Este domingo comeza a campaña da centola na Coruña e Pontevedra e do boi en toda a costa galega. En Lugo a centola poderá collerse a partir do 27 de novembro.
Fálase
Máis de 253.000 persoas xa están vacinadas contra a gripe en Galicia, segundo informou a Xunta este sábado. A campaña, a primeira por quendas e unida á terceira dose da COVID para maiores de 80 anos, comezou hai tres semanas. O pasado ano administráronse 840.000 doses e este ano a Xunta adquiriu 885.000.
O Carballo do Bosque do Banquete de Conxo marcha en primeira posición no certame estatal para optar a ser a Árbore Europea do Ano. O Concello de Santiago anima a cidadanía a sumar máis apoios para fortalecer as súas posibilidades de vitoria. Pódese votar nesta ligazón
Vestas amplía só tres días, ata o luns, o período de negociación do ERE da súa fábrica de Viveiro. A compañía desouve así a petición dos sindicatos secundada pola Xunta e mais polo Ministerio de Industria. Na imaxe, mesa de negociación celebrada este venres en Santiago coa presenza de representantes da empresa e do persoal xunto aos gobernos español e galego.
O Goberno de España aproba que as mulleres sen parella, homosexuais, bisexuais ou transexuais poidan ter acceso á reprodución asistida na sanidade pública. Este dereito retirárao o Goberno de Rajoy en 2013 para o conxunto do Estado e a daquela ministra de Sanidade, Ana Mato, argumentárao afirmando que "a falta de varón non é un problema médico". No Sergas, non obstante, non existiu esa exclusión. Na imaxe, o acto de sinatura da orde ministerial pola ministra de Sanidade, Carolina Darias (© Ministerio de Sanidade)
Susana Rodríguez Gacio gaña o Campionato do Mundo de Paratriatlón que se celebra en Abu Dhabi. A médica viguesa, que conseguiu unha medalla de ouro nos Xogos Paralímpicos de Tokio 2020, repite como líder mundial do paratriatlón xunto á súa guía Sara Loehr. Esta era a súa carreira internacional número 57 [na imaxe, ©World Triathlon]. A triatleta pecha así un gran ano de competicións, xa pensando no seguinte: "A desfrutar e empezar a construír para o ano que vén!", celebrou nas súas redes sociais.
Os Orzamentos Xerais do Estado para 2022 continúan o seu trámite tras rexeitar o Congreso as emendas á totalidade formuladas por PP, Vox, Ciudadanos, Junts, CUP, Coalición Canaria e Foro Asturias por 156 votos a prol, 188 en contra (entre eles, o do deputado do BNG, Néstor Rego) e 1 abstención. As segundas contas públicas do Goberno do PSOE e UP serán aprobadas definitivamente se logran o apoio maioritario da Cámara, para o que continúan as negociacións cos grupos parlamentarios. Na imaxe, (© Congreso), a ministra de Facenda defende as contas durante od ebate.
O presidente de Portugal disolve a Asemblea da República e convoca eleccións anticipadas para o 30 de xaneiro. Marcelo Rebelo de Sousa xa anticipara a súa intención de facelo se os Orzamentos Xerais do Estado do Goberno do socialista António Costa eran rexeitados polo Parlamento, como aconteceu.
Arredor dun milleiro de gandeiros maniféstanse en Lugo cunha tractorada e a representación dunha marcha fúnebre para reclamar subas nos prezos que cobran polo leite. A marcha, convocada pola asociación Agromuralla, esixe que a remuneración polo produto "compense o encarecemento que están a sufrir nos pensos, o gasóleo e o prezo da luz" que, din, provocará que moitas explotacións viren en "inviables".
O Tribunal Supremo vén de confirmar a sentenza da Audiencia Provincial de Lugo que condenaba a 12 anos de cárcere a un frade franciscano do Cebreiro [na imaxe, durante o xuízo © CRTVG] por abusar sexualmente dunha rapaza de 16 anos e un rapaz de 20, que eran curmáns. A Sala II do Supremo rexeita o recurso presentado polo relixioso e ratifica que cometeu un delito continuado de abusos servíndose da súa condición, de que superaba en 40 anos de idade ás vítimas e da discapacidade recoñecida dos agredidos.