O Tribunal Superior de Xustiza de Galicia valida as restricións da Xunta pola COVID-19 tras o Estado de Alarma, en vigor dende o pasado domingo. A Sala considera, non obstante, que a Xunta debería xustificalas con máis datos epidemiolóxicos e científicos. Ao decaer o Estado de Alarma, os tribunais de Xustiza deben ratificar as medidas que atinxen a dereitos fundamentais.
Fálase
O Parlamento de Galicia apoia por unanimidade esixir a Israel o cumprimento da legalidade internacional e "o respecto absoluto dos dereitos humanos do pobo palestino". Vén de facelo nunha declaración institucional, figura que só pode ser aprobada por unanimidade. En 2014, o Estado de Israel retrucou a unha declaración semellante cualificando de "inimigo" ao Parlamento de Galicia.
- HEMEROTECA (2014) | Israel declara "inimigo" o Parlamento de Galicia
Inditex continúa o peche de tendas en Galicia e clausurará seis establecementos máis este verán, entre eles o Pull&Bear do emblemático edificio do Cine París na Coruña, como adianta Economía Digital. A multinacional, que terá que recolocar 60 traballadoras, está a acelerar coa pandemia a súa viraxe ao negocio en internet.
Cando menos 30 persoas mortas en Palestina nas últimas horas polos bombardeos de Israel. A ONU observa a actual escalada en termos de guerra aberta mentres o Goberno de Israel asegura que se limita a responder aos foguetes lanzados por Hamas. Os desafiuzamentos de veciñanza palestina para entregar as súas vivendas a colonos e o dobre asalto policial á Explanada das Mesquitas desencadearon a actual situación. O xornalista Mikel Ayestaran está a contar sobre o terreo o que está a suceder. (Imaxe: @HoyPalestina)
Vilanova de Arousa e Cualedro sairán este venres do nivel máximo de restricións, ficando sen peche perimetral, que manteñen Cambados, Padrón e Laza. Seis concellos estarán no nivel alto (Vilanova de Arousa, Cangas, A Laracha, Lobios, Oleiros e Ribeira). Ademais, situaranse no nivel medio Ames, Barbadás, Betanzos, Bueu, Carballeda de Valdeorras, Carral, Cerdedo-Cotobade, Chantada, Cualedro, Cuntis, Fisterra, Fornelos de Montes, Gondomar, Lalín, Marín, Melide, Moaña, Moraña, Noia, Ordes, A Pastoriza, Ponte Caldelas, Salceda de Caselas, Santiso, Silleda, Soutomaior, Toén, Tomiño e Valga
Os tres grupos do Parlamento confirman o apoio á Iniciativa Xabarín pola mellora da programación infantil e xuvenil en galego. PP, BNG e PSdeG apoian o impulso á PNL promovida pola Mesa que apañara máis de 33.000 sinaturas.
O persoal da limpeza da provincia da Coruña levou a cabo este martes unha nova xornada de folga en demanda nun novo convenio colectivo que inclúa melloras salariais e de condicións de traballo para un sector moi precarizado. A primeira folga tivo lugar o mes pasado e continuará este mércores cun novo paro xeral en toda a provincia. Este venres as traballadoras recibiron o apoio de Ana Pontón e Gonzalo Caballero no Parlamento.
O xulgado suspende o prazo que concedera á familia Franco para retirar o mobiliario do Pazo de Meirás. Non o poderá facer ata que non se resolva sobre os recursos presentados polo Estado, Xunta, Deputación e concellos da Coruña e Sada.
- HEMEROTECA (20 de abril) | A xustiza estima o recurso dos Franco e permítelles retirar o mobiliario de Meirás
111 praias galegas obteñen bandeira azul, catro máis que os dous últimos anos, cando se chegou ao mínimo da última década entre renuncias de concellos e receos ecoloxistas.
Ao fío do Día das Letras, o BNG da Coruña lanza un vídeo que representa a "historia dunha rapaza q se decide a falar galego na nosa cidade". "É certo que a lingua perde falantes, mais tamén o é que cada día se incorporan ao seu uso moitas persoas", resaltan.