Fálase

O Parlamento expresa por unanimidade "condena e repulsa polo vil asasinato de Samuel Luiz" e as expresións homófobas proferidas polos autores do crime e lembra "a importancia de desterrar da nosa sociedade o odio á diversidade sexual". A través dunha declaración institucional -figura que require a unanimidade dos grupos-, o lexislativo galego recoñece tamén "o comportamento heroico dos cidadáns senegaleses que non dubidaron en acudir ao auxilio" da vítima, "tentando deter o seu linchamento". O texto íntegro pódese ler nesta ligazón.

• Migracións aprobará a regularización administrativa dos mozos que tentaron evitar a agresión a Samuel Luiz

Tellado recuncará como 'número dous' de Feijóo no PP. O presidente da Xunta e líder dos conservadores confirma que o volverá designar como secretario xeral no congreso que o partido celebra esta fin de semana. En 2016 (na imaxe) situouno no cargo que na década anterior exercera Alfonso Rueda.

A Deputación de Lugo denuncia ante a Garda Civil o estrago de máis de 100 metros de estrada en Portomarín cun arado. Trátase da LU-P-4902, de Alto do Valiño por Vilaxuste a Valdeporrás, que, sinala a institución lucense, "apareceu arada á altura do quilómetro 2,5". A Deputación lucense cifra nuns 90.000 euros o custo duns danos que, destaca, "puxeron en perigo ás persoas usuarias da vía, tendo en conta ademais que se produciu de madrugada"

A Xunta deixa 7 concellos en nivel alto de restricións pola COVID: Ourense, Barbadás, A Illa, Cambados, Vilagarcía, Vilanova e O Barco de Valdeorras. Outros 15 quedan en nivel medio, entre eles dúas cidades: Culleredo, Porto do Son, O Carballiño, Sarria, A Pobra do Caramiñal, Marín, Pontevedra, Redondela, Vigo, Caldas, Salceda de Caselas, Boiro, Ribadavia, Sanxenxo e Poio. Sanidade anuncia ademais a limitación a 10 persoas nas terrazas hostaleiras e a "recomendación" dese límite nos encontros privados de non conviventes no exterior e 6 en interiores. Alén disto, o requisito de presentar test negativo ou certificado de vacinación será obrigatorio en todos os pubs e discotecas dende a vindeira semana. Máis información, hoxe en Praza.gal

• AMPLIAMOS 👉 A Xunta estende a obriga de certificar test negativo da COVID ou vacinación para entrar en todos os pubs e discotecas
• MAPA INTERACTIVO | Restricións da Xunta pola COVID dende o sábado, 17 de xullo

O xulgado ve "indicios de malversación" na "xestión de fondos" de Democracia Ourensana e anula o arquivo do pasado xaneiro. A xuíza destaca "saídas de cartos con destino a contas persoais do alcalde de Ourense e a contratación dunha persoa" para facer "as mesmas funcións para o Concello, a Deputación" e a tenda do rexedor. O caso fora denunciado por antigos membros da formación encabezada por Gonzalo Pérez Jácome, que o deixaron en minoría e trasladaron as presuntas irregularidades á  Fiscalía. O xulgado acorda continuar as pescudas e "remitir copia da denuncia ao Tribunal de Contas". Contra este auto cabe recurso de apelación.

• O PP reconstitúe o bipartito con Jácome no Concello de Ourense

Visto e prace definitivo dos gobernos da UE ao plan formulado polo Goberno de España para recibir 69.600 millóns de euros dos fondos de recuperación pola COVID, 9.000 deles xa nas vindeiras semanas. O coñecido como Ecofin (consello dos ministros e ministras de Economía e facenda da Unión) aprobou tamén os plans de Alemaña, Austria, Bélxica, Dinamarca, Eslovaquia, Francia, Grecia, Italia, Letonia, Luxemburgo e Portugal. [Imaxe: © Aurore Martignoni, EC - Audiovisual Service]

• HEMEROTECA | NextGenerationEU, PERTE, Proxecto tractor: guía para non perderse nas axudas á recuperación tras a COVID que chegarán a Galicia
• +INFO 👉 Recuperación tras a COVID

O pleno do Parlamento aproba o nomeamento de seis novos membros do Consello de Administración da CRTVG: 4 están propostos polo PP mentres que BNG e PSdeG teñen cadansúas representantes. O órgano ten un mandato por cinco anos pero segue presidido por Alfonso Sánchez Izquierdo, director xeral de 2009 e que permanece no cargo por tempo indefinido en virtude dunha reforma aprobada en solitario polos populares en 2015. 

• O PP elixe para o Consello da CRTVG a un antigo xefe de comunicación de Fraga na Xunta

A cooperativa audiovisual Xarda vén de publicar o vídeo 'Seixo vive: a loita veciñal pola sanidade pública', que recolle a mobilización que está a producirse en catro parroquias de Marín en defensa do seu centro de saúde e en denuncia do seu progresivo "desmantelamento", pola non cobertura de prazas de profesionais.

• En defensa do Centro de Saúde de Seixo: cando toda a veciñanza das parroquias rurais se mobiliza pola sanidade pública

A Xunta inclúe Asturias, Castela e León e Portugal na lista de territorios coa obriga de control pola COVID de viaxeiros que cheguen a Galicia. Unha nova actualización da anterior listaxe publicada hai dúas semanas deixa só cinco comunidades autónomas fóra da obriga de declaración.

Toman posesión os novos membros do Goberno de España tras a profunda remodelación aprobada por Pedro Sánchez. Os nomeamentos e asignacións de competencias foron publicados este luns no BOE. Na imaxe, Sánchez coas ministras e ministros, tras as tomas de posesión ante o Rei, no Palacio de La Zarzuela (Madrid) [Imaxe: © Goberno de España]

• Pedro Sánchez prescinde de Carmen Calvo e eleva a Nadia Calviño nunha profunda remodelación do seu Goberno