Fálase

A CIG traslada a Lugo o seu acto central do Primeiro de Maio "en resposta á deriva autoritaria do PP". A central sindical nacionalista coida que os populares "veñen de dar un paso máis nas súas actitudes antidemocráticas asaltando o goberno municipal lucense cunha moción de censura nuns termos inaceptábeis", decisión que liga con outras como a "criminalización das baixas médicas" ou o "férreo control sobre os medios de comunicación públicos". A manifestación central da CIG parte ás 12 da mañá do Edificio Sindical, na Ronda da Muralla. Na imaxe manifestación lucense da Confederación Intersindical Galega o 1 de maio do pasado 2025.

• CRÓNICA | Lugo en pesetas
• Censura en Lugo: o PP obterá a alcaldía coa tránsfuga que logrou o posto pola morte dun compañeiro

O Estado homenaxea a Dolores Vázquez vinte e cinco anos despois do seu encarceramento inxusto tras ser sinalada como falsa culpable do asasinato da filla da súa ex-parella. A betanceira recibiu do Goberno de España a Medalla á Promoción dos Valores de Igualdade co gallo do Día da Visibilidade Lésbica. No acto evocou o "calvario" que viviu por mor da falsa acusación e agarda que a homenaxe sirva para que máis persoas poidan "entender que era e son inocente". "Non podía nin saír á rúa", lembra unha década despois de que a Xustiza lle denegase, alegando razóns formais, a indemnización que reclamou polos máis de 500 días que pasou na cadea.

• Homenaxe do Estado a Dolores Vázquez un cuarto de século despois do seu encarceramento inxusto
• HEMEROTECA | Betanzos homenaxea e pide perdón a Dolores Vázquez vinte e cinco anos despois da súa prisión inxusta

O profesorado galego vai mañá á folga por sexta vez este curso para exixir "melloras laborais reais" e a "garantía do seu cumprimento". CIG-Ensino convoca o paro e unha manifestación que sairá ás 12 do mediodía da Alameda de Santiago. O sindicato nacionalista cualifica de "anuncio propagandístico" o acordo difundido pola Xunta para reducir o horario do profesorado en Secundaria e adiantar a redución de ratios. 

• O profesorado impartirá dúas horas menos de clase en Secundaria

Nova xornada de folga no comercio téxtil e do calzado de Galicia contra o convenio estatal que intenta aprobar a patronal ARTE. CIG e UGT convocan paro en toda Galicia, con mobilizacións en todas as cidades. Na fogo, manifestación na Coruña. Máis información, hoxe en Praza.gal. 

• AMPLIAMOS | As dependentas galegas volven amosar a súa forza contra o convenio estatal do téxtil
• Dos soldos a traballar festivos: claves da loita das dependentas que volve paralizar as tendas

Nordesía Producións celebrou este sábado na Sala Capitol de Santiago o seu 30 aniversario cunha gala, presentada por Carlos Blanco, que homenaxeou o legado de Narf. Uxía, X.M. Budiño, A Pedreira & Alejandro Vargas ou Felisa Segade, entre outras, actuaron nunha noite que festexou as tres décadas de traxectoria da produtora pioneira no panorama cultural galego. O evento, coa banda lisboeta Expresso Transatlântico, serviu como lanzamento oficial da VII Edición do Festival MARÉ, que terá lugar do 23 ao 27 de setembro.

O Club Deportivo Aldebarán de San Sadurniño ascende á Superliga de voleibol, unha "fazaña para o recordo", como destaca a Federación Galega. O equipo deste concello rural de menos de tres mil habitantes, nacido hai catro década nun colexio público, competirá na máxima categoría a vindeira tempada.

• HEMEROTECA (2018) | A proeza do Aldebarán sitúa San Sadurniño na elite do voleibol

Este 25 de abril Lugo celebrou o aniversario da Revolución dos Caraveis cun canto popular de "Grândola, Vila Morena" na Mosqueira. O acto organizado pola Tenencia de Alcaldía "reforza o compromiso do Concello de Lugo coa democracia, a memoria histórica e a cultura popular, nun momento de unión e participación cidadá que queremos compartir con toda a veciñanza". A convocatoria estivo marcada este ano pola denuncia da moción de censura presentada polo PP cunha edil tránsfuga e no evento participou a plataforma Tranfuguismo non, Democracia si

• Unha masiva mobilización en Lugo chama a defender "a vontade da cidadanía" fronte ao transfuguismo

Ponte nas Ondas! xuntou este venres case un cento de escolas de 50 concellos de Galicia e Portugal nunha xornada radiovisual, con múltiples convidados e convidadas e que puido seguirse en directo a través da web. O alumnado de ducias de escolas galegas e portuguesas participou nas dez emisións en directo desde Allariz, Caión, Lugo, Ourense, Pontevedra, Santiago de Compostela, Valença de Minho, Viana do Castelo, Vigo e Vimianzo.

Fillas de Cassandra publican este venres Tertúlia, o seu segundo LP. O novo traballo discográfico de María SOA e Sara Faro conta coas colaboracións de Abraham Cupeiro, Ede, Pipiolas e Zetak. A xira de presentación do álbum arrincará o 9 de maio no Recinto Feiral de Pontevedra coa celebración dunha Gran Tertúlia que contará con numerosas invitadas.

• Fillas de Cassandra presentan 'Tertúlia': 12 cancións (e cadeiras) para "poñer a palabra no centro"
• ENTREVISTA | Fillas de Cassandra: "Redescubrímonos con cada traballo, o que ofrecemos son as nosas ideas"
• "Chegar tarde é mellor que non chegar": o novo de Fillas de Cassandra pide pausa contra "o desenfreo do Capital"

CIG-Saúde representa o enterro simbólico da atención primaria na sétima xornada de folga convocada desde o pasado mes de novembro. O sindicato nacionalista reclama "melloras nas condicións de traballo e medidas estruturais que eviten o colapso dos centros de saúde e dos PAC" logo dunha xuntanza coa Consellería de Sanidade "sen compromisos firmes nin solucións suficientes".