXG declara firme a condena á Xunta a rehabilitar o pazo de Lourizán tras negarse a facelo por non ser cedido a Ence. A Deputación de Pontevedra, que iniciara o preito, confirma que o Goberno galego non recorreu a sentenza, polo que adquire firmeza. "As peticións da Deputación á Xunta para que acometese a rehabilitación foron unha constante nos últimos anos", reitera a institución provincial. Tras a condena, a Xunta esgrimira que xa comezara cos traballos no recinto mesmo antes da sentenza. [Imaxe: © Deputación de Pontevedra]

• A Xunta é condenada a rehabilitar o pazo de Lourizán tras negarse a facelo por non ser cedido a Ence

Comezan na Coruña as obras da Cidade das TIC, o parque tecnolóxico que se instalará na antiga fábrica de armas. Prevese que o conxunto do recinto estea en funcionamento contra finais de 2024. [Imaxe: © Concello da Coruña]

• HEMEROTECA | Do fusil Máuser ao 5G: a nova vida da vella fábrica de armas da Coruña como parque tecnolóxico

Tanxugueiras, Familia Caamagno e A Banda da Loba encabezan o cartel do Festigal 2022, que regresa ao seu formato habitual tras a interrupción pola COVID. O festival impulsado pola Fundación Galiza Sempre e Galiza Nova celébrase os vindeiros 24 e 25 de xullo no Campus Vida de Santiago.

Santi Mina, futbolista do Celta, condenado a catro anos de prisión por abuso sexual. A sentenza da Audiencia Provincial de Almería condena o dianteiro a pagar unha indemnización de 50.000 euros e absolve o tamén futbolista David Goldar do delito de cooperación necesaria. 

• AMPLIAMOS 👉 O Celta aparta temporalmente a Santi Mina do equipo tras ser condenado a catro anos de cadea por abuso sexual

PARO REXISTRADO | As inscricións nas oficinas de emprego diminuíron en 2.734 en Galicia durante o mes de abril (-1,78%, fronte ao -2,77% da media estatal) e o paro rexistrado quedou en 150.602, o que supón 20.176 menos que un ano antes (-11,81%, practicamente a metade que a media). No mesmo mes, a afiliación media á Seguridade Social aumentou en 5.540 persoas, unha suba do 0,54% (0,93% na media, ata os 1,03 millóns, isto é, un 3,19% máis que no mesmo mes de 2021 (+5,06% no global estatal). Máis información, hoxe en Praza.gal

• AMPLIAMOS 👉 Máis do 40% dos contratos asinados en abril en Galicia foron indefinidos
• Os sindicatos reclaman neste 1º de Maio máis medidas e intervención pública ante a crise de prezos

O Parlamento Europeo inicia a reforma electoral e propón crear unha circunscrición paneuropea de 28 escanos. Se os gobernos aceptan esta fórmula, nos comicios europeos cada votante depositaría dúas papeletas, unha da circunscrición que lle corresponda no seu Estado membro e outra, para esa circunscrición única de toda a Unión. As próximas eleccións europeas celébranse en 2024. Na imaxe, [© Parlamento Europeo], un pleno da Eurocámara en Estrasburgo.

• HEMEROTECA (2019) | Claro triunfo socialista nas eleccións europeas en Galicia e no Estado

Falece o vicerreitor de Ordenación Académica de Profesorado da Universidade de Vigo, Manuel Ramos Cabrer. O catedrático lucense, nado en 1966, era enxeñeiro de Telecomunicacións e doutor en Enxeñaría Telemática, ademais de membro do Grupo de Servizos para a Sociedade da Información e do centro de investigación atlanTTic e participantes en decenas de proxectos de investigación. A institución académica manifesta a súa "profunda consternación e tristura" pola súa repentina morte.

Abanca obtivo 81,2 millóns de euros de beneficios no primeiro trimestre do ano, un 13,2% máis que no mesmo período do ano anterior unha vez descontado o impacto da compra da vasca Bankoa. O banco subliña que o seu volume de negocio "aumentou en case 10.000 millóns de euros" en doce meses e chega a 107.887 millóns. O pasado 2021 rematárao con ganancias por importe de 323 millóns. Na imaxe (de arquivo), o presidente de Abanca, Juan Carlos Escotet [© Abanca]

• DATOS | Galicia bate récords de cartos depositados nos bancos mentres o número de sucursais é o menor dende 1974
• Abanca di que non vai pechar máis oficinas nos 134 concellos "onde é a única entidade"
• Abanca cifra en 2.000 euros anuais o que perderá con cada caixeiro que lle subvenciona a Xunta