Fálase

A Casa Obreira da CUT en Santiago acolle este sábado a xornada Unha CRTVG ao servizo do pobo, centrada na "liberdade de expresión e igualdade" nos medios públicos de comunicación. Contará cos paneis compostos por xornalistas, expertos xurídicos e representantes políticos baixo os títulos  "A garantía da liberdade de expresión é unha tarefa de todas", "Por uns medios públicos feministas", "Control parlamentario e deontolóxico da manipulación informativa" e "Fiscalización sindical e social dos medios públicos", este último coa participación de David Lombao, director de Praza.gal

• A primeira sentenza contra a CRTVG por represalias a un traballador crítico xa é firme
• O PP volve sentar perfís de partido no consello da CRTVG mentres sostén con mandato indefinido o director xeral

Homenaxe a Samuel Luiz no primeiro aniversario do seu asasinato na Coruña. A Asociación pola Liberdade Afectiva e Sexual da Coruña (ALAS) convoca unha vixilia este sábado (2 de xullo) ás 18.30h na Avenida de Bos Aires, ao carón da discoteca Playa Club. Co fin de honrar a súa memoria, así como a doutras vítimas da LGBTIfobia gardarase un minuto de silencio e haberá unha ofrenda floral onde tiveron lugar os feitos que o domingo farán un ano. Non se lerá ningún manifesto como mostra de respecto ao proceso xudicial en curso. 

O novo disco das Tanxugueiras xa ten título e portada. Incluirá dez temas, entre eles éxitos como Midas, Figa, Averno ou Terra, os recentes sinxelos Seghadoras, Desidia e Pano Corado e outros dous instrumentais de apertura e peche. Diluvio sae á venda en tendas físicas e ás plataformas dixitais o día 29, pero xa se pode reservar no web das cantareiras.

• HEMEROTECA - ENTREVISTA | "Queremos demostrar que a nosa música tradicional pode ter a mesma proxección que calquera outra"

O voceiro do PP no Concello de Lugo renuncia a repetir como candidato nas municipais de 2023 por motivos "persoais". Ramón Carballo, que tamén é deputado, foi aspirante á alcaldía en 2019, cando se cumprían dúas décadas dende que os conservadores gobernaron Lugo por última vez. Neste período mudaron de cabeza de cartel en catro ocasións e dispóñense a designar o quinto aspirante. [Imaxe: © PP Lugo]

• HEMEROTECA | O PP dominou no interior da Muralla, pero a fortaleza de PSdeG e BNG nos barrios mantivo Lugo na esquerda
• HEMEROTECA | Lara Méndez inicia o seu segundo mandato en coalición co BNG para lograr un Lugo “máis orgulloso do seu”

Rueda rexeita pronunciarse sobre a condena firme da CRTVG por represaliar un traballador e remítese a declaracións previas nas que considerou “axeitada” a “política” da corporación sobre os ‘venres negros’. O presidente limitouse a constatar que hai “unha sentenza xudicial” e que a súa postura ao respecto “non varía” do que xa dixo cando se lle preguntou polo mesmo tema cando a sentenza aínda non era firme.

• HEMEROTECA | Rueda ve "axeitada" a "política" da CRTVG sobre os 'venres negros' tras a súa condena por represaliar un traballador

A cimeira da OTAN en Madrid devolve o mundo á guerra fría e sinala Rusia como principal inimigo. Unha crónica de José Enrique Monrosi, de infoLibre. Na imaxe, os asistentes ao cumio antes da súa cea oficial no Museo do Prado, este mércores [© Pool Moncloa / Borja Puig de la Bellacasa]

• +INFO 👉 A cimeira de Madrid devolve o mundo á Guerra Fría: Rusia xa é inimigo oficial da OTAN

O PP propón para o Consello de Administración da CRTVG a dúas persoas con cargos nos seus gobernos. A marcha de dous colaboradores de Feijóo no partido, Luis de la Matta e Higinio Meijide, será cuberta por Margarita López Blanco, con cargos na Deputación de Lugo durante os gobernos de Francisco Cacharro e Elena Candia, e por Álvaro Alonso Filgueira, ata agora xefe de prensa da conselleira de Medio Ambiente.

• AMPLIAMOS 👉 O PP volve sentar perfís de partido no consello da CRTVG mentres sostén con mandato indefinido o director xeral
• HEMEROTECA | A marcha de Feijóo propicia que o Parlamento vote outra remuda na CRTVG mentres o director xeral segue por tempo indefinido

Xunta, Concello de Santiago e Goberno de España celebran o vixésimo aniversario da promulgación do Estatuto de Capitalidade de Compostela, aprobado por unanimidade do Parlamento en 2002. O alcalde da cidade, Xosé Sánchez Bugallo, coida que oficializar a capitalidade "foi o resultado da unión de todos e unha demostración práctica de que determinados temas deben retirarse do debate político, poñendo o ben do país por enriba de todo". [Imaxe: CC-BY-SA David Cabezón / Xunta]

A futbolista galega Teresa Abelleira xogará finalmente a Eurocopa do vindeiro mes de xullo. A centrocampista, ex-xogadora do Deportivo, substitúe a lesionada Salma Paralluelo.

O tiburón que varou a pasada fin de semana nunha praia de Oleiros faleceu por inxestión de plásticos, segundo confirma Cemma. Tapóns de botella e fibras de pesca provocaron a morte do animal. Foto: Cemma. 

• AMPLIAMOS 👉 A inxesta de plásticos foi a causa da morte do tiburón de catro metros que ficou varado nunha praia de Oleiros