O Festival O Son do Camiño cancela a súa edición deste ano e programa xa a de 2021 para os días 17 a 19 de xuño. A organización di que as entradas xa mercadas seguirán sendo válidas, que devolverá o importe a quen queira a partir do luns e que traballa para que o cartel deste ano poida facerse o próximo. Tamén Resurrection Fest, Portamérica e Sinsal San Simón veñen de anunciar a cancelación das edicións deste ano.
A Consellería de Educación pide ao profesorado “paixón” e “vocación” cun evento virtual no que profesionais doutras áreas contarán as súas experiencias. A consellería invita ao seu persoal a participar do 18 ao 22 de maio na cuarta edición de Apaixónate, “un evento que, a través de pequenos relatorios de grandes profesionais, quere transmitir como a paixón polo que un fai pode cambiar as nosas vidas e as de aqueles nos rodea”.
O PIB da zona euro cae un 3,8% no primeiro trimestre afectado pola crise do coronavirus. Os maiores devalos son os de Francia (-5,8%), España (-5,2%) e Italia (-4,7%), segundo Eurostat
O porto de Vigo é un dos habilitados para recibir chegadas das pasaxes internacionais permitidas durante as restricións polo coronavirus. O BOE deste venres especifica que se debe a que é, dende 2014, un dos "puntos de entrada con capacidade de atención de emerxencias de saúde pública de importancia internacional". Ningún dos aeroportos galegos está incluído nesta listaxe. O BOE tamén publica hoxe a prórroga das restricións ás entradas procedentes de fóra da UE.
A Xunta fixa o 25 de maio como día de retorno voluntario ás aulas para o alumnado de 2° de Bacharelato e dos segundos cursos de FP media e superior tras a suspensión polo coronavirus. Ampliamos aquí a información. Ademais, as escolas infantís públicas e concertadas inician o prazo de matrícula sen data nin protocolos para a reapertura.
A Asociación de Actores e Actrices de Galicia (AAAG) cualifica como "insatisfactorio" o Plan de Reactivación do sector cultural presentado pola Xunta hai uns días, e que tamén foi criticado por outros colectivos profesionais. A AAAG advirte da "falta de concreción de prazos e contías, da escasa claridade orzamentaria, a presentación de programas baleiros de contido" ou do "disfrace de convocatorias pendentes e habituais como propostas novas e incentivadoras".
O lehendakari apunta ao 12 ou 19 de xullo como datas máis probables para as eleccións en Euskadi. Así o manifestou na xuntanza cos partidos vascos convocada o pasado 30 de abril e celebrada esta mañá. Feijóo xa evidenciou onte a súa preferencia por volver cadrar con Íñigo Urkullu na chamada ás urnas. Esta tarde desenvólvese o encontro dos partidos galegos convocado pola Presidencia da Xunta. (Imaxe: Goberno Vasco)
O Goberno central retoma a adxudicación do enlace orbital de Santiago que anunciou no primeiro día da campaña das xerais de hai un ano. A nova conexión entre a AP-9, a autovía a Lugo e os polígonos do norte da cidade non se licitou ata xaneiro e agora retómase o proceso de avaliación de ofertas paralizado hai dous meses.
Feijóo esgrime os "expertos que ten" a Xunta na crise do coronavirus fronte a Fernando Simón. Asegura que o persoal que o asesora "non desmerecen outros expertos que aparecen por aí moitas veces nas cámaras para tentar atraer para si as responsabilidades e diminuír as responsabilidades indelegables do Goberno", dixo en referencia ao director de Emerxencias Sanitarias do Ministerio de Sanidade tras ser preguntado polos motivos que levan o Goberno galego a non organizar con asiduidade comparecencias públicas de persoal técnico sobre a covid-19. (Imaxe: Fernando Puig de la Bellacasa / Goberno de España)
Feijóo confirma o seu interese en celebrar as eleccións "canto antes" e sinala o mes de xullo a partir dos informes sanitarios que, di, manexa o Goberno galego e acaba de "remitir aos partidos políticos", cos que se reunirá mañá, segundo anunciou en rolda de prensa. O presidente da Xunta confirma que a nova fase do estado de alarma permite volver convocalas grazas á emenda introducida polo PNV. Ampliamos a información neste espazo.
