Fálase

O delegado do Goberno central en Galicia, José Miñones, traslada a “total colaboración” para garantir o "suministro na cadea alimentaria galega" durante o paro do transporte. Miñones reuniuse esta tarde co presidente da Confederación de Empresarios de Galicia (CEG), Juan Manuel Vieites, e con representantes de Hijos de Rivera, Jealsa, Leche Río, Nueva Pescanova ou Vegalsa-Eroski, entre outras empresas, para ratificar que “o Goberno traballa para asegurar os desprazamentos de mercancías dos transportistas que queren traballar”. 

O xuíz envía a prisión comunicada e sen fianza ao acusado de matar unha veciña de Barro provocando unha colisión frontal co seu coche. O xulgado remite ao que resta de instrución se lle imputa delito de homicidio ou asasinato. Diversas fontes aluden que a vítima, Jéssica Méndez, era vítima de acoso por parte do agora detido. Unha vez coñecida a decisión xudicial, o Concello de Barro sinala "que coa confirmación das liñas de investigación que se están levando a cabo por parte das forzas de seguridade, este caso trataríase dun caso claro de feminicidio". Na imaxe, convocatoria dunha concentración de repulsa para este serán. Está a contalo Pontevedra Viva.

Unha muller alerta a Policía Local de Lugo de que un home a agrediu nun bar por falar en galego. Segundo o parte divulgado polo corpo policial lucense, a muller chamou os axentes dende un bar no que "estaba cunha amiga falando en galego, momento no que se achega un home que comezou a recriminarlle por utilizar este idioma, colléndoa fortemente polos brazos e ameazándoa, sacándolle unha foto co seu teléfono móbil". A Policía localizou o presunto agresor na zona "procedendo á súa identificación e instruíndose dilixencias en dependencias policiais por estes feitos, quedando á espera de que a agredida presente a correspondente denuncia". Na imaxe, de arquivo, vehículos da Policía Local de Lugo.

Novedades Carminha deciden "parar indefinidamente". A través das súas redes sociais, a banda compostelá explica que, tras cinco discos, precisan "coller forzas e estar fóra; botalo de menos para -oxalá- poder vernos de novo". Avanzan, ademais, que non realizarán xira nin disco de despedida.

Afunde un treito da estrada LU-651, que une Folgoso do Courel con Quiroga á altura do quilómetro 18,3. Segundo informa o Concello courelao, as "primeiras informacións" apuntan a que "non hai que lamentar danos persoais". O goberno local, que pide evitar a circulación pola zona, sinala que "está en contacto coa Xunta dende que se coñeceu o suceso", por ser o Goberno galego o titular da estrada. Imaxe divulgada polo Concello de Folgoso contra o mediodía deste domingo.

O sindicato Unións Agrarias secundou este domingo en Madrid a mobilización convocada por diferentes colectivos vinculados ao agro e ao medio rural, no seu caso para poñer o acento na necesidade de  "prezos xustos, actuacións contundentes contra as industrias que incumpren a lei" de cadea alimentaria e "un plan de apoio que inxecte liquidez ás explotacións". "Estamos coa auga ao pescozo, a Xunta e o Goberno central non poden ignoralo", agregan.

• AMPLIAMOS 👉 A Xunta secunda en Madrid a manifestación que liga a reivindicación de prezos xustos para o campo coa defensa da caza
• A guerra na Ucraína tamén bloquea o gran celeiro de pensos da gandaría galega e reabre o debate da soberanía alimentaria
• HEMEROTECA (2021) | A suba dos custos de produción afoga o sector gandeiro, que volve ás protestas

A plataforma Galiza pola paz concentrouse este mediodía nas sete principais cidades galegas. Na presentación da mobilización, os convocantes expresaron o "máis enérxico rexeitamento á intervención militar rusa en territorio ucraíno" e a "plena solidariedade co sufrimento do pobo ucraíno e o de Donestk e Lugansk". A súa reivindicación, sinalan, pasa polo "cesamento das accións de guerra e á volta á diplomacia", por que a "Unión Europea deixe de enviar armas" e a "neutralidade activa do Estado español". As concentracións foron secundadas polo BNG e a CIG. Na imaxe, a celebrada en Vigo.

Colectivos ecoloxistas e ciclistas galegos reclaman a Renfe máis facilidades para poder transportar as bicicletas no tren. Nunha acción simultánea nas estacións da Coruña, Santiago, Vilagarcía, Pontevedra e Vigo, presentaron follas de reclamacións nas que reclaman á empresa ferroviaria estatal "que permita levar máis bicicletas nos trens e que non cobre suplemento por traxecto", todo baixo o lema Bici no tren, xa!. Na iniciativa participaron A Golpe de Pedal, Arousa en Bici, Composcleta, Conbici, Ecoloxistas en Acción, Greenpeace, Mobi-liza, Mulleres Bicivisíbeis, Pedaladas, Verdegaia, Vigo Ciclábel. Na imaxe, participantes na mobilización en Vigo [© Greenpeace]

• HEMEROTECA | Aparcadoiros en vivendas, bicis no currículo escolar ou título de mecánico oficial: a estratexia estatal para fomentar a bicicleta
• HEMEROTECA | "A crise da COVID visibilizou o absurdo e a inxustiza do reparto do espazo nas cidades a prol dos coches"

Pedro Sánchez defende o plan de autonomía para o Sáhara como "a base máis seria" para unha solución, segundo asegura a Casa Real de Marrocos. O presidente muda a posición histórica de España respecto ao Sáhara nunha carta remitida ao rei Mohamed VI.

• AMPLIAMOS 👉 España volve deixar o pobo saharauí nas mans de Marrocos en plena mudanza do taboleiro internacional
• HEMEROTECA | O abandono histórico do Sáhara rexórdelle a España en Ceuta mentres Marrocos volve utilizar persoas migrantes como reféns
• HEMEROTECA | O conflito recrúa no Sáhara: de gozar os veráns en Galicia a adestrarse para a guerra

A Xunta fai oficial a fin da recomendación do uso da máscara nos patios escolares pola actual "situación epidemiolóxica e a grande porcentaxe de poboación pediátrica e xuvenil vacinada" contra a COVID. Segundo os datos máis recentes do Ministerio de Sanidade, o 51,3% das nenas e nenos de 5 a 12 anos teñen a pauta completa da vacina.

• ENTREVISTA | Francisco Caamaño: "A máscara pode eliminarse de inmediato en aulas e oficinas
• HEMEROTECA | A Asociación de Pediatría propón retirar as máscaras nas aulas desde finais de febreiro