Fálase

O Tribunal Supremo vén de confirmar a sentenza da Audiencia Provincial de Lugo que condenaba a 12 anos de cárcere a un frade franciscano do Cebreiro [na imaxe, durante o xuízo © CRTVG] por abusar sexualmente dunha rapaza de 16 anos e un rapaz de 20, que eran curmáns. A Sala II do Supremo rexeita o recurso presentado polo relixioso e ratifica que cometeu un delito continuado de abusos servíndose da súa condición, de que superaba en 40 anos de idade ás vítimas e da discapacidade recoñecida dos agredidos.

• HEMEROTECA | Condenado a doce anos de prisión o antigo frade do Cebreiro por abusar de dous menores

A Axencia Europea do Medicamento prevé concluír en decembro as súas análises sobre a posible administración da vacina de Pfizer-BioNTech contra a COVID á infancia de entre 5 e 11 anos. Na súa actualización periódica a respecto da pandemia, a EMA sinala que, ante o "novo incremento de infeccións en Europa" que está a observar, "é importante que a poboación se vacine ou complete a pauta de vacinación" se non o fixo.

• REPORTAXE | O impacto da tensión familiar pola COVID na infancia, o reto social pendente para despois da pandemia
• DATOS | Galicia comeza novembro con mínimas oscilacións na incidencia da COVID malia á fin do groso das restricións

A Fiscalía mexicana solicita prisión preventiva para Emilio Lozoya, o ex-director de Pemex que apadriñou os negocios coa Xunta e que estaba en liberdade condicional e colaborando coa xustiza en varias investigacións sobre corrupción. 

Detido un home acusado de empurrar unha muller dende o alto da Muralla de Lugo e deixala no lugar "ferida de gravidade", segundo fontes policiais que cita El Progreso. Os feitos aconteceron á altura da Praza de Ferrol, onde o adarve da Muralla ten uns doce metros de altura. [Imaxe: CC-BY-SA Praza.gal]

Morre Georgie Dann aos 81 anos. Segundo El Mundo, o cantante, nacido en Francia, estaba ingresado nun hospital madrileño. [Imaxe: TVG]

O PP forza a celebración dun pleno municipal extraordinario na Coruña asegurando que a cidade sofre "problemas xeneralizados de inseguridade", "roubos" ou "ocupacións ilegais". Entre as reclamacións dos conservadores figura que o Goberno de España introduza diversas mudanzas na lei para eventuais casos de ocupación de vivendas, ao xeito do que vén esixindo a Xunta. A sesión celébrase na mañá deste mércores. Os datos máis recentes do Poder Xudicial sinalan que os novos casos de ocupacións ilegais de vivendas volveron baixar en Galicia e son vinte veces menos que os desafiuzamentos.

• HEMEROTECA | A Xunta pagou 8.000 euros polo informe sobre ocupación de vivendas, que reproduce parágrafos dunha lei do PP de Castilla-La Mancha

PARO REXISTRADO | As inscricións nas oficinas de emprego galegas aumentaron en 991 persoas durante o mes de outubro e quedan en 154.045, o que supón 27.262 menos que un ano antes (-15,04%). No mesmo mes, a afiliación media á Seguridade Social diminuíu en 1.578 persoas, ata os 1,032 millóns. Son 20.633 máis que en outubro de 2020. No total estatal, o paro rexistrado descende levemente en termos mensuais (-0,02%) e a afiliación aumenta tamén un chisco (+0,82%). 

• AMPLIAMOS 👉 O paro sobe en outubro en Galicia, que volve rachar coa evolución positiva do mercado laboral no Estado
• EPA | O emprego volve en Galicia a niveis previos á COVID e o sector servizos segue gañando peso fronte ao devalo industrial

O Xurado dos Premios da Cultura Galega que organiza a Xunta fixo públicos este martes as persoas e entidades distinguidas co galardón neste 2021. Estas son as concesións  nas súas oito categorías.

• Letras: Bernardino Graña
• Artes Plásticas: Antón Pulido
• Artes escénicas: Nova Galega de Danza
• Música: Natalia Lamas
• Audiovisual: Zaza Ceballos
• Lingua: Dígocho eu
• Patrimonio Cultural: Mosteiro de San Pedro de Rocas
• Proxección Exterior: Federación de Asociacións Galegas da República Arxentina

A Audiencia da Coruña deixa en liberdade pero mantén como investigado ao último detido polo crime de Samuel Luiz. O tribunal entende que non hai motivos neste momento procesual para mantelo en prisión provisional, como estaba desde finais de setembro, pero prohíbelle saír de España. No caso hai sete persoas investigadas, dúas delas menores de idade.

• HEMEROTECA | Probas de ADN "implican directamente" os dous principais agresores de Samuel Luiz

Pedro Sánchez e Nadia Calviño comprométense con Yolanda Díaz "á derrogación da reforma laboral". Nun comunicado dos socios de Goberno tras a reunión interna, o presidente comprométese a desmontar a lexislación laboral do PP "nos termos que establece o acordo de coalición e o Plan de Recuperación enviado á Comisión Europea".

• HEMEROTECA (2012) | A reforma laboral do PP simplifica en prazos e custos o despedimento de xeito inaudito