Fálase

O sindicato Unións Agrarias secundou este domingo en Madrid a mobilización convocada por diferentes colectivos vinculados ao agro e ao medio rural, no seu caso para poñer o acento na necesidade de  "prezos xustos, actuacións contundentes contra as industrias que incumpren a lei" de cadea alimentaria e "un plan de apoio que inxecte liquidez ás explotacións". "Estamos coa auga ao pescozo, a Xunta e o Goberno central non poden ignoralo", agregan.

• AMPLIAMOS 👉 A Xunta secunda en Madrid a manifestación que liga a reivindicación de prezos xustos para o campo coa defensa da caza
• A guerra na Ucraína tamén bloquea o gran celeiro de pensos da gandaría galega e reabre o debate da soberanía alimentaria
• HEMEROTECA (2021) | A suba dos custos de produción afoga o sector gandeiro, que volve ás protestas

A plataforma Galiza pola paz concentrouse este mediodía nas sete principais cidades galegas. Na presentación da mobilización, os convocantes expresaron o "máis enérxico rexeitamento á intervención militar rusa en territorio ucraíno" e a "plena solidariedade co sufrimento do pobo ucraíno e o de Donestk e Lugansk". A súa reivindicación, sinalan, pasa polo "cesamento das accións de guerra e á volta á diplomacia", por que a "Unión Europea deixe de enviar armas" e a "neutralidade activa do Estado español". As concentracións foron secundadas polo BNG e a CIG. Na imaxe, a celebrada en Vigo.

Colectivos ecoloxistas e ciclistas galegos reclaman a Renfe máis facilidades para poder transportar as bicicletas no tren. Nunha acción simultánea nas estacións da Coruña, Santiago, Vilagarcía, Pontevedra e Vigo, presentaron follas de reclamacións nas que reclaman á empresa ferroviaria estatal "que permita levar máis bicicletas nos trens e que non cobre suplemento por traxecto", todo baixo o lema Bici no tren, xa!. Na iniciativa participaron A Golpe de Pedal, Arousa en Bici, Composcleta, Conbici, Ecoloxistas en Acción, Greenpeace, Mobi-liza, Mulleres Bicivisíbeis, Pedaladas, Verdegaia, Vigo Ciclábel. Na imaxe, participantes na mobilización en Vigo [© Greenpeace]

• HEMEROTECA | Aparcadoiros en vivendas, bicis no currículo escolar ou título de mecánico oficial: a estratexia estatal para fomentar a bicicleta
• HEMEROTECA | "A crise da COVID visibilizou o absurdo e a inxustiza do reparto do espazo nas cidades a prol dos coches"

Pedro Sánchez defende o plan de autonomía para o Sáhara como "a base máis seria" para unha solución, segundo asegura a Casa Real de Marrocos. O presidente muda a posición histórica de España respecto ao Sáhara nunha carta remitida ao rei Mohamed VI.

• AMPLIAMOS 👉 España volve deixar o pobo saharauí nas mans de Marrocos en plena mudanza do taboleiro internacional
• HEMEROTECA | O abandono histórico do Sáhara rexórdelle a España en Ceuta mentres Marrocos volve utilizar persoas migrantes como reféns
• HEMEROTECA | O conflito recrúa no Sáhara: de gozar os veráns en Galicia a adestrarse para a guerra

A Xunta fai oficial a fin da recomendación do uso da máscara nos patios escolares pola actual "situación epidemiolóxica e a grande porcentaxe de poboación pediátrica e xuvenil vacinada" contra a COVID. Segundo os datos máis recentes do Ministerio de Sanidade, o 51,3% das nenas e nenos de 5 a 12 anos teñen a pauta completa da vacina.

• ENTREVISTA | Francisco Caamaño: "A máscara pode eliminarse de inmediato en aulas e oficinas
• HEMEROTECA | A Asociación de Pediatría propón retirar as máscaras nas aulas desde finais de febreiro

A parodia de Feijóo volve a Polònia, o espazo satírico da catalá TV3. Desta volta, o imitador do aínda presidente da Xunta protagoniza unha particular versión da canción La venda ya cayó para, xunto co líder do PP en Castela e León, xustificaren o pacto do PP con Vox nesa comunidade autónoma. Pódese ver nas redes sociais do programa

• Feijóo culpa o PSOE do bipartito de PP e Vox en Castela e León e pide non recibir críticas preventivas como en 2009

Así soa Levantarse e caer, o adianto do novo disco en solitario de Xabier Díaz, que lanzará o vindeiro abril. Explica que é un tema sobre "importancia de sobrepoñerse aos fracasos e saber, ao tempo, asimilar os éxitos. O videoclip  foi gravado entre Esposende e o Gerés e está dirixido por Juliana Ramalho e Diogo Martins.

• HEMEROTECA | Xabier Díaz: "Todo ao leste do Eixo Atlántico é un silencio clamoroso: desatendido, despoboado e caendo pouco a pouco"

A Xunta prevé deixar de recomendar o uso da máscara nos patios escolares dende este xoves. A medida chega tras a conclusión do groso da vacinación pediátrica contra a COVID. [Imaxe: CC-BY-SA Ana Varela / Xunta]

• ENTREVISTA | "A máscara pode eliminarse de inmediato en aulas e oficinas"
• HEMEROTECA | A Asociación de Pediatría propón retirar as máscaras nas aulas desde finais de febreiro

A Unión de Consumidores de Galicia reclama compras "racionais e responsables" para, especialmente no sector da alimentación, "evitar agravar as situacións de falta de abastecemento" derivada do paro no transporte. Neste sentido a UCGAL ve "urxente" que os gobernos "actúen de forma decidida" tanto para paliar a escalada de prezos como para "retornar á normalidade" na distribución.

• Lonxas a medio gas, temor no sector gandeiro e desabastecemento nalgún produto fresco polo paro do transporte

A catedrática de Enxeñaría Química da Universidade de Vigo Herminia Domínguez González ingresou este mércores como académica numeraria da Real Academia Galega de Ciencias. No seu discurso, Herminia Domínguez [na imaxe ©RAGC, terceira pola esquerda] centrouse no aproveitamento racional e completo da biomasa vexetal. 

Así mesmo, a nova académica apostou por "ampliar e aplicar os coñecementos científicos que permitan desenvolver tecnoloxías máis limpas e eficientes para o fraccionamento e a conversión da biomasa renovable nas futuras biorrefinerías".