Fálase

O Parlamento Europeo apoia por 328 votos fronte a 278 que a enerxía nuclear e a obtida a partir de gas sexan consideradas como "actividades económicas medioambientalmente sostibles" a efectos do seu financiamento. A proposta partiu da Comisión Europea aínda ten que ser aprobada polos Estados membros, este mesmo mes. Austria e Luxemburgo xa anunciaron que, se sae finalmente adiante, recorrerán ante o Tribunal da Xustiza da UE. O eurodeputado socialista galego Nicolás González Casares, un dos relatores da revisión da Directiva de Renovables, defendeu no proceso que "nin o gas fósil nin a opción nuclear deben gozar da etiqueta verde" ao consideralo "un perigoso exercicio de greenwashing". Na imaxe, planta de Reganosa en Mugardos

O Goberno de España inclúe Vigo e Santiago na lista de 25 cidades nas que prevé celebrar reunións e cimeiras durante a presidencia española do Consello da UE, que decorrerá de xullo a decembro de 2023. Así o vén de confirmar o delegado gobernamental en Galicia, José Miñones, que xa o comunicou á Xunta e a ambos concellos. As restantes cidades propostas son Albacete, Barcelona, Bilbao, Cáceres, Cádiz, Córdoba, Xixón, Granada, Las Palmas, León, Logroño, Madrid, Murcia, Palma, Pamplona, Donostia, Santander, Sevilla, Tarragona, Toledo, València, Valladolid e Zaragoza. Na imaxe, unha vista parcial de Vigo [CC BY-SA elchicogris]

Formoso (PSdeG) apoia que a Xunta reclame as competencias sobre a xestión do litoral, pero reclama ao Goberno galego "ser ambicioso non só no ámbito da costa". "Galicia debe ser ambiciosa, reformar o Estatuto e dotalo de mecanismos, flexibilidade e capacidade para xestionar os sectores estratéxicos do noso país", defendeu o secretario xeral do PSdeG durante unha visita a Baiona.

• O aniversario do primeiro Estatuto axita o debate do autogoberno 14 anos despois das últimas transferencias
• Xunta e PP esgrimen que piden competencias tras 13 anos para que a costa non caia "nas mans de Sánchez"

Diego Giráldez, finalista do XIX Premio Afundación de Xornalismo Fernández del Riego polo seu artigo A coreografía dos envoltorios, publicado en Praza.gal. O xurado tamén outorgou a condición de finalistas a Cláudia Morán por un artigo publicado en Nós Diario e mais a Francisco Castro, por un texto en La Voz de Galicia. [Imaxe: © Mateo H. Soto]

• VOLVE LELO 👉 A coreografía dos envoltorios, por Diego Giráldez

PARO REXISTRADO | As inscricións nas oficinas de emprego descenderon en 5.188 en Galicia durante o mes de xuño (-3,55% e un -1,45% na media estatal) e quedan en 140.932, o que supón un descenso de 16.786 a respecto do mesmo mes de 2021 (diminución do 10,64% e na media estatal, do -20,30%). No mesmo mes, a afiliación media á Seguridade Social aumentou en 7.775 persoas (+0,75% e na media estatal, +0,57%), ata 1,048 millóns, isto é, un 2,62% máis que doce meses antes (na media, +4,35%). 

• AMPLIAMOS 👉 Galicia rexistra o seu maior nivel de emprego dende 2009, pero con cinco veces máis contratos indefinidos

O delegado do Goberno de España en Galicia, José Miñones, lamenta que a Xunta suprima a Tarxeta Básica de alimentos mentres o Estado aproba novas medidas para afrontar a inflación, como a axuda de 200 euros ou o bono alugueiro de 250 euros que, sinala, o Executivo galego presenta como "medida estrela" malia "estar financiada polos Orzamentos do Estado, co voto en contra do PP". Nunha entrevista con Radio Galicia da Cadena SER, Miñones confirmou ademais que Pedro Sánchez ten previsto recibir a Alfonso Rueda durante este mes de xullo.

• BNG e PSdeG esixen que a Xunta repoña a Tarxeta Básica de alimentos e Rueda reafírmase na cancelación

Feijóo censura que "cada vez que temos un problema nun territorio" haxa quen diga que "o culpable é o de Madrid". "Son consciente de que é moito máis doado buscar un culpable que solucionar un problema", afirmou o ex-presidente da Xunta e agora líder do PP nun acto en Catalunya.

• Rueda retoma a estratexia de Feijóo de culpar a Sánchez e o bipartito de hai 13 anos na súa terceira sesión de control
• HEMEROTECA | Feijóo culpa a Sánchez no seu derradeiro Consello de ser o primeiro presidente que non logra novas competencias para Galicia
• HEMEROTECA | Feijóo di que cando culpa do que non funciona á cidadanía, Sánchez, a oposición ou Portugal "estamos defendendo Galicia"

Alumnado e ex-estudantes do IES de Becerreá reclaman nun vídeo frear os recortes de materias e recursos neste instituto e expoñen como mostra da súa importancia as carreiras profesionais que desenvolveron diversas persoas que estudaron no centro. A comunidade educativa deste instituto vénse mobilizando pola "derrogación da normativa pola cal se poden suprimir materias con menos de 5 alumnos aínda que no centro haxa profesorado especialista" e, en xeral, "a fin dos continuos recortes" aos centros do rural

• HEMEROTECA | Berro polo ensino no rural: "Galiza é moito máis que sete cidades"

Un neno resulta ferido en Viveiro tras ser atropelado por un tren. Segundo informa o 112, o suceso aconteceu no serán do pasado venres, cando persoal do Adif avisou a Emerxencias "de que unha persoa fora alcanzada por un tren" da antiga Feve "moi preto da praza Donapetry" da vila mariñá. O neno foi trasladado en UVI móbil a un campo de fútbol cercano, onde aterrara un helicóptero medicalizado que o trasladou ao hospital Materno Infantil da Coruña. Na imaxe, de arquivo, estación da antiga Feve en Viveiro.

O BNG esixe á Xunta a "restitución inmediata" da Tarxeta Básica para a compra de alimentos que vén de cancelar e que a manteña como "permanente" para persoas pendentes de acceder á Risga ou ao Ingreso Mínimo Vital. Olalla Rodil, vicevoceira parlamentaria da formación, ve "inadmisible" que o Goberno galego suprima a "única medida fronte á crise" e lembra que o Bloque vén reclamando un "plan de rescate" fronte á crise de prezos que inclúa medidas como a suba dos importes da Renda de Inclusión e novas axudas para o pagamento da vivenda.

• AMPLIAMOS 👉 BNG e PSdeG esixen que a Xunta repoña a Tarxeta Básica de alimentos e Rueda reafírmase na cancelación
• A Xunta cancela a axuda para alimentos mentres ve insuficientes as medidas de Sánchez contra a inflación