Fálase

O PSdeG cuestiona o director xeral da CRTVG sobre o "veto á obra de Anxo Lugilde sobre saúde mental", A vella compañeira, nos medios públicos. Sánchez Izquierdo mantén que se debe unicamente a "criterios profesionais", mentres que a deputada socialista Noelia Otero, xornalista de profesión, ve "cando menos curioso" que a obra "non teña eco" nos medios públicos galegos dada a súa "repercusión en medios do conxunto do Estado". O responsable da corporación pública retruca que diversos autores que si aparecen na Televisión de Galicia e na Radio Galega non o fan noutros medios. 

• HEMEROTECA | Anxo Lugilde: "A depresión é unha enfermidade totalitaria e con vocación asasina, domínate e tenta conducirte á morte"

Feijóo, sobre a guerra aberta no PP a conta do suposto cobramento irregular por parte dun irmán da presidenta de Madrid, Díaz Ayuso, que culpa das filtracións á dirección de Pablo Casado: "Necesitamos explicacións claras e contundentes dada a gravidade da información que coñecemos; cústame moito crer algunhas das cousas que se están publicando", afirma. "Se se contratou a alguén, paréceme inaudito", afirma sobre o suposto contacto da cúpula estatal do PP cun detective para investigar o asunto.

• AMPLIAMOS 👉 Feijóo pide á dirección do PP que "non provoque ningún incendio" no partido aínda que dubide da honestidade de Ayuso
• HEMEROTECA | Feijóo, Pedro e o lobo

Así soa Solstício, a primeira colaboración de Baiuca con Carlos Núñez. Os músicos lanzaron esta alborada a pasada noite e xa se pode escoitar nas principais plataformas. [Imaxe: © Baiuca]

• ENTREVISTA | Baiuca: "Cada viaxe que fago axúdame a traballar con máis ganas para seguir cara a adiante coa miña música"

O Senado aproba a Lei de convivencia universitaria que deixa sen efecto a norma franquista que seguía vixente no Estado. O pleno deste mércores ratificou a nova lexislación para a comunidade universitaria, aprobada no Congreso o pasado mes de novembro, cos votos en contra de PP, Vox e UPN. [Na imaxe, estudantes nunha aula da Universidade de Vigo © UVigo]

• HEMEROTECA | Plaxio, acoso, novatadas: as claves da lei de convivencia universitaria que substituirá a normativa franquista

Suspendida a manifestación na defensa da sanidade pública prevista para o domingo 20 en Marín. A Plataforma pola Defensa do Centro de Saúde de Seixo, que agrupa a vinte colectivos e asociacións das parroquias de Santomé de Piñeiro, O Campo, Ardán e Seixo, no concello de Marín, vén de expresar "o profundo pesar" ante o afundimento do pesqueiro Villa de Pitanxo: "Todo o noso cariño e apoio a familiares e amizades dos falecidos e desaparecidos".

A plataforma tamén manda o seu "afecto para a tripulación" do buque galego Playa Menduiña Dos, primeiro en chegar á zona, e á do portugués Novo Virgem da Barca e do resto do dispositivo de rescate. "Nas vilas mariñeiras como a nosa sabemos que o mar dá vida pero tamén causa dor... Quen máis, quen menos ten sufrido este tipo de traxedias no mar e hoxe son oito familias de Marín, compañeiros, amizades e veciñ@s quen choramos a perda dos nosos". Máis adiante, concretarán a nova data da mobilización para defender "o dereito a unha atención sanitaria digna", que xa fora aprazada polo mal tempo. 

• Marín, Moaña, Cangas, o Condado e o Baixo Miño: o deterioro da Atención Primaria multiplica as mobilizacións no sur do país

Tanxugueiras e os Red Hot Chilli Pipers, primeiras confirmacións para a edición 2022 do Festival de Ortigueira, que regresa despois de dúas edicións canceladas por mor da COVID. Será do 10 ao 17 de xullo, na "edición máis longa da súa historia". O concerto do trío de pandereteiras (que xa estiveron no festival no ano 2019) será unha das actuacións estelares desta edición. No caso da banda escocesa que mestura rock e música tradicional trátase da primeira ocasión que tocarán en Galicia.

A Xunta decreta tres días de loito oficial polo afundimento do Villa de Pitanxo. O presidente Feijóo leu esta mañá unha declaración institucional na que ofreceu "todo tipo de axuda" ás familias afectadas e o Goberno galego gardou un minuto de silencio e reduciu a súa axenda institucional, aínda que non a suspendeu por completo.

O Tribunal Constitucional portugués anula o reconto do voto emigrante en Europa nas recentes eleccións lexislativas e ordena repetir a votación nesa circunscrición por posibles irregularidades na identificación do electorado. A decisión, que chega tras un recurso do PSD, atrasa a constitución da nova Asemblea da República (na imaxe), pero non pon en risco a maioría absoluta lograda polo Partido Socialista -en Portugal, o sufraxio do exterior elixe unicamente 4 escanos-.

• O Partido Socialista logra a absoluta nas eleccións portuguesas e a extrema dereita ascende a terceira forza

Naufraga en Terranova o pesqueiro Villa de Pitanxo, con base en Marín. Segundo informa Pontevedra Viva, foron localizadas tres das catro balsas salvavidas do arrastreiro, pero dúas delas estaban baleiras. A tripulación está formada por unha vintena de persoas; o Goberno de España confirma que 3 foron rescatadas e dá por feito que varias delas faleceron, se ben continúan os labores de busca. Está a contalo a TVG.  [Foto: Vesselfinder.com] 

• INFORMACIÓN EN ACTUALIZACIÓN 👉 Un pesqueiro con base en Marín naufraga en Terranova e morren varios dos seus tripulantes

O Vaticano desbota agora que o papa Francisco viaxe a Santiago durante este 2022. É unha información adiantada por Religión Digital, que cita fontes da Secretaría de Estado e apunta á posición da Conferencia Episcopal Española ante os casos de abusos sexuais entre os motivos da decisión da Santa Sé. Desaparece así a posibilidade de que o pontífice acuda a un encontro de mocidade católica na capital galega o vindeiro verán, co gallo do Xacobeo. Tanto o Arcebispado de Santiago como a Xunta expresaran a súa esperanza de que acudise. Na imaxe -divulgada pola Xunta-, Francisco recibe a Feijóo no Vaticano en xuño do ano pasado.

• CRÓNICA | A barca de Santiago elixe o ronsel da de Pedro, non da de Pablo