Fálase

Queda aprobada a Lei Xeral de Comunicación Audiovisual, tras ser ratificada este mércores polo Senado. Unha lei que non contou co apoio dos socios da coalición de Goberno por unha emenda do PSOE que muda a definición do produtor independente, constituíndo unha “sentenza de morte” para a opinión de parte do sector audiovisual. 

O senador galego Xoaquín Fernández Leiceaga, ponente da lei, salientou que se “multiplica por catro a porcentaxe de inversión obrigada” nas producións independentes. “Estou seguro de que La última cena, Arde, Alcarrás o Aztarnak, producións cinematográficas en distintas linguas, terían hoxe moitísima máis facilidade de financiamento que non coa lexislación que está vixente ata o de agora”, manifestou. A lei entrará en vigor coa publicación no BOE. 

• HEMEROTECA | Produtoras independentes advirten da súa "sentenza de morte" pola lei audiovisual do Estado, salvada coa abstención do PP 

O Concello de Santiago presentou o "Mapa dos cinematógrafos de Compostela", que busca dar a coñecer a historia das 21 salas de proxección que tivo ou ten Compostela, a primeira creada en 1900. A iniciativa forma parte do proxecto Compostela Filmada, coordinado por Óscar Senra

O ex-ministro do Interior Jorge Fernández Díaz dirixiu persoalmente operacións da brigada policial corrupta contra independentistas cataláns, segundo os novos audios publicados por El País con conversas entre o antigo integrante do Goberno de Rajoy e o ex-comisario Villarejo. Como tamén publica a SER, os audios demostran tamén que Fernández Díaz mentiu no Congreso ao respecto destas operacións e da súa relación co comisario corrupto.

• HEMEROTECA | Fernández Díaz asegurou que Rajoy coñecía as súas manobras para incriminar políticos independentistas

Pedro Sánchez anuncia unha baixada do IVE no recibo da luz do 10% ao 5%. A medida será aprobada o vindeiro sábado, no Consello de Ministros extraordinarios que dará o visto e prace á prórroga das medidas fronte á crise de prezos mediante un decreto no que se esperan máis novidades. Anunciouno esta mañá, durante a sesión de control no Congreso.

• DATOS | Os alimentos son un 11% máis caros que hai un ano e o aceite e os ovos soben por riba do 30%
• DATOS | A alza no prezo dos combustibles mantén a inflación disparada en Galicia, ata roldar o 10% en maio

Mónica Oltra anuncia a súa dimisión como vicepresidenta da Generalitat valenciana logo da súa imputación pola xestión que o seu departamento fixo do caso de abusos a unha menor tutelada polo qeu foi condenado o seu ex-marido. "O caso pasará á historia da infamia", di. 

O BNG confirma que Goretti Sanmartín volverá ser candidata á alcaldía de Santiago. Nun acto no que tamén participou o escritor Suso de Toro, Ana Pontón considerou que "é a alcaldesa que Santiago necesita para recuperar o pulso" e "saír do letargo" dun "goberno de rutina". Sanmartín, que foi candidata por primeira vez en 2019, avanza, pedirá apoio a "todas as persoas que levan Compostela no corazón". O Bloque, que actualmente ten 2 edís na corporación compostelá, asegura que "non se pon límites" cara aos comicios de 2023. [Imaxe: CC-BY-NC-SA BNG]

• HEMEROTECA | "Cremos que Santiago precisa ousadía e proxectos ambiciosos; nós temos equipo para facelo"

A causa por malversación contra Jácome volve ser arquivada. O xulgado considera que "non aparece debidamente xustificada a perpetración do delito" por parte do actual alcalde de Ourense no manexo de fondos públicos recibidos por Democracia Ourensana. A acusación fora asumida pola Fiscalía a través dunha denuncia.

• HEMEROTECA | Jácome lembra que o bipartito do PP segue vixente

Rueda insiste en que o PPdeG foi un "exemplo de unidade" coa súa elección como substituto de Feijóo. Afirmouno este luns ante o Comité de Dirección do partido antes de emprenderen a elección de candidaturas ás alcaldías que, no caso das sete principais cidades, prevén designar durante este verán.

• CRÓNICA | Rueda celebra que sexa posible "derrubar inercias" políticas "construídas durante décadas"
• HEMEROTECA | Rueda agradece a presidencia do PPdeG aos baróns provinciais

A esquerda gobernará Colombia por primeira vez: Gustavo Petro gaña as presidenciais co 50,47% dos votos e culmina unha mudanza política histórica no país. Imaxe dun dos seus últimos actos de campaña.

• AMPLIAMOS 👉 "A vitoria de Petro é o triunfo dos indíxenas, os afro e os campesiños, é o triunfo da periferia en Colombia"

Macron perde a maioría absoluta nas eleccións lexislativas de Francia. As primeiras proxeccións da segunda volta outorgan á coalición do presidente un total de 218 escanos, lonxe dos 289 que outorgan a maioría absoluta. A segunda forza política sería Nupes, que lograría 156 escanos.