Fálase

Corina Porro abandonará a primeira liña política á vez que deixa de ser deputada no Parlamento co inicio da nova lexislatura. Porro envía unha carta á militancia do PP de Vigo na que afirma que marcha "despois de 30 anos de servizo público". Conselleira de Servizos Sociais con Fraga, alcaldesa de Vigo, delegada da Xunta en Vigo, presidenta do Porto de Vigo e presidenta do Consello Económico e Social son algúns dos cargos de responsabilidade que ocupou na súa traxectoria, á que pón fin agora tras non formar parte da candidatura do PP ás pasadas eleccións galegas. [Imaxe de arquivo CC-BY-SA Xunta] 

• PERFIL | Corina Porro, a muller que o foi todo en Vigo, engade agora o cargo de ex-política

Catalunya adianta as eleccións ao 12 de maio para "conseguir un goberno máis forte". O presidente da Generalitat, Pere Aragonès, anunciou este mércores a convocatoria electoral tras unha reunión extraordinaria do seu Consell de Govern despois de que o Parlament rexeitara o proxecto de Orzamentos para 2024, no que ERC contaba co apoio do PSC. O voto en contra dos Comúns na Cámara catalá provocou a crise de goberno que desta vez rematou en eleccións.

• HEMEROTECA | O independentismo alarga a maioría en Catalunya co PSC como forza máis votada 

O Álbum de Galicia do Consello da Cultura incorpora a biografía de Pencha Santasmarinas, alma da loita contra a instalación dunha central nuclear en Xove e activa defensora das melloras profesionais para as mulleres no agro e no mar. O seu perfil na colección dixital de biografías do CCG foi elaborado por Encarna Otero. [Imaxe: Revista Andaina]

• HEMEROTECA (2019) | Adeus a 'Pencha' Santasmarinas, alma da loita contra a nuclear de Xove

Rafa Benítez deixa de ser o adestrador do Celta. Nun comunicado, o club sinala que o técnico "desvincúlase do RC Celta tras oito meses de entrega absoluta e plena dedicación, pero nos que o equipo non obtivo os resultados esperados polo club". Os celestes ocupan a 17ª praza da Liga a só dous puntos do descenso. Será substituído por Claudio Giráldez, ata agora adestrador do Celta Fortuna.

O servizo de autobús urbano de Vigo quedará restablecido desde este martes tras 108 días de folga do persoal de Vitrasa. O comité de empresa asinou este luns un acordo polo que acepta unha suba do 2% nos salarios consolidados desde o ano 2021. A maioría das traballadoras e traballadores xa escolleran paralizar a folga desde este luns. 

• O persoal de Vitrasa decide acabar coa folga, mais seguirá, como mínimo, ata o luns
• REPORTAXE | A encrucillada de Vitrasa: entre a empatía e o fastío tras 100 días de folga no bus urbano de Vigo 

Besteiro presenta este martes a súa precandidatura ás primarias do 7 de abril para volver ser secretario xeral do PSdeG. O agora deputado electo por Lugo liderara o partido de 2013 a 2016 e diversas voces da formación apostan por el para tecer un proxecto a medio prazo tras os malos resultados electorais do 18F.

• HEMEROTECA | O PSdeG aspira con Besteiro á ollada a medio prazo que logrou o BNG con Pontón

Concellos e deputacións acollen concentracións de lembranza ás vítimas do 11M no vixésimo aniversario dos atentados xihadistas en Madrid. Foran asasinadas 193 persoas e dous milleiros resultaran feridas. Na imaxe, a concentración da corporación municipal da Coruña ante o Pazo de María Pita.

O PP reclama no Senado a exclusión do lobo da lista de especies protexidas. Solicita a exclusión do lobo do Listado de Especies Silvestres en Réxime de Protección Especial e que, en colaboración coas comunidades autónomas e o sector, elabore un plan de xestión para facer compatible a súa conservación coa defensa dos intereses dos gandeiros.

• HEMEROTECA | O censo oficial do lobo di que a especie está "estable" fronte á "evolución positiva" que publicitou a Xunta 
• HEMEROTECA | O PP atribúese o aumento de lobos en Galicia tanto en exemplares como en distribución no territorio

O PSdeG abre este luns o proceso de presentación de precandidaturas ás primarias para secretario xeral. A xornada de votación terá lugar o domingo, 7 de abril, e o congreso extraordinario celebrarase o 27 do mesmo mes, segundo aprobou o partido este sábado.

‘Salvaxe, salvaxe’, do ourensán Emilio Fonseca, obtén a Biznaga da Prata á mellor longametraxe documental. A película resultou premiada na 27ª edición do Festival de Málaga, onde tivo a súa estrea mundial. Esta produción galega achégase ao lobo ibérico desde un cinema "inmersivo e político: un anti-documental de natureza", indica o director.