A viguesa Susana Rodríguez Gacio é a atleta do ano 2024 para o Comité Paralímpico Europeo. A entidade distínguea como atleta feminina do ano pasado "onde revalidou a súa actuación nos Xogos de París 2024 e levou novamente a medalla de ouro en Para Triatlón Feminino PTVI". [📸@europaralympic]
Stellantis adxudica a Vigo e Zaragoza un novo modelo de coche eléctrico do segmento B "grazas á súa competitividade, saber facer, clima social e o apoio das administracións públicas".
Lucas Pérez abandona o Deportivo da Coruña. O coruñés, capitán e símbolo do club, deixa o equipo branquiazul por motivos persoais e diferenzas coa entidade, logo de regresar hai dous anos desde Primeira División e acadar o ascenso ao fútbol profesional a pasada tempada. O futbolista pecha a súa carreira no Dépor con 172 partidos, 62 goles e 53 asistencias en tres etapas diferentes.
Falece o presentador da TVG e colaborador da Radio Galega Xosé Manuel Piñeiro, segundo vén de comunicar o programa Galicia por Diante. Superpiñeiro apartouse dos medios no ano 2018 para someterse a un primeiro tratamento do cancro que padecía e, desde entón, reapareceu en diferentes ocasións en programas como Luar ou o propio Galicia por Diante. [📸 Radio Galega]
O Goberno de España lanza a reforma da Lei do Poder Xudicial que "blinda" as bolsas para a poboación de renda baixa que prepare oposicións á xudicatura, converte o Centro de Estudos Xurídicos do Ministerio nun "centro público de preparación" destas probas e veta o financiamento privado para as asociacións de xuíes e xuízas. "Bolsas de 1.300 euros ao mes durante catro anos, centro público de preparación, exames escritos, mellora da carreira profesional e máis xuíces e fiscais", resume o ministro Félix Bolaños para defender o anteproxecto. [Imaxe: © Pool Moncloa/José Manuel Álvarez]
Trump dedicará os seus primeiros decretos a "pechar" a fronteira con México mediante a despregadura de militares. A medida formará parte de dez medidas máis inmediatas sobre a inmigración. Foto: CC-BY-SA Gage Skidmore.
Rueda rexeita corrixir o seu deputado que negou mortes en San Simón: "Este tipo de debates hai que deixárllelo aos historiadores". Tras esa primeira resposta, o presidente, repreguntado no Consello da Xunta sobre os historiadores que xa certificaron centos de mortes no campo de concentración, evita polemizar: "Non teño ningunha dúbida de que en San Simón houbo represión, pero entrar no debate concreto do número de vítimas teñen que ser os historiadores".
Donald Trump regresa este luns á presidencia dos EUA. Faino con máis poder que no seu anterior mandato, cun poder xudicial máis á súa medida e o lexislativo ao seu favor. A súa volta á Casa Branca impulsa a internacional reaccionaria en todo o mundo, tamén en Europa, dende onde o mandatario electo convocou á súa toma de posesión convidados como Santiago Abascal, líder da extrema dereita de Vox. Na imaxe, Trump nunha cimeira da OTAN durante a súa anterior presidencia [CC BY-NC-SA NATO]
Remuda na presidencia de Telefónica, que dirixirá o ata agora presidente da semipública Indra, Marc Murtra. O nomeamento chega co impulso do Estado, que é agora a través da Sociedad Estatal de Participaciones Industriales (SEPI) o principal accionista da noutrora empresa pública co 10% das accións seguido por Criteria (Caixabank), que ten un 9,9%. O cesamento do ata agora presidente da compañía, José María Álvarez-Pallete, cuxo mandato finalizaba este ano, realízase de acordo entre estes dous principais accionistas e tamén coa saudí STC, cuxa entrada en Telefónica precipitou en 2023 a reentrada estatal nesta compañía estratéxica. Pallete estaba ao mando dende 2016 co impulso do anterior presidente, César Alierta, que chegara ao cargo no 2000 avalado polo Goberno de España na etapa de Aznar, que culminara a privatización da empresa tres anos antes. O PP ataca o nomeamento por considerar que supón "colonizar" unha "empresa privada" no marco dunha "deriva antidemocrática". Na imaxe, o novo presidente de Telefónica, Marc Murtra [© Telefónica]
Gaitas galegas para o himno catalán. O grupo de gaitas da Asociación Cultural Galega Rosalía de Castro, de Cornellà de Llobregat, interpreta Els segadors durante unha visita celebrada este sábado ao Parlament de Catalunya dentro do programa da institución para dar a coñecer o seu funcionamento e historia. O presidente do lexislativo catalán, Josep Rull, comparte o vídeo a través das redes sociais para destacar o que, di, foi "un dos momentos máis emotivos" que leva vivido dende que asumiu o cargo.