Rafa Benítez deixa de ser o adestrador do Celta. Nun comunicado, o club sinala que o técnico "desvincúlase do RC Celta tras oito meses de entrega absoluta e plena dedicación, pero nos que o equipo non obtivo os resultados esperados polo club". Os celestes ocupan a 17ª praza da Liga a só dous puntos do descenso. Será substituído por Claudio Giráldez, ata agora adestrador do Celta Fortuna.
O servizo de autobús urbano de Vigo quedará restablecido desde este martes tras 108 días de folga do persoal de Vitrasa. O comité de empresa asinou este luns un acordo polo que acepta unha suba do 2% nos salarios consolidados desde o ano 2021. A maioría das traballadoras e traballadores xa escolleran paralizar a folga desde este luns.
Besteiro presenta este martes a súa precandidatura ás primarias do 7 de abril para volver ser secretario xeral do PSdeG. O agora deputado electo por Lugo liderara o partido de 2013 a 2016 e diversas voces da formación apostan por el para tecer un proxecto a medio prazo tras os malos resultados electorais do 18F.
Concellos e deputacións acollen concentracións de lembranza ás vítimas do 11M no vixésimo aniversario dos atentados xihadistas en Madrid. Foran asasinadas 193 persoas e dous milleiros resultaran feridas. Na imaxe, a concentración da corporación municipal da Coruña ante o Pazo de María Pita.
O PP reclama no Senado a exclusión do lobo da lista de especies protexidas. Solicita a exclusión do lobo do Listado de Especies Silvestres en Réxime de Protección Especial e que, en colaboración coas comunidades autónomas e o sector, elabore un plan de xestión para facer compatible a súa conservación coa defensa dos intereses dos gandeiros.
O PSdeG abre este luns o proceso de presentación de precandidaturas ás primarias para secretario xeral. A xornada de votación terá lugar o domingo, 7 de abril, e o congreso extraordinario celebrarase o 27 do mesmo mes, segundo aprobou o partido este sábado.
‘Salvaxe, salvaxe’, do ourensán Emilio Fonseca, obtén a Biznaga da Prata á mellor longametraxe documental. A película resultou premiada na 27ª edición do Festival de Málaga, onde tivo a súa estrea mundial. Esta produción galega achégase ao lobo ibérico desde un cinema "inmersivo e político: un anti-documental de natureza", indica o director.
O temporal deixa numerosas incidencias nas entradas galegas, coa AP-9 cortada. Neve, xeo, saraiba. A central de emerxencias do 112 rexistrou nas últimas horas unha ducia de emerxencias relacionadas co temporal nas estradas galegas. A AP-9 mesmo foi cortada ao seu paso por Pontevedra tras unha colisión en cadea.
[Foto: neve no Faro, entre Rodeiro e Chantada. Redmeteo]
O cadro de persoal de Vitrasa suspende "temporalmente" a folga tras máis de cen días. A maioría de traballadoras e traballadores da empresa que xestiona as liñas do bus urbano de Vigo acepta a oferta de Vitrasa e paralizan a folga desde a vindeira semana, cando comezarán as negociacións sobre as propostas concretas dende o comité de empresa. [Na imaxe, manifestación do 24 de febreiro CC-BY-SA CIG]
O Supremo pide ao Senado o suplicatorio para xulgar a Baltar por conducir a 215 por hora nun coche oficial da Deputación de Ourense. A Sala do Penal recolle así a petición da instrutora da causa, que viu "indicios racionais de criminalidade" suficientes para consideralo autor dun delito contra a seguridade viaria por circular a máis de 80 quilómetros por hora por riba da velocidade permitida e por iso pediu retirarlle a inmunidade ao agora senador. O PP ten maioría absoluta na Cámara Alta.
