Ponte nas Ondas! xuntou este venres case un cento de escolas de 50 concellos de Galicia e Portugal nunha xornada radiovisual, con múltiples convidados e convidadas e que puido seguirse en directo a través da web. O alumnado de ducias de escolas galegas e portuguesas participou nas dez emisións en directo desde Allariz, Caión, Lugo, Ourense, Pontevedra, Santiago de Compostela, Valença de Minho, Viana do Castelo, Vigo e Vimianzo.
Fillas de Cassandra publican este venres Tertúlia, o seu segundo LP. O novo traballo discográfico de María SOA e Sara Faro conta coas colaboracións de Abraham Cupeiro, Ede, Pipiolas e Zetak. A xira de presentación do álbum arrincará o 9 de maio no Recinto Feiral de Pontevedra coa celebración dunha Gran Tertúlia que contará con numerosas invitadas.
CIG-Saúde representa o enterro simbólico da atención primaria na sétima xornada de folga convocada desde o pasado mes de novembro. O sindicato nacionalista reclama "melloras nas condicións de traballo e medidas estruturais que eviten o colapso dos centros de saúde e dos PAC" logo dunha xuntanza coa Consellería de Sanidade "sen compromisos firmes nin solucións suficientes".
Rueda inicia a viaxe oficial á China visitando empresas de automoción, loxística e compoñentes en Shanghái e mantendo xuntanzas con, entre outros, o presidente da automobilística SAIC Motors, Xiaoqiu Wang. A intención, di o presidente da Xunta, que viaxa acompañado da conselleira de Economía, María Jesús Lorenzana, é "explorar novas oportunidades de negocio e posibilidades de investimentos" en Galicia. Na imaxe, Rueda agasallando con camisolas da selección galega de fútbol os directivos de SAIC, que á súa vez entregaron á delegacion galega camisolas do Shanghái Port, equipo da Superliga chinesa. [Foto: CC BY SA Xunta]
O PP tamén gobernará en bipartito con Vox en Aragón. O novo pacto coa extrema dereita inclúe, como o de Extremadura, medidas a prol da discriminación no acceso aos servizos públicos en función da orixe da poboación ou sinalamento a migrantes menores de idade.
Unha concentración co lema "Transfuguismo non, democracia si" protestará este venres ás 19 horas ante o Concello de Lugo contra a moción de censura do PP cunha tránsfuga.
Nova folga no comercio téxtil e de calzado en Galicia o vindeiro luns, coincidindo con outra reunión da mesa de negociación do convenio estatal. A CIG convoca un paro de 24 horas este 27 de abril para rexeitar un convenio que "empeora as condicións laborais e elimina dereitos contemplados nos convenios provinciais". O sindicato nacionalista e UGT rexeitan o preacordo asinado por CCOO e Fetico coa patronal ARTE.
Bota a andar De Norte a Sul, un novo xornal "que quere unir a Galiza e Portugal nun espazo mediático común", segundo destaca na súa presentación. Está dirixido polo xornalista do Porto e profesor universitario Luís Loureiro. O proxecto inclúe noticias xerais, ciencia, cultura e deporte, "ofrecendo unha visión integrada do que acontece entre a Coruña e Lisboa"
O ex-alcalde da Coruña Francisco Vázquez pide por carta ao Deportivo que non cambie o nome do club e desbote usar o topónimo oficial e en galego. "Non caben intereses políticos que alteren a condición de club de todos", di o ex-rexedor na misiva enviada á entidade branquiazul.
Un informe técnico do Ministerio de Sanidade conclúe que "non existe evidencia científica que avale a eficacia da homeopatía" contra ningunha enfermidade. "Non supera a do placebo", sinala o documento, que indica que a homeopatía se sustenta en "postulados que desafían o pensamento científico e racional" e que os seus produtos, alén de non ser eficaces, teñen riscos tanto por posibles "reacción adversas graves" como, sobre todo, por poderen implicar o "abandono ou atraso de tratamentos médicos con eficacia demostrada". Na imaxe, produtos homeopáticos [CC BY Javier Mediavilla]
